Read ewe Mateo 20 Bible Online

Mateo 20 - ewe bible

Mateo 20

¹Elabena dziƒofiaɖuƒe la ɖi aƒetɔa ɖe, si do go ŋdikanya, be yeadɔ dɔwɔlawo de yeƒe weinbɔ me.

²Ke esi eya kple dɔwɔlawo nyi denario ɖeka ƒe asi ɖe ŋkeke ɖeka dzi la, edo wo de eƒe weinbɔ la me.

³Eye esi wòdo go le gaƒoƒo etɔ̃lia me la, ekpa ame bubuwo le tsitre le asi me le kuvia me;

⁴eye wògblɔ na wo bena: Miawo hã miheyi ɖe weinbɔ la me, eye nusi ke anyo la, mana mi. Eye woyi.

⁵Ke egado go le gaƒoƒo adelia kple asiekelia me, eye wògawɔ nenema ke.

⁶Ke esi wòdo go le gaƒoƒo wuiɖekelia me la, ekpɔ ame bubuwo le tsitre, eye wògblɔ na wo bena: Nukaŋuti míetsi tre le kuvia me ɖe afisia ŋkeke blibo la katã mahã?

⁷Wogblɔ nɛ bena: Elabena amea ɖeke medɔ mi o. Egblɔ na wo bena: Miawo hã miheyi ɖe weinbɔ la me.

⁸Ke esi fiẽsi ɖo la, weinbɔtɔ la gblɔ na eƒe xɔnuvi bena: Yɔ dɔwɔlawo vɛ, eye nana fetu wo, eye nadze egɔme atso mlɔetɔwo dzi vaseɖe gbãtɔwo dzi.

⁹Eye esi gaƒoƒo wuiɖekelia me tɔwo va la, wo katã woxɔ denario ɖekaɖeka.

¹⁰Ke esi gbãtɔwo va la, wobu xa bena, yewoaxɔ ɖewo ɖe dzi, eye woawo hã woxɔ denario ɖekaɖeka.

¹¹Eye esi woxɔe la, woli liʋiliʋi le aƒetɔ la ŋuti

¹²gblɔ bena: Ame mlɔetɔ siawo wo do gaƒoƒo ɖeka ko, eye nèwɔ wo wosɔ kpli mi, amesiwo kpe hiã ŋkeke blibo la katã, eye ŋɖɔkutsu ɖu mi la.

¹³Eye wòɖo eŋu gblɔ na wo dometɔ ɖeka bena: Xɔ̃nye, nyemewɔ nu madzɔmadzɔ ɖe ŋuwò o, alo mia kpli wò la menye denario dzi mienyi asi ɖo o mahã?

¹⁴Tsɔ tawò nayi; gake melɔ̃ bena, mana mlɔetɔ sia, abe alesi mena wò ene.

¹⁵Alo ɖe ma mele asinye bena, mawɔ nusi nye tɔnye la ŋuti do, alesi melɔ̃ o mahã? Alo nye ɖɔmenyonyo ŋutie nèle ŋku biam ɖe ŋutinye ɖo mahã?

¹⁶Nenem eye mlɔetɔwo lazu gbãtɔwo, eye gbãtɔwo lazu mlɔetɔwo; elabena ame geɖewo nye amesiwo woyɔ, eye ame ʋeewo nye amesiwo wotia.

¹⁷Eye esi Yesu yina Yerusalem la, ena nusrɔ̃la wuieve la ɖeɖe va egbɔ, eye le mɔ dzi la egblɔ na wo bena:

¹⁸Kpɔ ɖa, mieyina Yerusalem, eye woade Amegbetɔvi la asi na nunɔlagãwo kple agbalẽfialawo, eye woatso kufia nɛ;

¹⁹eye woatsɔe ade asi na trɔ̃subɔlawo, bena woaɖu fewu le eŋuti, eye woaƒoe kple atam, eye woahee ɖe ati ŋuti; eye ŋkeke etɔ̃agbe la wòatsi tre?

²⁰Tete Zebedeo viwo dada va egbɔ kple eƒe ŋutsuvi eve, eye wòdze klo nɛ le nane biamii.

²¹Eye wògblɔ ne bena; Nuka dim nèle? Egblɔ nɛ bena: Na bena, nye ŋutsuvi eve siawo nabɔbɔ nɔ anyi, ɖeka nanɔ wò nuɖusi me, eye ɖeka nanɔ wò mia me le wò fiaɖuƒe la me.

²²Ke Yesu xɔ edzi gblɔ bena: Mienya nusi biam miele o. Alo miate ŋu ano kplu, si no ge malaa? Eye mawutsi, si woade ta nam la, wòadee ta na miawo hã mahã? Wogblɔ nɛ bena: Miate ŋui.

²³Egblɔ na wo bena: Ele me bena, miano nye kplu la, eye mawutsi, si woade ta nam la, woadee ta na miawo hã; ke anyinɔnɔ ɖe nye nuɖusi me kple mia me la, eya menye tonye be, mana o, negbe amesiwo Fofonye dzrae ɖo ɖi na la ko.

²⁴Ke esi ame ewo la see la, eve dɔme na wo ɖe nɔvi eveawo ŋuti.

²⁵Ke Yesu ya wo va egbɔ gblɔ bena: Mienya bena, dukɔwo ƒe dziɖulawo nye aƒetɔwo ɖe wo dzi, eye amegãwo kpo ŋusẽ ɖe wo dzi.

²⁶Neganɔ nenema le mia dome o; ke amesi ke di bena, yeazu amegã le mia dome la, nanye miaƒe subɔla;

²⁷eye amesi ke di bena, yeanye gbãtɔ le mia dome la, nanye miaƒe dɔla;

²⁸abe alesi Amegbetɔvi la meva bena, woasubɔ ye o, ke boŋ bena yeasubɔ, eye yeatsɔ eƒe agbe la ana ɖe ame geɖewo ƒe xoxo ta la ene.

²⁹Eye esi wodo go tso Yerixo-dua me yina la, ameha geɖewo dze eyome.

³⁰Eve kpo ɖa, ŋkuagbãtɔ eve bɔbɔ nɔ mɔ to; esi wose bena, Yesu le wo ŋuti tom yina la, wodo ɣli gblɔ bena: Dawid vi la, kpɔ mia nublanui!

³¹Eye ameha la blu ɖe wo ta, bena woazi ɖoɖoe. Ke woawo gado ɣli ɖe edzi gblɔ bena: Aƒetɔ, Dawid vi la, kpɔ mia nublanui!

³²Eye Yesu to ɖe tsitre, eye wòyɔ wo ve gblɔ bena: Nuka dim miele, bena mawɔ na mi mahã?

³³Wogblɔ nɛ bena: Aƒetɔ, bena miaƒe ŋkuwo naʋu.

³⁴Eye Yesu ƒe dɔme trɔ ɖe wo ŋu, eye wòde asi woƒe ŋkuwo ŋu, eye enumake wokpɔ nu, eye wodze eyome.