Read ewe Luka 2 Bible Online

Luka 2 - ewe bible

Luka 2

¹Eye wòva ve me le ŋkeke mawo me be, sedede tso kaisaro Augusto gbɔ bena, woaxlẽ xexeame katã aŋlɔ.

²Ŋɔŋlɔ gbãtɔ sia va me, esime Kirenio le mɔ̃mefia ɖum le Siria.

³Eye amewo katã dze mo heyi be, wòaŋlɔ woƒe ŋkɔwo, amesiame yi ɖe ye ŋuta ƒe du me.

⁴Eye Yosef hã dzo le Galilea, tso Nazaret-du la me heyi Yudea ɖe Dawid du, si woyɔna be Betlexem la me, elabena etso Dawid ƒe me kple eƒome la me,

⁵be woaŋlɔ eya kple Mana, amesi ŋugbe wodo nɛ, si nye funɔ la, ƒe ŋkɔ.

⁶Eye esi wole afima la, eva ve me be, eƒe ŋkeke la de be, wòadzi vi.

⁷Eye wòdzi ŋutsuvi, si nye eƒe ŋgɔgbevi, eye wòxatsa avɔ ɖe eŋu, eye wòtsɔe mlɔ lãnuɖunu me; elabena womekpɔ teƒe le amedzrodzeƒe o.

⁸Eye alẽnyilawo le nuto ma ke me le gbedzi, eye wole woƒe alẽha ŋuti dzɔm le zã me.

⁹Eye Aƒetɔ ƒe dɔlaa ɖe tsi tre ɖe wo gbɔ, eye Aƒetɔ ƒe ŋutikɔkɔe klẽ ƒo xlã wo, eye wovɔ̃ ŋutɔŋutɔ.

¹⁰Eye dɔla la gblɔ na wo bena: Migavɔ̃ o! Elabena kpɔ ɖa, meva dzidzɔ gã ŋutinya gblɔ ge fia mi, esi lanye na dukɔ blibo la katã;

¹¹elabena wodzi xɔla, si nye Kristo, Aƒetɔ la, na mi egbe le Dawid dua me.

¹²Eye esia anye dzesi na mi: Míakpɔ vidzĩe, si woxatsa avɔ ɖe eŋu, eye wòmia lãnuɖunu me.

¹³Eye kasia dziƒoʋakɔha gãa ɖe kpe ɖe mawudɔla la ŋuti, wole Mawu kafum le gbɔgblɔm bena:

¹⁴Ŋutikɔkɔe woana Mawu le dziƒo boo, eye ŋutifafa ava anyigba dzi; amegbetɔwo ŋu woakpɔ ŋudzedze nyui le.

¹⁵Eye wòva me, esime mawudɔlawo dzo le wo gbɔ heyi dziƒo la, alẽnyilawo gblɔ na wo nɔewo bena: Mina ne miayi Betlexem, aɖakpɔ nusia, si va dzɔ, esi Aƒetɔ la na mienya.

¹⁶Eye woɖe abla va, eye wokpɔ Mana kple Yosef kpakple vidzĩe, si le anyimlɔƒe le lãnuɖunu me.

¹⁷Esi wokpɔe la, wokaka nya, si wogblɔ na wo le ɖevi sia ŋuti.

¹⁸Eye amesiwo katã see la, woƒe mo wɔ yaa le nya, siwo alẽnyilawo gblɔ na wo la ŋuti.

¹⁹Ke Mana lé nya siawo katã ɖe ta me, eye wobu wo ŋuti le eƒe dzi me.

²⁰Eye alẽnyilawo gbugbɔ, eye wole ŋutikɔkɔe kple kafukafu tsɔm na Mawu le nusiwo katã wose, eye wokpɔ la ŋuti, abe alesi wogblɔ na wo la ene.

²¹Eye esi wotso aʋa nɛ le ŋkeke enyilia dzi la, wotsɔ ŋkɔ nɛ be Yesu, abe alesi mawudɔla yɔe ɖi, hafi wòfɔ eƒe fu ene.

²²Eye esi wowu woƒe ŋutikɔklɔŋkekeawo nu le Mose ƒe se la nu la, wotsɔe yi Yerusalem, be woatsɔe aɖo Aƒetɔ ŋku me,

²³abe alesi woŋlɔ ɖi le Aƒetɔ ƒe se la me ene bena: „Atsu sia atsu, si ʋu dɔnu la, woayɔ eya kɔkɔe na Aƒetɔ la“;

²⁴eye be woana numeme, abe alesi wogblɔ le Aƒetɔ ƒe se la me ene bena: „Akpakpa eve alo ahɔ̃nevi eve.“

²⁵Eye kpɔ ɖa, amea ɖe le Yerusalem, si ŋkɔ enye Simeon: amesia enye ame dzɔdzɔe kple mawumeme, si le Israel aƒe akɔfafa lalam, eye Gbɔgbɔ kɔkɔe le eyama dzi.

²⁶Eye Gbɔgbɔ kɔkɔe la ɖee fiae bena, mele kuku ge, hafi akpɔ Aƒetɔ la ƒe Kristo o.

²⁷Eye wòle Gbɔgbɔ la me va mawuxɔa me; eye esi dzilawo yi ɖe eme kple ɖevi Yesu, bena woawɔ nɛ le se la ƒe kɔa nu la,

²⁸eya hã xɔe ɖe eƒe abɔwo dome, eye wòkafu Mawu hegblɔ bena:

²⁹Aƒetɔ, azɔ èɖo mɔ wò dɔla le ŋutifafa me le wò nya la nu;

³⁰elabena nye ŋkuwo kpɔ wò xɔxɔ,

³¹si nèdzra ɖo ɖe dukɔwo katã ƒe ŋku me;

³²kekeli ƒe nyaɖeɖefia na trɔ̃subɔlawo kple wò dukɔ Israel ƒe ŋutikɔkɔe.

³³Eye fofoa kple dadaa ƒe mo wɔ yaa le nya, siwo wògblɔ le eyama ŋuti la ta.

³⁴Eye Simeon yra wo, eye wògblɔ na dadaa Mana bena: Kpɔ ɖa, woɖo amesia anyi na ame geɖewo ƒe anyidzedze kple tsitretsitsi le Israel, kple dzesi, si woagblɔ nya ɖe eŋuti;

³⁵ke wò la, yi ato wò ŋutɔ wò luʋɔ me, bena woaɖe ame geɖewo ƒe dzimesusuwo afia.

³⁶Eye Hana, nyɔnu nyagblɔɖilaa ɖe li, enye Fanuel ƒe nyɔnuvi tso Aser-ƒome me, si xɔ ƒe geɖe ŋutɔ, eye wònɔ anyi kple srɔ̃a ƒe adre tso eƒe ɖetugbi me;

³⁷eye wònye ahosi, si xɔ ƒe blaenyi vɔ ene, eye medzona le mawuƒe la me o hele Mawu subɔm kple nutsitsiɖɔ kpakple kukuɖeɖe zã kple keli.

³⁸Eya hã va tsi tre le gaƒoƒo ma ke dzi, le Aƒetɔ kafum, eye wòƒo nu le eŋuti na amesiwo katã le Yerusalem ƒe ɖeɖe lalam.

³⁹Eye esi wowu nuwo katã nu le Aƒetɔ ƒe sea nu la, wògatrɔ yi Galilea ɖe woawo ŋutɔ ƒe du Nazaret la me.

⁴⁰Eye ɖevi la tsi, eye wòva sẽ ŋu, eye nunya yɔe fũ, eye Mawu ƒe amenuveve le edzi?

⁴¹Eye eƒe dzilawo yia Yerusalem ƒe sia ƒe ɖe ŋutitotoŋkekenyuieɖuƒe.

⁴²Eye esi wòxɔ ƒe wuieve la, woyi Yerusalem le ŋkekenyuie ƒe koa nu.

⁴³Eye esi wowu ŋkekeawo nu la, Yesu ɖevi la tsi megbe le Yerusalem le woƒe tɔtrɔgbɔ me, eye eƒe dzilawo menye o.

⁴⁴Ke esi wobu xa bena, ana mɔzɔha la dome la, wozɔ ŋkeke ɖeka ƒe mɔ, eye woɖii le woƒe ƒomeawo kple ame nyanyɛawo dome,

⁴⁵eye esi womekpɔe o la, wògatrɔ yi Yerusalem le edim.

⁴⁶Eye le ŋkeke etɔ̃ megbe la eva ve me bena, wokpɔe le mawuƒe la me le anyinɔƒe le nusiawo dome, hele to ɖom wo, eye wòle nya biam wo;

⁴⁷eye amesiwo katã see la, woƒe mo wɔ yaa le eƒe nugɔmesese kple eƒe ŋuɖoɖowo ŋuti.

⁴⁸Eye esi wokpɔe la, kuvia ɖo wo, eye dadaa gblɔ nɛ bena: Vinye, nukaŋuti newɔ ɖe mia ŋu ale? Kpɔ ɖa, mia kple fofowò miedi wò kple nuxaxa.

⁴⁹Eye wògblɔ na wo bena: Nuka wɔ miedim ma? Ɖe mienya bena, ele nam be, manɔ nusiwo nye fofonye tɔ me o mahã?

⁵⁰Eye womese nya, si wògblɔ na wo la gɔme o.

⁵¹Eye wòyi kpli wo, eye wòva Nazaret, eye wòbɔbɔ eɖokui na wo, eye dadaa tsɔ nya siawo katã dzra ɖo ɖe eƒe dzi me.

⁵²Eye Yesu tsi ɖe dzi le nunya kple tsitsi kple amenuveve le Mawu kple amewo gbɔ la me.