Read ewe Mateo 14 Bible Online

Mateo 14 - ewe bible

Mateo 14

¹Le ɣemaɣi me la dziɖula Herodes se Yesu ŋkɔ.

²Eye wògblɔ na eƒe dɔlawo bena: Yohanes mawutsidetanamela la enye esi; eyae tsi tre tso ame kukuwo dome; eyaŋuti ŋusẽwo le dɔ wɔm le eme alea.

³Elabena esi Herodes lé Yohanes la, eblae hede gaxɔ me le Herodia, si nye nɔvia Filipo srɔ̃ la ŋuti.

⁴Elabena Yohanes gblɔ nɛ bena: Womeɖe mɔ na wò be, naɖee o.

⁵Eye wòle didim be, yeawui; gake evɔ̃ ameha la, elabena wòbua eyama abe nyagblɔɖila ene.

⁶Ke esi woɖu Herodes ƒe dzigbe la, Herodia ƒe vinyɔnuvi la va ɖu ɣe le wo titina, eye wòdze Herodes ŋu.

⁷Eyata wòka atam do ŋugbe nɛ be, nusianu, si ke wòabia la, yeanae.

⁸Ke eya la, esi dadaa gblɔe ɖi nɛ tà, egblɔ bena: Tsɔ Yohanes mawutsidetanamela la ƒe ta de agba me nam le afii!

⁹Eye wòve fia la, gake le atam, si wòka, kple amesiwo nɔ kplɔ̃a ŋu kplii ŋuti la, eɖe se be, woatsɔe nɛ,

¹⁰eye wòɖo be, wòayi aɖatso Yohanes ƒe ta le enu le gaxɔ me.

¹¹Eye wotsɔ eƒe ta de agba me vɛ, eye wotsɔe na nyɔnuvia, eye wòtsɔe yi na dadaa.

¹²Ke eƒe nusrɔ̃lawo va ko eƒe kukua yi ɖaɖi, eye woyi ɖaka eta na Yesu.

¹³Ke esi Yesu see la, eɖo ʋu dzo le afima, eye wòƒo asa yi ɖe gbedzi. Eye esi amehawo see la, woto afa tso duawo me va dze eyome.

¹⁴Eye esi Yesu do go, eye wòkpɔ ame geɖe la, eƒe dɔme trɔ ɖe wo ŋu, eye wòda gbe le woƒe dɔlélawo ŋu.

¹⁵Eye esi fiẽsi ɖo la, eƒe nusrɔ̃lawo va egbɔ gblɔ bena: Afisia gbedzìe, eye ɣeyiɣi la va yi xoxo; ɖe asi le amehawo ŋu azɔ, ne woayi ɖe kɔƒeawo me aɖaƒle nuɖuɖu na wo ɖokui.

¹⁶Ke eya gblɔ na wo bena: Mehiã bena, wòayi o; miawo mina nu wo woaɖu!

¹⁷Eye wogblɔ ne bena: Naneke mele mía si le afisia o, negbe abolo atɔ kple tɔmelã eve ko.

¹⁸Eye wòbe: Mitsɔ wo vɛ nam!

¹⁹Eye wòɖo bena, amehawo nabɔbɔ nɔ gbea dzi; eye esi wòtsɔ abolo atɔ̃ la kple lã eveawo la, ekpɔ dziƒo, eye wòyra ɖe wo dzi, eye esi wòŋe wo me la, etsɔ wo na eƒe nusrɔ̃lawo, eye nusrɔ̃lawo tsɔ wo na amehaawo.

²⁰Eye wo katã woɖu nu, eye woɖi ƒo, eye wòfɔ kakɛ, siwo susɔ la, ɖe xevi wuieve me fũ.

²¹Ke amesiwo ɖu nua la, woanɔ ŋutsu akpe atɔ̃, nyɔnuwo kple ɖeviwo mele eme o.

²²Eye Yesu ƒoe ɖe nusrɔ̃lawo nu enumake bena, woaɖo nu adze ye ŋgɔ ayi go keme dzi, vaseɖe esime yeaɖe asi le amehawo ŋu.

²³Eye esi wòɖe asi le amehawo ŋu vɔ la, eya ɖeka yi to la dzi be, yeado gbe ɖa. Eye esi zã do la, eya ɖeka tsi afima.

²⁴Ke ʋu la do ƒu titina xoxo, eye ƒutsotsoewo le enyamam, elabena ya ƒo le ʋu la kpem.

²⁵Ke le zã ƒe ŋudzɔɣi enelia me la Yesu le ƒu dzi zɔm gbɔna wo gbɔ.

²⁶Ke esi nusrɔ̃lawo kpɔe wòle ƒu dzi zɔm gbɔna la, dzika tso wo ƒo, eye wogblɔ bena: Ŋɔlie! Eye wodo vɔvɔ̃ɣli.

²⁷Enumake Yesu ƒo nu na wo gblɔ bena: Miaƒe dzi nèdze me, nye enye esi; migavɔ̃ o hee!

²⁸Eye Petro xɔ edzi gblɔ nɛ bena: Aƒetɔ, nenye wòe la, na bena, mazɔ tsia dzi ava gbɔwò.

²⁹Tete wògblɔ bena: Va! Eye esi Petro ɖi le ʋua me la, ezɔ tsia dzi va Yesu gbɔ.

³⁰Gake esi wòkpɔ ya le ƒoƒom la, evɔ̃, eye esi wòde asi toyiyi me la, edo ɣli gblɔ bena: Aƒetɔ, ɖem!

³¹Eye Yesu do abɔ ɖa enumake, eye wòlée hegblɔ nɛ bena: Wò xɔseʋeetɔ, nukaŋuti nèke ɖi mahã?

³²Eye esi woge ɖe ʋua me la, ya la dzudzɔ.

³³Ke amesiwo le ʋua me la, dze klo nɛ gblɔ bena: Mawuvi nenye vavã.

³⁴Eye esi wotso ƒua la, woɖo Genezaret-nyigba la dzi.

³⁵Eye esi afimatɔwo dze sii la, woɖo du ɖe afimanutoawo katã me godoo, eye wotso dɔlélawo katã va egbɔ;

³⁶eye wova ɖe kuku nɛ bena, yewoade asi teƒe awuto ko ŋuti; eye ame geɖe alesi nu de asi eŋu la, ƒe lãme sẽ.