Read ewe Luka 19 Bible Online

Luka 19 - ewe bible

Luka 19

¹Eye esi wòva Yerixo la, etso me yi.

²Eye kpɔ ɖa, ŋutsua ɖe, si ŋkɔ woyɔna be Zaxeo la li, eye wònye nudzɔlawo ƒe amegã ganye kesinɔtɔ hã.

³Eye wòɖi be, yeakpɔ Yesu, amesi wònye, eye mete ŋui o le ameha la ŋuti; elabena ame kpui wònye.

⁴Eye wòƒu du dze ŋgɔ ɖaha gbotia ɖe dzi, be yeakpɔe, elabena egbɔna afima to ge.

⁵Eye esi Yesu va ɖo teƒea la, ewu mo dzi gblɔ nɛ bena: Zaxeo, ɖi kaba; elabena ele nam egbea be, manɔ aƒewò me.

⁶Eye wòɖi kaba, eye wòxɔe kple dzidzɔ.

⁷Eye esi wokpɔe la, wo katã woli liʋiliʋi gblɔ bena: Eyina ŋutsu, si nye nuvɔ̃wɔla gbɔ dze ge.

⁸Eye Zaxeo tsi tre gblɔ na Aƒetɔ la bena: Kpɔ ɖa, Aƒetɔ, metsɔ nye nuwo ƒe afã na ame dahewo, eye ne medzɔ nu le amea ɖe si dzro la, meɖoa eteƒe ne zi ene.

⁹Eye Yesu gblɔ ne bena: Egbe xɔxɔ va aƒe sia me, ɖe esi eya hã nye Abraham vi ŋuti.

¹⁰Elabena Amegbetɔvi la va, be yeaɖi, eye yeaɖe amesiwo bu la.

¹¹Eye esi wole nusiawo sem la, edo lo ƒu dzi na wo, elabena egogo Yerusalem, eye woawo bu xa bena, mawufiaɖuƒe la le dodo ge enumake.

¹²Eyaŋuti wògblɔ bena: Ame ŋkutaa ɖe yi ɖe anyigba didia ɖe dzi be, yeaxɔ fiaɖuƒe na ye ɖokui, eye yeagatrɔ agbɔ.

¹³Eye esi wòyɔ eƒe dɔlawo dome ame ewo ve la, etsɔ pounde ewo na wo, eye wògblɔ na wo bena: Mitrɔ le wo dzi, vaseɖe esime magagbɔ.

¹⁴Ke eƒe dumetɔwo lé fui, eye wodɔ ame ɖe eyome gblɔ bena: Mielɔ̃ bena, amesia naɖu fia ɖe mia dzi o.

¹⁵Eye wòva ve me, esi wòxɔ fiaɖuƒe la vɔ, eye wòtrɔ gbɔ la, bena ena woyɔ dɔla siawo, amesiwo si wòtsɔ ga ɖee la, vɛ nɛ, bena wòanya amesi ɖe vi, kple vi, si wòɖe.

¹⁶Eye gbãtɔ va do gblɔ bena: Aƒetɔ, wò pounde la ɖe vi pounde ewo ɖe edzi.

¹⁷Eye wògblɔ ne bena: Ehẽ, ɖɔla nyui, esi nèzu nuteƒewɔla le nu suetɔ me ŋuti la, ŋusẽ anɔ asiwò ɖe du ewo dzi.

¹⁸Eye evelia va gblɔ bena: Aƒetɔ, wò pounde la ɖe vi pounde atɔ̃.

¹⁹Eye wògblɔ na eya hã bena: Wò hã ànɔ du atɔ̃ dzi.

²⁰Eye bubu va gblɔ bena: Aƒetɔ, kpɔ ɖa, wò pounde, si metsɔ dzra ɖo ɖe taku nu la, nye esi;

²¹elabena mevɔ̃ wò, esi nènye ame sẽŋuta ŋuti, ètsɔa nusi mèda ɖi o, eye nèŋea nusi mèƒã o.

²²Egblɔ ne bena: Wò ŋutɔ wò numenya metsɔ drɔ̃ ʋɔnu wò, dɔla vɔ̃ɖi! Enyae bena, nye la ame sẽŋuta menye, metsɔa nusi nyemeda ɖi o, eye meŋea nusi nyemeƒã o la,

²³nukaŋuti mètsɔ nye ga na gasitsalawo, eye nye la le nye vava me la, ne maxɔe kple deme o mahã?

²⁴Eye wògblɔ na amesiwo le tsitre le egbɔ la bena: Mixɔ pounde la le esi, eye mitsɔe na amesi pounde ewo le esi!

²⁵Eye wogblɔ nɛ bena: Aƒetɔ, pounde ewo le esi!

²⁶Mele egblɔm na mi bena: Amesiame, si nu le esi la, woana nui; ke amesi nu mele esi o la, nusi le esi hã la, woaxɔe le esi.

²⁷Gake nye ketɔ ma, siwo melɔ̃ be, maɖu fia ɖe wo dzi o la, atikplɔ wo va afii, eye miwu wo le ŋkunye me.

²⁸Eye esi wògblɔ esiawo la, edze ŋgɔ yina Yerusalem.

²⁹Eye wòva ve me, esi wògogo Betfage kple Betania le to, si woyɔna be Amito la ŋuti la, edo eƒe nusrɔ̃lawo dome ame eve

³⁰gblo bena: Miyi kɔƒe, si le mia ŋgɔ la me, eye ne miege ɖe eme la, miakpɔ tedzivi le ka me, esi dzi amea ɖeke menɔ kpɔ o; mitui, eye mikplɔe vɛ.

³¹Eye ne amea ɖe bia mi bena: Nukaŋuti miele etum hã la, migblɔ ale: Aƒetɔ la le ehiãm.

³²Eye esi ame dodowo yi la, wokpɔ alesi wògblɔ na wo.

³³Ke esi wole tedzivi la tum la, nuatɔwo gblɔ na wo bena: Nukaŋuti miele tedzivi la tum?

³⁴Eye wogblɔ bena: Aƒetɔ la le ehiãm.

³⁵Eye wokplɔe vɛ na Yesu; eye wotsɔ woƒe avɔwo ɖo tedzivi la dzi, eye wokɔ Yesu ɖo edzi.

³⁶Eye le eƒe yiyi me la wotsɔ woƒe avɔwo keke de mɔƒo me.

³⁷Ke esi wògogo va do afisi woɖia Amito la ƒe abu lena la, nusrɔ̃lawo ƒe ha blibo la katã de asi dzidzɔkpɔkpɔ kple mawukafukafu me kple gbe sesẽ le ŋusẽdɔwɔwɔ, siwo katã wokpɔ la ŋuti

³⁸gblo bena: Woayra fia, si gbɔna le Aƒetɔ la ƒe ŋkɔa me; ŋutifafa le dziƒo, eye ŋutikɔkɔe le dziƒo boo!

³⁹Eye farisitɔwo dometɔa dewo tso ameha la dome gblo ne bena: Nufiala, gbe nya na wò nusrɔ̃lawo.

⁴⁰Eye wòxɔ edzi gblɔ na wo bena: Mele egblɔm na mi bena: Ne amesiawo zi kpi la, kpewo ado ɣli.

⁴¹Eye esi wòte va, eye wòkpɔ dua la, efa avi ɖe eŋuti

⁴²gblɔ bena: Wò hã, ɖe nènya nusi na ŋutifafa wò le wò ŋkeke sia me: ke azɔ la eɣla ɖe wò ŋkuwo!

⁴³Elabena ŋkekewo ava dziwò, eye wò ketɔwo aƒu kpo ɖe ŋuwò, eye woaɖe to aƒo xlã wò, eye woaxaxa wò ɖe eme le goawo katã dzi,

⁴⁴eye woaxlã wo kple viwò, siwo le mewo la, ɖe anyi, eye womele kpe gblẽ ge ɖe kpe dzi le mewo o, le esi mèdze si wò kpɔkpɔɖaɣi o la ta.

⁴⁵Eye esi wòyi ɖe mawuƒe la me la, ede asi amesiwo le nu dzram kple amesiwo le nu ƒlem la nyãnyã me do goe

⁴⁶gblɔ na wo bena: Woŋlɔ ɖi bena: „Eye nye aƒe la lanye gbedoxɔ; ɖee mia wo miewɔe adzodalawo ƒe do.“

⁴⁷Eye wòle nu fiãm le mawuƒe la me gbesiagbe. Ke nunɔlagãwo kple agbalẽfialawo kple dumegãwo di be, yewoawui;

⁴⁸eye womekpɔ alesi woawɔ o; elabena dukɔ la katã ku de eŋu hele to ɖomii.