Read ewe Mateo 5 Bible Online

Mateo 5 - ewe bible

Mateo 5

¹Ke esi wòkpɔ ameha geɖe wo la, elia to la; eye esi wòbɔbɔ nɔ anyi la, eƒe nusrɔlawo te va egbɔ,

²eye wòke nu, fia nu wo gblɔ bena:

³Woayra amesiwo da ahe le gbɔgbɔ me la; elabena woawo tɔe nye dziƒofiaɖuƒe la.

⁴Woayra amesiwo le konyi fam la; elabena woawoe woafa akɔ na.

⁵Woayra amesiwo nye ame fafawo la; elabena woawoe anyi anyigba la ƒe dome.

⁶Woayra amesiwo dzɔdzɔenyenye ƒe dɔ kple tsikɔ le wo wum ta; elabena woawoe aɖi ƒo.

⁷Woayra amesiwo le nublanui kpam na amewo la: elabena woawoe woakpɔ nublanui na.

⁸Woayra amesiwo dza le woƒe dzi me la: elabena woawoe akpɔ Mawu.

⁹Woayra amesiwo léa avu la; elabena woayɔ wo be mawuviwo.

¹⁰Woayra amesiwo yome wotina le dzɔdzɔenyenye ŋuti la; elabena woawo tɔe nye dziƒofiaɖuƒe la.

¹¹Woayra mi, ne woadzu mi, eye woati mia yome, eye woaka aʋatso agblɔ nya vɔ̃ bubu ƒomeviwo katã ɖe mia ŋuti le tanye.

¹²Dzi nadzɔ mi, eye mitso aseye; elabena miaƒe fetu sɔ gbɔ le dziƒo; elabena nenema ke woti nyagblɔɖila, siwo dze mia ŋgɔ la yomee.

¹³Miawoe nye anyigba ƒe dze; ke ne dze bu eƒe vivi la, nuka tsɔ ge wòala ado vivi ne mahã? Tso esia dzi la meganyo na naneke o; ke boŋ woatsɔe aƒu gbe, bena amewo naɖo afɔ edzi.

¹⁴Miawoe nye xexeame ƒe kekeli Du, si le to dzi la, womate ŋu aɣlae o.

¹⁵Eye womesia akaɖi hã dana ɖe afianu te o, ke ɖe akaɖiti dzi boŋ, eye wòaklẽ na amesiwo katã le aƒea me.

¹⁶Nenema ke mina miaƒe kekeli naklẽ le amewo ƒe ŋku me, bena woakpɔ miaƒe nu nyui wɔwɔwo, eye woakafu mia Fofo, si le dziƒo.

¹⁷Migabu xa bena, meva se la alo nyagblɔlawo tu ge o. Nyemeva wo tu ge o, ke boŋ wo nu wu ge meva.

¹⁸Elabena vava mele egblɔm na mi bena: Vaseɖe esime dziƒo kple anyigba nu nava yi la, yota ɖeka alo ŋɔŋlɔdzesi ɖeka nu mele yiyi ge tso se la me, vaseɖe esime wo katã nava ve me o.

¹⁹Eyaŋuti amesi ke tu nenem se siawo dome suetɔ ɖeka, eye wòfia amewo nenema la, woayɔe be wo katã ƒe suetɔ le dziƒofiaɖuƒe la me; ke amesi ke wɔ edzi, eye wòfia amewo la, woayɔ eyama be gã le dziƒofiaɖuƒe la me.

²⁰Elabena mele egblɔm na mi bena: Ne miaƒe dzɔdzɔenyenye la maƒo agbalẽfialawo kple farisitɔwo tɔ ta sa o la, ekema miele yiyi ge ɖe dziƒofiaɖuƒe la me akpɔ o.

²¹Miese wogblɔ na blematɔwo bena: Megawu ame o; ke amesi ke awu ame la, adze ʋɔnudɔdrɔ̃.

²²Ke nye la mele egblɔm na mi bena: Amesiame, si le dɔmedzoe dom ɖe nɔvia ŋuti la, adze ʋɔnudɔdrɔ̃; eye amesi ke agblɔ na nɔvia bena takukutɔ la, adze daŋudede gã, eye amesi ke agblɔ bena lã la, adze dzomavɔʋemeyiyi.

²³Eyaŋuti ne etsɔ wò nunana va da ɖe vɔsamlekpuia dzi, eye nèɖo ŋui le afima bena, nyaa ɖe le nɔviwò ƒe dzi me ɖe ŋutiwò la,

²⁴gblẽ wò nunana la ɖe afima le vɔsamlekpuia ŋgɔ, eye nayi aɖadzra mia kple nɔviwò dome do gbãgbiagbã, hafi nava tsɔ wò nunana la vae.

²⁵Ŋkeke alesi nègale mɔ dzi kple wò ketɔ la, wɔ ɖeka kplii kaba bena, ne wò ketɔ nagava tsɔ wò ade asi na ʋɔnudrɔ̃la, eye vɔnudrɔ̃la nagatsɔ wò ade asi na atikplɔtɔ la, eye woade wò gaxɔ me o.

²⁶Vava mele egblɔm na wò bena: Màdo go le afima gbeɖe o, vaseɖe esime naxe agaga mlɔetɔ hafi.

²⁷Miese wogblɔ bena: Megawɔ ahasi o;

²⁸ke nye la mele egblɔm na mi bena: Amesiame, si ke kpɔ nyɔnua ɖe wòdzroe la, ewo ahasi kplii xoxo le eƒe dzi me.

²⁹Ke ne wò nuɖusi ŋku ɖia nu wò la, hoe le eme, eye natsɔe aƒu gbe, elabena enyo na wò be, wò ŋutinuwo dome ɖeka nagblẽ, wu esi woatsɔ wò ame blibo la katã aƒu gbe ɖe dzomavɔʋe la me.

³⁰Eye ne wò nuɖusi ɖia nu wò la, lae ɖa le ŋutiwò, eye natsɔe aƒu gbe, elabena enyo na wò be, wò ŋutinuwo dometɔ ɖeka nagblẽ, wu esi wò ame blibo la katã nagblẽ le dzomavɔʋe la me.

³¹Wogblɔ hã bena: Amesi aɖe asi le srɔ̃a ŋu la, nena kaklãgbalẽe;

³²ke nye la mele egblɔm na mi bena: Amesiame, si ke aɖe asi le srɔ̃a ŋu, eva menye le ahasiwɔwɔ ŋuti o la, eyae na wòwɔ ahasi; eye amesi ke aɖe nyɔnu, si ŋu wòɖe asi le la, ewɔ ahasi.

³³Miegase wogblɔ na blematɔwo bena: Megaka atam dzodzro o, ke nawɔ wò atamkaka dzi na Aƒetɔ la.

³⁴Ke nye la mele egblɔm na mi bena: Migata nu kura o, eɖanye dziƒo o, elabena Mawu ƒe zikpui wònye;

³⁵eɖanye anyigba o, elabena eƒe afɔɖodzinue; eɖanye Yerusalem o, elabena ɖia gã la ƒe ɖue.

³⁶Megatà wò ta hã o; elabena màte ŋu awɔ taɖa ɖeka ɣie alo yibɔ o.

³⁷Ke boŋ miaƒe nya nanye: Ẽ, ẽ; o, o; eye nusi ke wu esiawo la, etso vɔ̃ɖito la me.

³⁸Míese wogblɔ bena: Ŋku ɖe ŋku teƒe, eye aɖu ɖe aɖu teƒe;

³⁹ke nye la mele egblɔm na mi bena: Migatsi tre ɖe ame vɔ̃ɖi la ŋuti o; ke boŋ amesi ke ƒo wò nuɖusi tome la, nyẽ ekeme hã nɛ;

⁴⁰eye amesi le didim be, yeadrɔ̃ ʋɔnu kpli wò, bene yeaxɔ wò awu le asiwò la, na ne wòaxɔ avɔ hã le asiwò;

⁴¹eye amesi ke azi dzi wò be, nazɔ kplii gaƒoƒo ɖeka la, zɔ eve kplii.

⁴²Na nu amesi le nu biawòm, eye amesi le didim be, yeaɣe nu le asiwò la, megatrɔ dzo le egbe o.

⁴³Míese wogblɔ bena: Lɔ̃ hawòvi, eye nalé lu wò ketɔ:

⁴⁴ke nye la mele egblɔm na mi bena: Milɔ̃ miaƒe ketɔwo; miyra amesiwo ƒoa fi ɖea mi, miwo nyui na amesiwo léa mi ɖe ke me; mido gbe ɖa ɖe amesiwo ƒoa ɖi mi la ta; eye mido gbe ɖa ɖe amesiwo le mia yome tim la ta,

⁴⁵bena ne miazu mia Fofo, si le dziƒo la, ƒe viwo; elabena eyae nana eƒe ɣe dzena na ame vɔ̃ɖiwo kple ame nyuiwo, eye wònana tsi dzana na ame dzɔdzɔewo kple ame madzɔmadzɔwo.

⁴⁶Elabena ne mielɔ̃a amesiwo lɔ̃a mi la, fetu ka kpɔm miele mahã? Alo menye nudzɔlawo hã wɔa nenema ke o ɖe?

⁴⁷Eye ne miedoa gbe na mia nɔviwo ɖeɖe ko la, wɔwui ka wɔm miele? Alo menye xexemeviwo hã wɔa nenema ke o ɖe?

⁴⁸Eyaŋuti miawo hã mizu blibo, sigbe alesi mia Fofo, si le dziƒo la, le blibo ene.