Read ewe Mateo 26 Bible Online

Mateo 26 - ewe bible

Mateo 26

¹Eye wòva me, esi Yesu wu nenem nya siawo katã nu vo la, egblɔ na eƒe nusrɔ̃lawo bena:

²Minyae bena, ŋkeke eve megbe la ŋutitoto la aɖo, eye woade Amegbetɔvi la asi, be woaklẽe ɖe ati ŋuti.

³Tete nunɔlagãwo kple dumegãwo va kpe ta ɖe nunɔlagã, si ŋkɔ nye Kayafa la, ƒe mɔ̃ la me;

⁴eye wode adaŋu bena, yewoalé Yesu le adaŋu me, eye yewoawui.

⁵Ke wogblɔ bena: Menye le ŋkekenyuie la dzi o, bena zi nagatɔ le dukɔ la dome o.

⁶Esi Yesu le Betania le Simon, dzɔbutɔ la ƒe me la,

⁷nyɔnua ɖe va egbɔ kple alabastrogui, eye ami, si ƒe asi sẽ ŋutɔ la, le eme, eye wòtsɔe kɔ ɖe ta me nɛ, esi wòle kplɔ ŋuti.

⁸Ke esi nusrɔ̃lawo kpɔe la, eve dome na wo, eye wogblɔ bena: Nugbegblẽ sia gome ɖe?

⁹Elabena woate ŋu adzra ami sia ho gãe, eye woatsɔe ana ame dahewo.

¹⁰Ke esi Yesu dze sii la, egblɔ na wo bena: Nukaŋuti miele fu ɖem na nyɔnu la? Elabena ewo do nyui nam.

¹¹Elabena ame dahewo la woli kpli mi ɖaa, ke nye la nyemeli kpli mi ɖaa o.

¹²Elabena esi wòtsɔ ami sia ko ɖe nye ŋutilã dzi la, ewɔe hena nye ɖiɖi.

¹³Vavã mele egblɔm na mi bena: Afisi ke woaɖe gbe ƒã nyanyuie sia afia le le xexeme blibo la katã la, woagblɔ nusi nyanu sia wo la hã hena ŋkuɖoɖo edzi.

¹⁴Tete ame wuieveawo dometɔ ɖeka, si woyɔna bena Yuda Iskariot la, ta edzi yi ɖe nunɔlagãwo gbɔ gblɔ bena:

¹⁵Nuka mielɔ̃ be, mianam, ne made eyama asi na mia? Ke woawo la wona klosalo blaetɔ̃e.

¹⁶Eye tso ekema dzi la ele asinu dim, bena yeadee asi.

¹⁷Eye le abolo maʋamaʋã ƒe ŋkeke gbãtɔ dzi la nusrɔ̃lawo va Yesu gbɔ gblɔ bena: Afika dim nèle bena, míadzra ɖo na wò, ne naɖu ŋutitotolẽvi la le mahã?

¹⁸Egblɔ bena: Miyi ɖe dua me ɖe ame ma gbɔ, eye migblɔ nɛ be na: Nufiala la gblɔ bena: Nye azãgbe la le ɖoɖom, gbɔwò maɖu ŋutitotolẽvi la le kple nye nusrɔ̃lawo.

¹⁹Eye nusrɔ̃lawo wo, abe alesi Yesu ɖo na wo la ene eye wodzra ŋutitotolẽvi la ɖo.

²⁰Eye esi fiẽsi ɖo la, ena kplɔ̃ ŋuti kple ame wuieve la;

²¹eye esi wole nu ɖum la, egblɔ bena: Vavã mele egblɔm na mi bena: Mia dometɔ ɖeka adem asi.

²²Tete woxa nu ŋuta, eye wo dome amesiame de asi biabia me gblɔ bena: Aƒetɔ, nyee loo?

²³Ke eɖo ŋu gblɔ bena: Amesi ƒe asi le agba me dem kplim la, eya kee ladem asi.

²⁴Amegbetɔvi la le yiyim, abe alesi woŋlɔ ɖi le eŋuti ene; ke baba na nenem me, si lade Amegbetɔvi la asi! Enyo na nenem me la bena, womegaxae dzi o.

²⁵Eye Yuda, amesi fia eyome ma la, xɔ edzi gblɔ bena: Nyea, Rabi? Egblɔ nɛ bena: Wòe gblɔe.

²⁶Eye esi wole nua ɖum la, Yesu tsɔ abolo ɖe asi, eye esi wògblɔ akpedanya la, eŋe eme hetsɔ na nusrɔ̃lawo gblɔ bena: Mixɔe ɖu! Esia nye nye ŋutilã!

²⁷Eye wòtso kplu ɖe asi, eye esi wòda akpe le eta la, etsɔe na wo gblɔ bena: Mi katã mino le enu;

²⁸elabena esiae nye nye ʋu, si nye nubabla yeye la ta, si wokɔ ɖe anyi le ame geɖewo ŋuti hena nuvɔ̃keke la.

²⁹Ke mele egblɔm na mí bena: Tso esia dzi la nyemegale weinkutsetse sia me tsi no ge, vaseɖe ŋkeke ma dzi, esi mía kpli mi miano yeye le Fofonye ƒe fiaɖuƒe la me o.

³⁰Eye le akpedahadzidzi vɔ megbe la wodo go yi ɖe Amito la ŋu.

³¹Tete Yesu gblɔ na wo bena: Mi katã miele nuɖiaɖia kpɔ ge le ŋutinye le zã sia me; elabena woŋlɔ ɖi bena: „Mele alẽkplɔla ƒo ge, eye alẽha blibo la katã laka ahlẽ.“

³²Ke le nye tsitretsitsi megbe la madze mia ŋgɔ ayi Galilea.

³³Ke Petro xɔ dzi gblɔ nɛ bena: Ne wo katã woakpɔ nuɖiaɖia le ŋutiwò la, nye la nyemele ekpɔ ge gbeɖe o.

³⁴Yesu to ne bena: Vavã mele egblɔm na wò bena: Zã sia me ke, hafi koklo naku atɔ la, agbe nu le gbɔnye zi etɔ̃.

³⁵Petro gblɔ nɛ bena: Ne anɔ nam bena, maku kpli wò hã la, nyemele nu gbe ge le gbɔwò akpɔ o. Nenema ke nusiawo katã wogblɔ.

³⁶Tete woa kple Yesu wova teƒea ɖe, si woyɔna be Getsemane, eye wògblɔ na nusrɔ̃lawo bena: Mibɔbɔ nɔ afisia, vaseɖe esime mayi aɖado gbe ɖa le afime.

³⁷Eye wotsɔ Petro kple Zebedeo ƒe ŋutsuvi eveawo kpe ɖe eɖokui ŋuti, eye wòde asi nuxaxa me kple dzodzo me nyanyanya.

³⁸Tete wògblɔ na wo bena: Nye luʋɔ le nu xam kakaka vaseɖe ku me; minɔ afisia, eye minɔ ŋudzɔ kpakplim.

³⁹Eye esi wote yi ŋgɔ ʋee la, edze klo tsyɔ mo anyi hedo gbe ɖa gblɔ bena: Fofonye, ne ate ŋui la, na be, kplu sia nato ŋutinye ayi; gake la menye alesi nye ŋutɔ medi o, negbe alesi wòa nèdi ko.

⁴⁰Eye wova nusrɔ̃lawo gbɔ, eye wòkpɔ wo le alɔ me, eye wògblɔ na Petro bena: Ɖe miate ŋu anɔ ŋudzɔ kplim gaƒoƒo ɖeka oa?

⁴¹Minɔ ŋudzɔ, eye mido gbe ɖa, ne miagadze telekpɔ me o; gbɔgbɔ la le lɔlɔ̃m, gake ŋutilã la gbɔdzɔ.

⁴²Egayi zi evelia, eye wòdo gbe ɖa gblɔ bena: Fofonye, ne esia nu mate ŋu ayi o, wònye ɖeko manoe la, woawɔ wò lɔlɔ̃nu.

⁴³Eye esi wògava la, ekpɔ wo le alɔ̃ me, elabena woƒe ŋkuwo dzi wɔ dɔ.

⁴⁴Eye wògagblẽ wo ɖi hedzo yi be, yeado gbe ɖa zi etɔ̃lia, eye wògagblɔ nenem nya mawo ke.

⁴⁵Tete wòva nusrɔ̃lawo gbɔ, eye wògblɔ na wo bena: Miyi alɔ̃dɔdɔ dzi azɔ, eye migbɔ ɖe eme; mikpɔ ɖa, gaƒoƒo la ɖo vɔ, eye woade Amegbetɔvi la asi na nuvɔ̃wɔlawo.

⁴⁶Mitsi tre, mina midze! Kpɔ ɖa, amesi le yonyeme mɔ fiãm la gogo.

⁴⁷Eye esi wòbe, yeaɖe nu le eme kasia la, kpɔ ɖa, Yuda, ame wuieveawo dometɔ ɖeka la, va; do, eye ameha gãa ɖe le eyome kple yiwo kple kpowo tso nunɔlagã kple ɖumegãwo gbɔ.

⁴⁸Eye yomemɔfiala la ɖo dzesi ɖi na wo gblɔ bena: Amesi ƒe nu gbugbɔ ge mala la, eyae, ne mialée kpli.

⁴⁹Eye enumake wote ɖe Yesu, ŋu, eye wògblɔ bena. Rabi, fiẽ na wò loo! Eye wògbugbɔ nu nɛ.

⁵⁰Eye Yesu gblɔ nɛ bena: Xɔ̃, nukaŋuti neva ɖo? Tete wote ɖe: eŋuti, eye wotsɔ woƒe asiwo do Yesu dzi, eye wòlée kpli.

⁵¹Eye kpɔ ɖa, amesiwo li kple Yesu la, wo dometɔ ɖeka do eƒe asi ɖa, ɖi yi heda nunɔlagã ƒe dɔla, eye wòkpa to nɛ.

⁵²Tete Yesu gblɔ nɛ bena: Gbugbɔ wò yi la ɖo eteƒe; elabena amesiwo katã dia yi la, yi kee woatsɔ awu wòe.

⁵³Alo èsusu bena, nyemate ŋu aɖe kuku na Fofonye, eye wòatsɔ mawudɔlawo nam wòawu aʋakɔ wuieve o mahã?

⁵⁴Ke aleke awɔ ne woawu ŋɔŋlɔawo nu mahã? Elabena ele be, woava me nenema tsã!

⁵⁵Le gaƒoƒo ma dzi Yesu gblɔ na amehawo bena: Alesi wotsona ɖe hlɔ̃dola ŋuti la, nenemae mieva lé ye ge kple yiwo kple kpowo; gbãwotsyogbe mebɔbɔ nɔ anyi ɖe mawuƒe la me le nu fiãm, eye mielém kpɔ o.

⁵⁶Ke esiawo katã va me, bena woawu nyagblɔɖilawo ƒe ŋɔŋlɔawo nu. Tete la nusrɔ̃lawo katã gblẽe ɖi hesi.

⁵⁷Ke amesiwo lé Yesu la, kplɔe yi ɖe nunɔlagã Kayafa gbɔ, afisi agbalẽfialawo kple amegãwo kpe ta ɖo.

⁵⁸Ke Petro le eyome ʋĩ gbɔna vaseɖe nunɔlagã ƒe mɔ̃ la gbɔ, eye wòyi ɖe eme, eye wòbɔbɔ nɔ anyi ɖe dɔlawo gbɔ, bena yeakpɔ alesi woawu nui.

⁵⁹Ke nunɔlagãwo kple ʋɔnudrɔ̃lawo katã le aʋatsoɖaseɖiɖiwo dim ɖe Yesu ŋuti, bena yewoawui;

⁶⁰ke womekpɔ ɖeke o, eva wònye aʋatsoɖaseɖila geɖewo va hafi. Ke emegbe la aʋatsoɖaseɖila eve va gblɔ bena:

⁶¹Amesia gblɔ bena: Mate ŋu agba mawuxɔ la, eye magatui le ŋkeke etɔ̃agbe.

⁶²Eye nunɔlagã la tsi tre gblɔ nɛ bena: Mele nyaa ɖeke ŋu ɖo ge na amesiwo le ɖase ɖim le ŋutiwò o mahã?

⁶³Ke Yesu zi kpi. Eye nunɔlagã la xɔ edzi gblɔ nɛ bena: Meta Mawu gbagbe la na wò, be nagblɔe na mí nenye wòe nye Kristo, Mawuvi la!

⁶⁴Yesu gblɔ nɛ bena: Wòe gblɔe; gake la mele egblɔm na mi bena: Tso esia dzi miele Amegbetɔvi la kpo ge, wòabɔbɔ nɔ anyi de ŋusẽ ƒe nuɖusi me, ana dziƒo ƒe alilikpowo dzi gbɔna.

⁶⁵Tete nunɔlagã la dze eƒe awuwo gblɔ bena: Egblɔ busunya! Ɖaseɖila kawo gahiã mí? Kpɔ ɖa, azɔ miese busunya la;

⁶⁶nuka susum miele? Eye woɖo ŋu gblɔ bena: Edze ku.

⁶⁷Tete woɖe ta ɖe mo nɛ, wotu koe, eye amea ɖewo hã ƒo tome nɛ

⁶⁸le gbɔgblɔm bena: Kristo, amekae ƒo wò, gblɔe fia mi.

⁶⁹Ke Petro bɔbɔ nɔ anyi ɖe gota le akpata me, eye nyɔnudɔlaa ɖe va egbɔ gblɔ nɛ bena: Wò hã ènɔ Yesu, Galileatɔ la gbɔ kpɔ.

⁷⁰Gake esẽ nu le wo katã ƒe ŋku me gblɔ bena: Nyemenya nusi gblɔm nèle o.

⁷¹Ke esi wòto agboa nu do go la, nyɔnudɔla bubu hã kpɔe, eye wògblɔ na amesiwo le afima bena: Amesia nɔ anyi kple Yesu, Nazaretetɔ la kpɔ.

⁷²Eye wògasẽ nu kple atamkaka gblɔ bena: Nyemenya ame la o.

⁷³Eye esia megbe ʋee la amesiwo le tsitre ɖe afima la, va gblɔ na Petro bena: Nyateƒee, wò hã wo dometɔ ɖeka nènye; elabena wò nuƒoƒo le ha ɖem wò.

⁷⁴Tete la wòde asi fiƒoƒode kple atamkaka me bena: Nyemenya ame la o. Eye kasia koklo ku atɔ.

⁷⁵Eye Petro ɖo ŋku Yesu ƒe nya, si wògblɔ nɛ la dzi bena: Hafi koklo naku atɔ la, àgbe nu le gbɔnye zi etɔ̃. Eye wòdo go, eye wòfa avi vevie.