Read ewe Luka 11 Bible Online

Luka 11 - ewe bible

Luka 11

¹Eye wòva ve me bena, esi wòle gbe ɖom ɖa le teƒea ɖe, eye wòdzudzɔ la, eƒe nusrɔ̃lawo dometɔ ɖeka gblɔ nɛ bena: Aƒetɔ, fia gbedodoɖa mi, abe alesi Yohanes fia eƒe nusrɔ̃lawo ene.

²Eye wògblɔ bena: Ne miele gbe dom ɖa la, migblɔ bena: Mía Fofo, si le dziƒowo, wò ŋkɔ ŋuti nakɔ! Wò fiaɖuƒe nava! Woawɔ wò lɔlɔ̃nu le anyigba dzi, sigbe alesi wowɔna le dziƒo ene!

³Na miaƒe abolo, si asu mia nu gbesiagbe la mi!

⁴Eye tsɔ miaƒe nuvɔ̃wo ke mí; elabena mía ŋutɔwo hã mietsɔnɛ kea amesiame, si nyia fe le mia si! Eye megalala mí yi ɖe tetekpɔa me o, ke ɖe mí tso vɔ̃ɖitɔ la si me!

⁵Eye wògblɔ na wo bena; Mia dometɔ ka si xɔlɔ̃ anɔ, eye wòayi egbɔ le zãtitina, eye wòagblɔ na bena; Xɔ̃, do abolo etɔ̃ nam;

⁶elabena xɔ̃nyea ɖe tso mo dzi va gbɔnye, ke naneke mele asinye maɖo ekɔme o;

⁷eye ɖe ame ma aɖo eŋu nɛ le xɔa me agblɔ bena: Megaɖe fu nam o; ʋɔ la le tutu xoxo, eye vinyewo le aba dzi kplim, nyemate ŋu afɔ ana wò o mahã?

⁸Mele egblɔm na mi bena: Ne mefa, eye wònae le xɔlɔ̃, si wònye nɛ ta o la, ekema le fu, si ɖem wòle nɛ ta la ato, eye wòanae alesi nu dim wòle.

⁹Eye nye la mele egblɔm na mi bena: Mibia nu, eye woana mi; midi nu, eye miakpɔ; miƒo ʋɔa, eye woaʋui na mi.

¹⁰Elabena amesiame, si le nu biam la, exɔna: eye amesi le nu dim la, ekpɔna; eye amesi le ʋɔa ƒom la, woʋunɛ nɛ.

¹¹Ke fofo ka le mia dome, si via abia aboloe, eye wòana kpee, alo tɔmelã, eye wòana dae de tomelã teƒe mahã?

¹²Alo ne abia koklozi la, wòana dziɖegbee mahã?

¹³Azɔ mí, amesiwo nye ame vɔ̃ɖiwo, mienya alesi miana nunana nyui mia viwo, ʋuu keke Fofo, si le dziƒo la, mana Gbɔgbɔ kɔkɔe amesiwo bianɛ la o mahã? Yesu he nya ɖe farisitɔ, siwo di bena, yewoado vloe bebia dzesi tso dziƒo la ŋuti.

¹⁴Eye wòle gbɔgbɔ vɔ̃ maƒo nu nyãm. Eye wòva ve me, esi gbɔgbɔ vɔ̃ la do go la, ame maƒonu la ƒo nu, eye amehawo ƒe mo wɔ yaa.

¹⁵Ke wo dometɔa ɖewo gblɔ bena: Enyã gbɔgbɔ vɔ̃wo do go to Beelzebul, si nye gbɔgbɔ vɔ̃wo ƒe fia la dzi.

¹⁶Eye bubuwo le etem kpɔ hele dzesi dim tso egbɔ tso dziƒo.

¹⁷Ke esi wonyã woƒe tamesusuwo la, egblɔ na wo bena: Fiaɖuƒe sia fiaɖuƒe, si ma ɖe ye ŋutɔ ɖokui ŋuti la, ezu aƒedo, eye xɔ mũ dze xɔ dzi.

¹⁸Eye ne Satana hã ma ɖe ye ŋutɔ ŋuti la, aleke eƒe fiaɖuƒe la anɔ anyii mahã? Elabena miegblɔ bena, menya gbɔgbɔ vɔ̃wo ɖo goe to Beelzebul dzi.

¹⁹Eye nye la, ne menya gbɔgbɔ vɔ̃wo ɖo goe to Beelzebul dzi la, ekema mia viwo la, ameka dzie woto nyã wo do goe mahã? Le esia ta woawo azu miaƒe ʋɔnudrɔ̃lawo.

²⁰Ke ne menya gbɔgbɔ vɔ̃wo do go to Mawu ƒe asibide dzi la, ekema mawufiaɖuƒe la ɖi ɖe mi.

²¹Ne ŋusẽtɔ la ɖo aʋawɔnuwo me hele eƒe mɔ̃ ŋuti dzɔm la, eƒe nuwo nɔa dedie;

²²ke ne ŋusẽtɔ wu eya va dze edzi, eye woɖu edzi la, atsɔ eƒe aʋawɔnu blibo, si ŋu wòle dzi ɖom ɖo la, le egbɔ, eye wòamã eƒe aboyonuwo me.

²³Amesi ke mele dzinye o la, eya tsi tre ɖe ŋunye; eye amesi ke meƒoa ƒu kplim o la, ekana hlẽna.

²⁴Esi gbɔgbɔ bliba la do go le ame la me la, eyi ɖato ƒuƒuiƒewo le dzudzɔ dim: eye esi mekpɔe o la, egblɔ bena: Magbugbɔ ayi ɖe aƒe, si me metso va la me.

²⁵Eye esi wòva la, ekpɔe wòle kpɔkplɔ, eye woɖo atsyɔ̃ nɛ.

²⁶Tete la wòdzo heyi ɖatsɔ gbɔgbɔ bubu adre, siwo vɔ̃ɖi wu ye ŋutɔ hekpe ɖe eɖokui ŋuti, eye woyi ɖe eme, eye wonɔ afima, eye amesia ƒe anyinɔnɔ mlɔetɔ va vɔ̃ɖi wu gbãtɔ.

²⁷Eye wòva ve me, esi wògblɔ nusiawo la, nyɔnua ɖe kɔ eƒe gbe dzi le ameha la dome gblɔ nɛ bena: Woayra dɔ, si me nènɔ, kple no, si nènɔ.

²⁸Ke eya gblɔ bena: Ẽ, Woayra amesiwo le mawunya la sem, eye wole edzi wɔm la boŋ.

²⁹Eye esi amehawo le ƒu ƒom ɖe egbɔ la, ede asi gbɔgblɔ me bena: Dzidzime sia enye dzidzime vɔ̃ɖi; ele dzesi ɖim, eye womele dzesia ɖeke na gee o, negbe Yona ƒe dzesi la ko.

³⁰Elabena sigbe alesi Yona zu dzesi na Niniwe-tɔwo la, nenema ke Amegbetɔvi la hã lanyee na dzidzime sia.

³¹Dziehe-fianyɔnu la atsi tre le ʋɔnudɔdrɔ̃ la me kple dzidzime sia ƒe ŋutsuwo, eye wòabu fɔ wo; elabena etso anyigba seƒe ke va Salomo ƒe nunya se ge; eye kpɔ ɖa, amesi wu Salomo, le afisi!

³²Niniwe-ŋutsuwo atsi tre le ʋɔnudɔdrɔ̃ la me kple dzidzime sia, eye woabu fɔe; elabena wotrɔ le woƒe dzi me le Yona ƒe gbeƒãɖeɖe nu, eye kpɔ ɖa, amesi wu Yona, le afisi!

³³Eye amea ɖeke mesia akaɖi dana ɖe ɣaɣlaƒe alo afianu te o, ke ɖe akaɖiti dzi boŋ, bena amesiwo le yiyim ɖe eme la, nakpɔ kekeli.

³⁴Ŋutilã ƒe akaɖi enye wò ŋku; ne wò ŋku dzi dza la, wò ame blibo la katã hã me lakɔ; ke ne evɔ̃ɖi la, wò ame blibo la katã hã me lado viviti.

³⁵Eyaŋuti kpɔ nyuie, bena kekeli, si le mewò la, naganye viviti o.

³⁶Azɔ, ne wò ŋutilã blibo la me klẽ, eye afia ɖeke medo viviti o la, eme; blibo la katã laklẽ, abe alesi akaɖi kple eƒe keklẽ klẽna na wò ene.

³⁷Eye esi wòle nu ƒom la, farisitɔa ɖe de kuku nɛ be, wòava ɖu nu le ye gbɔ, eye esi wòyi ɖe eme la, ebɔbɔ nɔ anyi.

³⁸Ke esi farisitɔ la kpɔe la, eƒe mo wɔ yaa bena, mele tsi gbã, hafi le nua ɖu ge o.

³⁹Eye Aƒetɔ la gblɔ nɛ bena: Mi egbe farisitɔwo, mieklɔa kplu kple agba ŋuti, ke mia me yɔ fũ kple adzodada kple vɔ̃ɖinyenye.

⁴⁰Mi movitɔwo! Alo ɖe menye amesi wɔ eŋuti la, wɔ eme hã o mahã?

⁴¹Gake mietsɔ nusiwo le eme la, wɔ nunana na ame dahewo, eye kpɔ ɖa, nuwo katã le dzadze na mi.

⁴²Ke baba na mi farisitɔwo! Elabena mienaa ahamee kple ƒãglo kpakple ama bubu ƒomeviwo katã ƒe ewolia, eye mietoa ʋɔnudɔdrɔ̃ kple Mawu ƒe lɔlɔ̃ ŋuti; ke esiawo le be, miawo, eye miagagblẽ ekeme hã ɖi mawɔmawɔ o.

⁴³Baba na mi farisitɔwo! Elabena mielɔ̃a nɔƒe gbãtɔwo nanɔ le ƒuƒoƒewo, kple gbedonamewo le ablɔwo me.

⁴⁴Baba na mi! Elabena miele abe yɔdo, siwo mele dzedzem o ene, eye amesiwo le wo dzi zɔm la, womenyɛ o.

⁴⁵Ke sefialawo dometɔ ɖeka: xɔ dzi gblɔ nɛ bena: Nufiala, esi nègblɔ esiawo la, èdzu miawo hã.

⁴⁶Eye wògblɔ bena: Baba na mi sefialawo hã! Elabena mietsɔa agba kpekpe, siwo wu tsɔtsɔ la, ɖoa amewo dzi, eye mia ŋutɔwo la mietsɔa miaƒe asibide ɖeka ka agbawo ŋu o.

⁴⁷Baba na mi! Elabena mieɖɔa nyagblɔɖilawo ƒe yɔdowo ɖo, ke mia fofowoe wui wo.

⁴⁸Ale míenye ɖaseɖilawo, eye miefiaa kpɔɖeŋu be, mia fofowo ƒe nuwɔwɔ la nyo mia ŋu; elabena woawoe wu wo, ke miawoe ɖoa woƒe yɔdowo ɖo.

⁴⁹Le esia ta hã Mawu ƒe nunya gblɔ bena: Madɔ nyagblɔɖilawo kple apostolowo aɖo ɖe wo gbɔ, eye woawu wo dome ɖewo, eye woati wo yome,

⁵⁰bena woabia nyagblɔɖila, siwo katã ƒe ʋu woda, ahe tso xexeme ƒe gɔmedzedze ta, atso dzidime sia si me

⁵¹tso Abel ƒe ʋu dzi vaseɖe Zaxarya, amesi wowu le vɔsamlekpui kple xɔ la domee la, ƒe ʋu la dzi. Ẽ, mele egblɔm na mi bena: Woabiae atso dzidzime sia si me.

⁵²Baba na mi sefialawo! Elabena mietsɔ nunya ƒe safui la dzoe, mia ŋutɔwo mieyi ɖe eme o, eye amesiwo le yiyim ɖe eme la, miexe mɔ na wo.

⁵³Eye esi wòdo go tso afima la, agbalẽfialawo kple farisitɔwo lée ɖe do me vevie ŋutɔ, eye wole aɖe dem nu me nɛ le nu geɖewo ŋuti,

⁵⁴hele eŋu dzɔm, be woadi nyaa ɖe atso eƒe nu me.