Read ewe Luka 18 Bible Online

Luka 18 - ewe bible

Luka 18

¹Eye wòdo lo na wo, le alesi wòle na wo be, woaɖo gbe ɖa ɖaa, eye ɖeɖi nagate wo ŋu o la ŋuti,

²gblɔ bena: ʋɔnudrɔ̃laa ɖe nɔ dua ɖe me, amesi mevɔ̃a Mawu o, eye mesia ame hã o.

³Ke ahosia ɖe nɔ du ma me, eye wòvaa egbɔ enuenu gblɔna bena: Ɖem le nye ketɔ si me.

⁴Eye melɔ̃ o eteƒe didi; ke esiawo megbe la egblɔ le ye ŋutɔ ɖokui me bena: Esi nyemevɔ̃a Mawu o, eye nyemesia ame hã o la,

⁵gake le esi ahosi sia le fu ɖem nam ŋuti la, maɖee, bena mlɔeba la wòagava ade fe ŋku me nam o.

⁶Eye Aƒetɔ la gblɔ bena: Mise nusi ʋɔnudrɔ̃la madzɔmadzɔ la gblɔ.

⁷Ke ɖe Mawu maɖe eƒe ame tiatia, siwo le ɣli ɖom nɛ ŋkeke kple zã, eye magbɔ dzi ɖi na wo o mahã?

⁸Mele egblɔm na mi bena: Aɖe wo kaba. Gake ne Amegbetɔvi la va la, ɖe wòakpɔ xɔse la le anyigba la dzi mahã?

⁹Eye wòɖo lo sia na amea ɖewo, siwo ɖo dzi ɖe woa ŋutɔwo ɖokui ŋu bena, yewonye ame dzɔdzɔewo, eye wobu ame bubuwo be, womenye naneke o la bena:

¹⁰Ame eve yi mawuxɔ me, be yewoado gbe ɖa; ɖeka nye farisitɔ, eye evelia nye nudzɔla.

¹¹Farisitɔ la le tsitrenu, eye wòdo gbe ɖa ɖe ta me be: Mawu, meda akpe na wò bena, nyemele abe ame bubuawo, adzodalawo, ame madzɔmadzɔwo, ahasiwɔlawo, alo abe nudzɔla sia hã ene o.

¹²Metsia nu dɔna zi eve le kwasiɖa ɖeka me, eye metsɔa nusiwo katã sua asinye la, ƒe ewolia nana.

¹³Ke nudzɔla la tsi tre le adzɔge ke, eye melɔ̃ be, yeawu eƒe mo hã dzi akpɔ dziƒo o; ke boŋ eƒo akɔta gblɔ bena: Mawu, kpɔ nublanui na nye, nuvɔ̃wɔla!

¹⁴Mele egblɔm na mi bena: Amesia la wotso afia nɛ, eye wòtre aƒemeyiyi na ame keme; elabena amesiame, si doa eɖokui ɖe dzi la, woabɔbɔe ɖe anyi; ke amesi bɔbɔa eɖokui ɖe anyi la, woadoe ɖe dzi.

¹⁵Eye wotsɔ vidzĩewo hã va egbɔ, bena wòada asi ɖe wo dzi; ke esi nusrɔ̃lawo kpɔe la, woblu ɖe wo ta.

¹⁶Eye Yesu yɔ wo va egbɔ gblɔ bena: Mina ɖeviawo nava gbɔnye, eye migaxe mɔ na wo o; elabena nenem mewo tɔe nye mawufiaɖuƒe la.

¹⁷Vavã mele egblɔm na mi bena: Amesi ke mexɔ mawufiaɖuƒe la abe ɖevi ene o la, mele eme yi ge o.

¹⁸Eye amegãa ɖe va biae bena: Nufiala nyui, nuka mawɔ, be manyi agbe mavɔ la dome mahã?

¹⁹Ke Yesu gblɔ nɛ bena: Nuka nèle yɔyem be nyui mahã? Amea ɖeke mele nyui o, negbe Mawu ɖeka ko.

²⁰Enya seawo bena: Megawɔ ahasi o; megawu ame o; megafi fi o; megaɖi aʋatsoɖase o; bu fofowò kple dawò.

²¹Ke eya gblɔ bena: Mewɔ nusiawo katã dzi tso nye ɖevime ke.

²²Eye esi Yesu see la, egblɔ ne bena: Egasusɔ nu ɖeka na wò; dzra nusiwo katã le asiwò la, eye namã wo na ame dahewo, eye nu nyui anɔ dziƒo na wò; eye nava adze yonyeme.

²³Ke esi wòse esiawo la, evee ŋutɔ; elabena kesinɔtɔ ŋutɔ wònye.

²⁴Eye esi Yesu kpɔe la, egblɔ bena: Ale wòsẽ na amesiwo si nu le la be, wòayi ɖe mawufiaɖuƒe la me enye esi.

²⁵Elabena ele bɔbɔe na kposɔ be, wòato abi ƒe vo me wu alesi kesinɔtɔ nayi ɖe mawufiaɖuƒe la mee.

²⁶Ke amesiwo see la, gblɔ bena: Ekema ameka gɔ̃e ate ŋu akpɔ ɖeɖe mahã?

²⁷Eye wògblɔ bena: Nusiwo womate ŋu awɔ le amegbetɔwo gbɔ o la, woate ŋu awɔe le Mawu gbɔ.

²⁸Ke Petro gblɔ bena: Kpɔ ɖa, miawo la miegblẽ míaƒe nuwo ɖi, eye miedze yowòme.

²⁹Eye wògblɔ na wo bena: Vavã mele egblɔm na mi bena: Amea ɖeke meli, si gblẽ aƒe alo srɔ̃ alo nɔviŋutsuwo alo dzilawo alo viwo ɖi le mawufiaɖuƒe la ŋuti,

³⁰eye wòado kpo teƒeɖoɖo geɖe xɔxɔ awu le ɣeyiɣi sia me kple agbe mavɔ la xɔxɔ le xexe, si lava va la me o.

³¹Eye wòyɔ ame wuieveawo va egbɔ gblɔ na wo bena: Kpɔ ɖa, mieyina Yerusalem, eye woawu nusiwo katã woŋlɔ ɖi to nyagblɔɖilawo dzi le Amegbetɔvi la ŋuti la nu.

³²Elabena woadee asi na trɔ̃subɔlawo, eye woaɖu fewu le eŋuti, eye woaɖo vloe, eye woaɖe ta ɖe eŋu;

³³eye woaƒoe kple atam, eye woawui, eye ŋkeke etɔ̃agbe la wòatsi tre.

³⁴Eye womese nusiawo dometɔa ɖeke gɔme o, eye nya sia le ɣaɣla ɖe wo, eye womedze si nusiwo wògblɔ la o.

³⁵Eye wòva ve me, esi wògogo Yerixo la bena, ŋkuagbãtɔa ɖe bɔbɔ nɔ mɔ to le nu biam;

³⁶ke esi wòse bena, ameha le eŋuti tom yina la, ebia be: Nukae nye esia?

³⁷Eye woto nɛ bena: Yesu, Nazaretetɔ lae le eŋuti tom.

³⁸Eye wòdo ɣli gblɔ bena: Yesu, Dawid vi la, kpɔ nye nublanui!

³⁹Eye amesiwo dze ŋgɔ la, blu ɖe eta bena, wòazi ɖoɖoe: ke eya do ɣli wu tsãtɔ bena: Dawid vi lee, kpɔ nye nublanui!

⁴⁰Eye Yesu tɔ ɖe tsitre, eye wòde se be, woakplɔe ava ye gbɔe: eye esi wòte va egbɔ la, ebiae bena:

⁴¹Nuka dim nèle, be mawɔ na wò mahã? Eye wògblɔ bena: Aƒetɔ, bena makpe nu!

⁴²Eye Yesu gblo nɛ bena: Kpɔ nu, wò xɔse la ɖe wò.

⁴³Eye enumake wòkpɔ nu, eye wòdze eyome le Mawu kafum, eye dukɔ la katã, esi wokpɔe la, wotsɔ kafukafu na Mawu.