Read ewe Marko 11 Bible Online

Marko 11 - ewe bible

Marko 11

¹Eye esi wogogo Yerusalem te ɖe Betfage kple Betania ŋu le Amito la ŋuti la, edo eƒe nusrɔ̃lawo dome ame eve;

²eye wògblɔ na wo bena: Miyi ɖe kɔƒe, si le mia ŋgɔ la me, eye enumake, ne míage ɖe eme la, míakpɔ tedzivi, si wode kae, esi dzi amea ɖeke menɔ kpɔ o; mitui, eye mikplɔe vɛ.

³Eye ne amea ɖe lagblɔ na mi bena: Nukaŋuti miele esia wɔm mahã la, migblɔ be: Aƒetɔ la le ehiãm, eye enumake aɖoe ɖe afisia.

⁴Tete wodzo yi, eye wokpɔ tedzivi la, wode kae ɖe agbo la nu le xexe le mɔ to, eye wotui.

⁵Eye amesiwo le tsitre ɖe afima la, dometɔa ɖewo bia wo bena: Nuka wɔ, eye miele tedzivi la tum mahã?

⁶Eye wogblɔ na wo, abe alesi Yesu gblɔ la ene; eye woɖe mɔ le eŋu na wo.

⁷Tete wokplɔ tedzivi la va Yesu gbɔ, eye wotsɔ woƒe avɔwo ɖo edzi; eye wòbɔbɔ nɔ edzi.

⁸Eye ame geɖewo keke woƒe avɔwo ɖe mɔ la dzi, ke bubuwo ya gbewo tso agblewo me.

⁹Eye amesiwo le eŋgɔ kple esiwo le eyome la, do ɣli gblɔ bena: Hosana! Woayra amesi gbɔna le Aƒetɔ la ƒe ŋkɔa me.

¹⁰Woayra mía fofo Dawid ƒe fiaɖuƒe, si gbɔna la! Hosana le dziƒo ʋĩ!

¹¹Eye wòyi Yerusalem ɖe mawuƒe la me, eye esi wòtsa ŋku nuwo katã godoo, eye fiẽsi le ɖoɖom la, eyi ɖe Betania kple ame wuieve la.

¹²Eye esi ŋu ke wodo go tso Betania la, dɔ wui.

¹³Eye esi wòkpɔ gbotia ɖe le adzɔge, si dzi aŋgbawo le la, eyi bena ɖewohĩ yeakpɔ nane le edzi; eye esi wote ɖe eŋu la, mekpɔ naneke o, negbe aŋgbawo ko, elabena gbotiwo tseɣi meɖo haɖe o.

¹⁴Eye wòde asi gbɔgblɔ me nɛ bena; Tso esia dzi yina la amea ɖeke maɖu wò kutsetsea ɖeke o halase tegbetegbe. Eye eƒe nusiawo see.

¹⁵Eye wova Yerusalem; eye esi wòyi ɖe mawuƒe la me la, ede asi amesiwo le nu dzram kple amesiwo le nu ƒlem le mawuƒe la me la, nyanyã me do goe, eye wòmũ gaɖuɖɔlawo ƒe kplɔ̃wo kple amesiwo le ahɔ̃newo dzram la, ƒe zikpuiwo ƒu anyi.

¹⁶Eye meɖe mɔ bena, amea ɖeke netso goe ato mawuƒe la me o.

¹⁷Eye wòfia nu gblɔ na wo bena: Alo womeŋlɔ ɖi bena: Woayɔ nye aƒe la be gbedoxɔ na dukɔwo katã oa? Ke miawo la mietsɔe wɔ adzodalawo ƒe ɖoe.

¹⁸Eye nunɔlagãwo kple agbalẽfialawo see, eye wodi, alesi woawɔ awui, elabena wovɔ̃e; elabena kuvia ɖo ameha blibo la katã le eƒe nufiafia la ŋuti.

¹⁹Eye ne fiẽsi ɖo la, edoa go le dua me.

²⁰Eye esi wòva yina le ŋdi me la, wokpɔ gboti la yrɔ su tso keke eƒe ke te.

²¹Eye Petro ɖo ŋku edzi gblɔ nɛ bena: Rabi, kpɔ ɖa, gboti, si neƒo fi ɖee la yrɔ.

²²Eye Yesu xa dzi gblɔ na wo bena: Mawu dzi xɔse nenɔ mia si!

²³Vavã mele egblɔm na mi bena: Amesi ke lagblɔ na to sia bena: Ho, ne nayi aɖadze ƒu me, eye mekea ɖi le eƒe dzi me o, hafi boŋ wòxɔnɛ sena bena, nusi gblɔm yele, le eme va ge la, ava ve me ne.

²⁴Eyaŋuti mele egblɔm na mí bena: Nusianu, si ke ta míado gbe ɖa le, eye míabia la, mixɔe se bena, asu mia si, eye ava ve me na mi.

²⁵Eye ne miele tsitre le gbe ɖom ɖa, eye nyaa ɖe le miaƒe dzi me ɖe amea ɖe ŋu la, mitsɔe kee, bena mia Fofo, si le dziƒowo la, natsɔ miaƒe vodadawo hã ake mi.

²⁶Ke ne mietsɔe ke o la, ekema mia Fofo, si le dziƒowo la, matsɔ miaƒe vodadawo hã ake mi o.

²⁷Eye wogava Yerusalem; eye esi wòle tsatsam le mawuƒe la me la, nunɔlagãwo kple agbalẽfialawo kple dumegãwo va egbɔ;

²⁸eye wogblɔ nɛ bena: Ŋusẽ ka nètso wɔ esiawoe; alo ameka tsɔ ŋusẽ sia na wò be, nawɔ esiawoe mahã?

²⁹Eye Yesu gblɔ na wo bena: Nye hã mabia nya ɖeka mi, ne mieɖo eŋu nam la, nye hã magblɔ ŋusẽ, si metsɔ wɔ esiawoe la, na mi.

³⁰Yohanes ƒe mawutsidedetaname la ɖe, dziƒo wòtso loo, alo amewo gbɔ wòtso mahã? Miɖo eŋu nam!

³¹Eye wòke ɖi le wo nɔewo dome bena: Ne míegblɔ bena: Dziƒo wòtso la, agble bena: Nukaŋuti miexɔ edzi se o mahã?

³²Alo ɖe miagblɔ bena: Amewo gbɔ wotsoa? — Woyɔ dukɔ la; elabena ameawo katã bua Yohanes bena, nyagblɔɖila ŋutɔŋutɔ wònye.

³³Eye woxɔ edzi gblɔ na Yesu bena: Míenyae o. Eye Yesu gblɔ na wo bena: Ekema nye hã nyemagblɔ ŋusẽ, si metsɔ wɔ esiawoe la, na mi o.