Read ewe Marko 9 Bible Online

Marko 9 - ewe bible

Marko 9

¹Eye wògblɔ na wo bena: Vavã mele egblɔm na mi bena: Amea ɖewo le amesiwo le tsitre le afisia la dome, siwo mele ku ɖɔ ge akpɔ o, vaseɖe esime woakpɔ Mawu ƒe fiaɖuƒe la wògbɔna kple ŋusẽ.

²Ŋkeke ade megbe la Yesu ɖe Petro, Yakobo kple Yohanes kpe ɖe eɖokui ŋuti, eye wòkplɔ wo yi to kɔkɔa ɖe dzi, woawo ɖeɖe; eye eƒe nɔnɔme trɔ le woƒe ŋku me,

³eye eƒe awuwo trɔ le dzo dam hefu tititi, eye nunyãlaa ɖeke mele anyigba dzi ate ŋu awɔ wo woafu alea o.

⁴Eye Eliya kple Mose woɖe wo ɖokui fia wo, eye wole nu ƒom kple Yesu.

⁵Eye Petro xa edzi gblɔ na Yesu bena: Rabi, enyo na mi bena, miano afisia, eye miawo agbadɔ etɔ̃, tɔwò ɖeka, Mose to ɖeka kple Eliya to ɖeka.

⁶Elabena menya nusi wòagblɔ o, elabena wovɔ̃ ŋutɔ.

⁷Eye alilikpo va do vɔvɔli ɖe wo dzi, eye gbe tso alilikpo la me gblɔ bena: „Amesia enye vinye, si nyemelɔ̃a nu egbɔ o, miɖo to eyama!“

⁸Eye enumake, esi wole ŋku tsam godoo la, womegakpɔ amea ɖeke o, negbe Yesu ɖeka koe le wo gbɔ.

⁹Eye esi wole ɖiɖim tso to la dzi la, Yesu de se na wo bena, woagagblɔ nusiwo wokpɔ la, na amea ɖeke o, negbe ne Amegbetɔvi la tsi tre tso ame kukuwo dome ko.

¹⁰Eye wodzra nya la ɖo, eye wobia le wo nɔewo dome bena: Nukae nye tsitretsitsi tso ame kukuwo dome la mahã?

¹¹Eye wobiae gblɔ bena: Aleke wòle be, farisitɔwo kple agbalẽfialawo gblɔ bena: Ele na Eliya be, wòava gbãgbiagbã mahã?

¹²Ke egblɔ na wo bena: Eliya gbɔna gbãgbiagbã, eye wòaɖo nuwo katã ɖo; eye aleke woŋlɔ ɖi le Amegbetɔvi la ŋuti bena, akpe fu geɖe, eye woado vloe mahã?

¹³Gake mele egblɔm na mi bena: Eliya va xoxo, eye wowɔ nusi wolɔ̃ la, ɖe eŋuti, abe alesi woŋlɔ ɖi le eŋuti ene.

¹⁴Eye esi wòva nusrɔ̃lawo gbɔ la, ekpɔ ameha gãa ɖe ƒo xlã wo, eye agbalẽfialawo le nu sẽm kpli wo.

¹⁵Eye enumake, esi ameha la katã kpɔe la, dzidzi ƒo wo ŋuta, eye wosi du yi egbɔ hedo gbe nɛ.

¹⁶Eye wòbia wo bena: Nuka miele nu sẽm kpli wo?

¹⁷Eye lãme ɖeka tso ameha la dome ɖo eŋu nɛ bena: Nufiala, mekplɔ vinyeŋutsuvi, si me gbɔgbɔ maƒonu le la, va gbɔwò;

¹⁸eye afisi ke wòlée le la, enyamanɛ, eye futukpɔ dona le enu, eye woɖua aɖukli, eye wòɖia ku; megblɔ na wò nusrɔ̃lawo bena, woanyãe ado goe, eye womete ŋui o.

¹⁹Eye wòdo eŋu na wo gblɔ bena: O, dzidzime maxɔse! Ɣekaɣi mana anyi kpli mi ase ɖo? Eye ɣekaɣi mado dzi ahe mi ase do mahã? Mikplɔe va gbɔnye!

²⁰Eye wokplɔe va egbɔ; esi wòkpɔe la, enumake gbɔgbɔ la nyamae, eye wòtsyɔ kplo hele dablibɛ ƒom le futukpɔ ɖem.

²¹Eye wòbia fofoa bena: Ɣekaɣi nusia va edzi mahã? Eye wòbena: Tso keke eƒe ɖevime kee.

²²Eye enuenu wòtsɔnɛ ƒua dzo me kple to me, bena yeawui; ke ne ate ŋu awɔ nane la, kpɔ miaƒe nublanui, ne naxa na mi.

²³Eye Yesu gblɔ nɛ bena: Ne ate ŋui! Amesi xɔe se la, ate ŋu awɔ nusianu.

²⁴Enumake ɖevia fofo do ɣli gblɔ bena: Mexɔe se, xɔ na nye maxɔse la!

²⁵Ke esi Yesu kpɔ bena, ameha la le ɖu ƒum gbɔna la, ewo ɖe gbɔgbɔ makɔmakɔ la ta gblɔ bena: Wò gbɔgbɔ maƒonu kple tokunɔ, mede se na wò, do go le eme, eye tso esia dzi la megayi ɖe eme o!

²⁶Eye wòdo go kple ɣlidodo hele enyamam ŋutɔ, eye wòzu abe ɖe woku ene; ale bena ame geɖewo gblɔ bena: Eku.

²⁷Ke Yesu lé eƒe alɔnu hekɔe ɖe dzi, eye wòtsi tre.

²⁸Eye esi wòva aƒea me la, eƒe nusrɔ̃lawo ɖeɖe va egbɔ biae bena: Aleke wɔ míawo miete ŋu nyae do go o mahã?

²⁹Eye wògblɔ na wo bena: Esia ƒomevi la mate ŋu ado go to naneke me o, negbe to gbedodoɖa kple nutsitsidɔ me ko.

³⁰Eye esi wodze le afima la, wotso Galilea me yi, eye melɔ̃ bena, amea ɖeke nanya ye o.

³¹Elabena efia nu eƒe nusrɔ̃lawo, eye wògblɔ na wo bena: Woade Amegbetɔvi la asi na amewo, eye woawui, eye ne wowui la, agatsi tre le ŋkeke etɔ̃agbe.

³²Ke woawo la womese nya sia gɔme o, eye wova le ebiabia ŋuti.

³³Eye wòva Kapernaum. Esi wòva aƒe me la, ebia wo bena: Nuka miele ɖi kem le mia nɔewo dome le mɔ dzi mahã?

³⁴Ke wozi kpi; elabena wole nya ʋlim le wo nɔewo dome le mɔ dzi bena: Amekae nye gãtɔ mahã?

³⁵Eye esi wòbɔbɔ na anyi la, eya ame wuieveawo, eye wògblɔ na wo bena: Ne amea ɖe ɖi bena, yeanye gbãtɔ la, nanye wo katã ƒe mlɔetɔ kple wo katã ƒe subɔla.

³⁶Eye wotsa ɖevi suea ɖe ɖo wo titina, eye wòlée ɖe eƒe akɔnu gblɔ na wo bena:

³⁷Amesi ke laxɔ ɖevi siawo dometɔ ɖeka le nye ŋkɔ dzi la, nyee wòxɔ, eye amesi ke laxɔm la, menye nye wòxɔ o, ke boŋ amesi dom lae.

³⁸Yohanes gblɔ ne bena: Nufiala, miekpɔ amea ɖe, si le gbɔgbɔ vɔ̃wo nyãm le go dom le wò ŋkɔ la dzi, eye miegbe nɛ, elabena mele mía yome o.

³⁹Eye Yesu gblɔ bena: Migagbe ne o! Elabena amea ɖeke meli, si awɔ ŋusẽdɔ le nye ŋkɔ la dzi, eye wòate ŋu agble nya vɔ̃ enumake ɖe ŋunye o.

⁴⁰Elabena amesi ke meto vo ɖe mia ŋuti o la, eya le mía dzi.

⁴¹Elabena amesi ke ana tsi kplu ɖeka mi be, miano le nye ŋkɔ me, esi wònye Kristo tɔ míenye ŋuti la, vava mele egblɔm na mi bena: Eƒe fetu la mele eŋu tsi ge o.

⁴²Ke amesi ke laɖia ɖevi sue, siwo xɔa dzinye sena, dometɔ ɖeka nu la, enyo nɛ wu bena, woatso té atsi ɖe ka ne, eye woatsɔe aƒu gbe ɖe ƒu me.

⁴³Eye ne wò asi ɖia nu wò la, lae ɖa; enyo na wò bena, nayi ɖe agbe la me kple asikpo, wu esi asi eve nanɔe na wò, eye nayi ɖe dzomavɔʋe la me,

⁴⁴afisi woƒe nyẽ mekuna le o, eye dzo la hã metsina le o.

⁴⁵Ke ne wò afɔ ɖia nu wò la, lae ɖa; enyo na wò be, nayi ɖe agbe la me kple afɔkpo, wu esi afa eve nanɔe na wò, eye woatsɔ wò aƒu gbe ɖe dzomavɔʋe la me,

⁴⁶afisi woƒe nyẽ mekuna le o, eye dzo la hã metsina le o.

⁴⁷Eye ne wò ŋku ɖia nu wò la, hoe le eme; enyo na wò bena, nayi ɖe mawufiaɖuƒe la me kple ŋku ɖeka, wu esi ŋku eve nanɔe na wò, eye woatsɔ wò aƒu gbe ɖe dzomavɔʋe la me,

⁴⁸afisi woƒe nyẽ mekuna le o, eye dzo la hã metsina le o.

⁴⁹Elabena amesiame la woatso dzo ade dzee, eye vɔsasa sia vɔsasa la woatso dze adee.

⁵⁰Dze la nu nyui wònye; ke ne dze bu eƒe vivi la, nuka tsɔ ge míala ado vivii mahã? Mina dze naɖo mi, eye ŋutifafa nanɔ mia dome.