Read ewe Luka 13 Bible Online

Luka 13 - ewe bible

Luka 13

¹Ke le ɣemaɣi me la amea ɖewo le afima, siwo ka Galileatɔ, siwo ƒe ʋu Pilato tɔtɔ kple woƒe numemewo la, ŋutinya ta nɛ.

²Eye wòxɔ dzi gblɔ na wo bena: Ɖe miesusu bena, Galileatɔ siawo nye nuvɔ̃wɔlawo wu Galileatɔwo katã, elabena wokpe fu siawo mahã?

³Gbeɖe, ke boŋ mele egblɔm na mi bena: Ne mietrɔ le miaƒe dzi me o la, mi katã miatsrɔ̃ nenema ke.

⁴Alo ame wuienyi ma, siwo dzi Siloamɔ̃ mu dze, eye wowu wo la, ɖe miesusu bena, woawoe nye tenyilawo wu amesiwo katã no Yerusalem mahã?

⁵Gbeɖe, ke boŋ mele egblɔm na mi bena: Ne mietrɔ le miaƒe dzi me o la, mi katã miatsrɔ̃ nenema ke.

⁶Eye wòdo lo sia bena: Amea ɖe do gboti ɖe eƒe weingble me, eye wòva ɖi kutsetsewo le edzi, eye mekpe ɖeke o.

⁷Eye wògblɔ na agbledela bena: Kpɔ ɖa, ƒe etɔ̃ sɔŋ mele vavam le kutsetse dim le gboti sia dzi, eye nyemekpɔ ɖeke o: lae ƒu anyi, nukaŋuti woxe mo na anyigba la mahã?

⁸Eye wòxɔ edzi gblo nɛ bena: Aƒetɔ, na wòanɔ anyi ƒe sia hã, vaseɖe esime maɖe ɖo aƒo xlãe, eye maku aɖu ɖe eŋu;

⁹ɖewohĩ ava tse ku; ke ne mele nenema o la, nalãe aƒu anyi.

¹⁰Eye wòle nu fiãm le ƒuƒoƒeawo dometɔ ɖeka me le Sabat dzi.

¹¹Eye kpɔ ɖa, nyɔnua ɖe, si me dɔléamegbɔgbɔa de le ƒe wuienyi, eye wòxa godã, eye metea ŋu koa eɖokui de dzi kulẽ o la, le afima.

¹²Eye esi Yesu kpoe la, eyae va egbe, eye wògblɔ ne bena: Nyɔnu, wotu wò tso wò dɔléle la me!

¹³Tete wòtsɔ eƒe asiwò do edzi, eye wòdzo enumake, eye wòkafu Mawu.

¹⁴Ke ƒuƒoƒemegã, si dome ve le Yesu ƒe gbedada le Sabat dzi ŋuti la, xɔ dzi gblɔ na ameha la bena: Ŋkeke aɖee li, siwo dze be, amewo nawɔ dɔ le me: eyaŋuti le woawo me la miva, be woada gbe le mia ŋu, ke menye le Sabat ƒe ŋkeke la dzi o.

¹⁵Tete Aƒetɔ la xɔ dzi gblo ne bena: Alakpatɔwo! Ɖe mia dome amesiame metua eƒe nyi alo tedzi le lãnuɖunu la ŋuti le Sabat dzi, be wòakplɔe ayi tsinoƒe o mahã?

¹⁶Ke Abraham ƒe vinyɔnu sia, si Satana bla, kpɔ ɖa, ƒe wuienyi sɔŋ la, ɖe medze be, woatui le babla sia me le Sabat ŋkeke dzi o mahã?

¹⁷Eye esi wògblɔ esiawo la, ŋukpe lé eƒe adikãtɔwo katã, eye ameha la katã kpɔ dzidzɔ le ŋutikɔkɔedɔ, siwo katã wòwɔ la ŋuti.

¹⁸Eye wògblɔ bena: Nuka mawufiaɖuƒe la ɖi, eye nuka ŋu matsɔe aɖo mahã?

¹⁹Eɖi logoku, si amea ɖe tso ƒã ɖe eƒe abɔ me, eye wòtsi zu ati, eye dziƒoxeviwo va wɔ atɔ ɖe eƒe siawo me.

²⁰Eye wògagblɔ bena: Nuka ŋu matso mawufiaɖuƒe la aɖoe mahã?

²¹Eɖi amɔwɔ ʋaʋã, si nyɔnua ɖe tso de amɔwɔ dzidzenu etɔ̃ me, vaseɖe esime wo katã ʋã.

²²Eye wòyi ɖato duwo kple kɔƒewo me hele nu fiãm, eye wòle mɔ zɔm yina Yerusalem.

²³Eye amea ɖe gblɔ nɛ bena: Aƒetɔ, ame ʋeea ɖewo koe akpɔ ɖeɖe mahã? Eye wògblɔ na wo bena:

²⁴Miʋli be, miayi ɖe agbo bii la me, elabena mele egblɔm na mi bena: Ame geɖewo ladi be, wòayi ɖe eme, eye womate ŋui o.

²⁵Tso esia dzi, ne aƒetɔ la tsi tre, eye wòtu ʋɔa, eye ne míetsi tre ɖe egodo, de asi ʋɔtrua ƒoƒo me gblɔ bena: Aƒetɔ, Aƒetɔ, nui na mí la, axɔ dzi agblɔ na mi bena: Nyemenya mi, afisi mietso o,

²⁶ekema miade asi gbɔgblɔ me bena: Mieɖu nu, eye mieno nu le ŋkuwò me, eye nèfia nu le míaƒe ablɔwo me.

²⁷Eye wòagblɔ bena: Mele egblɔm na mi bena: Nyemenya mi, afisi mietso o; mite ɖa le gbɔnye, mi nu madzɔmadzɔ wɔlawo katã!

²⁸Afima avifafa kple aɖukliɖuɖu lanɔ, ne miakpɔ Abraham kple Isak kple Yakob kple nyagblɔɖilawo katã le mawufiaɖuƒe la me, ke wotsɔ miawo ya ƒu gbe ɖe egodo.

²⁹Eye woatso ɣedzeƒe kple ɣetoɖoƒe kple anyiehe kple dziehe ava, eye woanɔ kplɔ̃ ŋu le mawufiaɖuƒe la me.

³⁰Eye kpɔ ɖa, mlɔetɔwo li, siwo azu gbãtɔwo, eye gbãtɔwo li, siwo azu mlɔetɔwo.

³¹Le gaƒoƒo ma me ke farisitɔa ɖewo va gblɔ nɛ bena: Do go, eye nadzo le afisia; elabena Herodes le didim be, yeawu wò.

³²Eye wògblɔ na wo bena: Miheyi ɖagblɔ na abei sia bena: Kpɔ ɖa, mele gbɔgbɔ vɔ̃wo nyãm, eye mele gbe dam amewo ŋu egbe kple etsɔ, eye ŋkeke etɔ̃lia dzi la mawu enu.

³³Gake ele nam be, mazɔ mɔ egbe kple etso kple ŋkeke, si dze eyome; elabena womeɖe mɔ be, woawu nyagblɔɖilaa ɖe le afia ɖeke o, negbe le Yerusalem ko.

³⁴Yerusalem, Yerusalem, si wu nyagblɔɖilawo, eye wòƒu kpe amesiwo wodɔ ɖo ɖe egbɔ! Zi nenie medi be, maƒo viwòwo nu ƒu, abe alesi koklonɔ ƒoa viawo nu ƒu ɖe eƒe aʋala le ene, eye mielɔ̃ o!

³⁵Kpɔ ɖa woagblẽ miaƒe aƒe ɖi na mi aƒeɖoe. Mele egblɔm na mi bena: Miegale kpɔ ye ge o, vaseɖe esi me miagblɔ bena: Woayra amesi gbɔna le Aƒetɔ ƒe ŋkɔa me.