Read ewe Mateo 23 Bible Online

Mateo 23 - ewe bible

Mateo 23

¹Tete Yesu ƒo nu na amehawo kple eƒe nusrɔ̃lawo gblɔ bena:

²Agbalẽfialawo kple farisitɔwo bɔbɔ nɔ Mose ƒe zikpui dzi;

³eyaŋuti nusianu, si wogblɔ na mi la, miwɔe, eye milé eme ɖe asi; gake la migawɔ nu ɖe woƒe nuwɔnawo nu o, elabena wogblɔnɛ, ke womewɔnɛ o.

⁴Ke wodoa agba kpekpe, siwo wu tsɔtsɔ la, hetsɔna ɖoa amewo ƒe abɔta; gake woawo ŋutɔ melɔ̃na be, woƒe asibide ɖeka naka wo ŋu o.

⁵Eye wowɔa woƒe nuwo katã, bena amewo nakpɔ wo; elabena wowɔa woƒe ŋkuɖodzinuwo wokekena, eye wowɔa woƒe awutogbowo wololona;

⁶eye wolɔ̃a kplɔ̃tanɔnɔ le nuɖuƒewo kple nɔƒe gbãtɔwo nɔnɔ le woƒe ƒuƒoƒewo

⁷kpakple gbedoname le ablɔawo me, eye bena, amewo nayɔ wo be Rabi.

⁸Ke miawo la migana woayɔ mi be Rabi o, elabena ame ɖeka koe nye miaƒe nufiala, eye mi katã la nɔviwò mienye.

⁹Eye migayɔ amea ɖeke be mia fofo le anyigba dzi o; elabena ame ɖekae nye mia fofo, eyae le dziƒo.

¹⁰Eye womegayɔ mi be kplɔlawo o; elabena ame ɖekae nye miaƒe kplɔla, eyae nye Kristo.

¹¹Ke amesi nye gãtɔ le mia dome la, nanye miaƒe subɔla.

¹²Eye amesi ke lado eɖokui ɖe dzi la, woabɔbɔe ɖe anyi, eye amesi ke labɔbɔ eɖokui ɖe anyi la, woadoe ɖe dzi.

¹³Ke baba na mi, agbalẽfialawo kple farisitɔwo, alakpatɔwo, bena mietua dziƒofiaɖuƒe la ɖe amewo nu; elabena mia ŋutɔwo mieyina ɖe eme o, eye amesiwo le yiyim ɖe eme hã la, mieɖea mɔ na wo be, woayi o.

¹⁴Baba na mi, agbalẽfialawo kple farisitɔwo, alakpatɔwo, elabena miemia ahosiwo ƒe aƒewo, eye miedaa alakpa nɔa gbe didiwo dom ɖa.

¹⁵Baba na mi, agbalẽfialawo kple farisitɔwo, alakpatɔwo, elabena mietsana le ƒu kple anyigba dzi bena miawo trɔ̃subɔla ɖeka wòazu Yudatɔ, eye ne ezui la, ekema miewɔe dzomavɔʋe ƒe vi, si wu mia ŋutɔwo zi eve.

¹⁶Baba na mi mɔfiala ŋkuagbãtɔ, siwo gblɔna bena: Amesi ke ata mawuƒe la, eya menye naneke o; ke amesi ke ata mawuƒe me sika la, eyae nyi fe.

¹⁷Movitɔwo kple ŋkuagbãtɔwo, kae lolo wu, sika loo alo mawuƒe, si na sika la ŋuti kɔna, mahã?

¹⁸Eye amesi ke atà vɔsamlekpui la, eya menye naneke o, ke amesi ke atà nunana, si le edzi la, eyae nyi fe.

¹⁹Ŋkuagbãtɔwo, kae lolo wu, nunana loo alo vɔsamlekpui, si na nunana la ŋuti kɔna, mahã?

²⁰Eyaŋuti amesi ke atà vɔsamlekpui la, eya ta eya kple nusianu, si le edzi.

²¹Eye amesi ke atà mawuƒe la, eya tà eya kple amesi nɔa eme.

²²Eye amesi ke atà dziƒo la, eya tà Mawu ƒe zikpui kple amesi nɔa edzi.

²³Baba na mi, agbalẽfialawo kple farisitɔwo, alakpatɔwo, elabena miena ahame, sikɔni kple tsyo ƒe memamã ewolia, eye miegblẽ nusiwo le kpekpem wu le sedede la me: ʋɔnudɔdrɔ̃ kple nublanuikpɔkpɔ kple xɔse la ɖi; ke esiawo le bena, miawɔ, eye miagagblẽ ekemeawo ɖi mawɔmawɔ o.

²⁴Mɔfiala ŋkuagbãtɔwo, miele tagbatsu tsyɔm, ke kposɔ miemina.

²⁵Baba na mi, agbalẽfialawo kple farisitɔwo, alakpatɔwo, elabena mieklɔa kplu kple agba ŋuti, ke wo me yɔ fũ kple adzodada kple aɖifuɖiɖuɖu.

²⁶Wò farisitɔ, ŋkuagbãtɔ, klɔ kplu me gbãgbiagbã, bena eŋuti hã naɖi.

²⁷Baba na mi, agbalẽfialawo kple farisitɔwo, alakpatɔwo; elabena mieɖi yɔdo, siwo ŋuti wòsi akalo ɖo, eye wole dzedzem nyuie la, ke wo me yɔ fũ kple ame kukuwo ƒe ƒuwo kpakple ɖiƒoƒo katã.

²⁸Nenema ke miawo hã miedzena ame dzɔdzɔewo le gota le amewo ƒe ŋku me; ke mia me yɔ taŋ kple alakpadada kpakple madzɔmadzɔnyenye.

²⁹Baba na mi, agbalẽfialawo kple farisitɔwo, alakpatɔwo, elabena mieɖɔa nyagblɔɖilawo ƒe yɔdowo ɖo, eye miewɔa leke na ame dzɔdzɔewo ƒe ɖiƒewo

³⁰hegblɔna bena: Ɖe mieli le mia fofowo ŋɔli la, ne miewɔ ɖeka kpli wo le nyagblɔɖilawo ƒe nu la me o.

³¹Alea mieɖia ɖase le mia ɖokui ŋuti bena, míenye amesiwo wu nyagblɔɖilawo la ƒe viwo.

³²Miawo hã miyɔ mia fofowo ƒe dzidzenu la nu!

³³Dawo, ƒliwo ƒe dzidzimewo! Aleke miawɔ asi atso dzomavɔʋe ƒe ʋɔnudɔdrɔ̃ la nu mahã?

³⁴Eyaŋuti kpɔ ɖa, mele nyagblɔɖilawo, nunyalawo kple agbalẽfialawo dɔm ɖe mia gbɔ; miawu wo dometɔa ɖewo, eye miahe wo ɖe ati ŋuti, miaƒo wo dometɔa ɖewo kple atam le miaƒe ƒuƒoƒewo, eye miati wo yome tso du me yi du me,

³⁵bena nu dzɔdzɔe ƒe ɖesiaɖe, si woda ahe le anyigba dzi la, nava mia dzi, tso Abel, ame dzɔdzɔe la, ƒe du la dzi vaseɖe Zaxarya, Baraxya vi la ƒe ʋu la dzi, amesi miewu le mawuxɔ kple vɔsamlekpui la dome.

³⁶Vava mele egblɔm na mi bena: Nenem nusiawo katã ava dzidzime sia dzi.

³⁷Yerusalem, Yerusalem, si wu nyagblɔɖilawo, eye wòfɔ kpe ƒu amesiwo wodɔ ɖo ɖe egbɔ! Zi nenie meɖi bena, maƒo viwòwo nu ƒu, abe alesi koklonɔ ƒoa viawo nu ƒu ɖe eƒe aʋala te ene, gake mielɔ̃ o!

³⁸Kpɔ ɖa, woagblẽ miaƒe aƒe ɖi na mi aƒedoe.

³⁹Elabena mele egblɔm na mi bena: Tso esia dzi yina la miegale kpɔ ye ge o, vaseɖe esime miagblɔ bena: Woayra amesi gbɔna le Aƒetɔ ƒe ŋkɔ la dzi.