Read ewe Luka 20 Bible Online

Luka 20 - ewe bible

Luka 20

¹Eye le ŋkekeawo dometɔ ɖeka dzi, esi wòle nu fiam, eye wòle nyanyuie la gblɔm na dukɔ la le mawuƒe me la, eva ve me bena, nunɔlagãwo kple agbalẽfialawo kpakple amegãwo va tsi tre,

²eye wogblɔ nɛ bena: Gblɔe na mi, ŋusẽ ka nètsɔ wɔ esiawoe? Alo amekae tsɔ ŋusẽ sia na wò mahã?

³Eye wòɖo eŋu gblɔ na wo bena: Nye hã mabia nya ɖeka mi, ne miagblɔe nam;

⁴Yohanes ƒe mawutsidedetaname la, dziƒo wòtso loo, alo amewo gbɔ wòtso mahã?

⁵Ke woawo la woke ɖi kple wo nɔewo gblɔ bena: Ne miegblɔ bena: Dziƒo wòtso la, agblɔ bena: Ekema nukaŋuti miexɔ edzi se oa?

⁶Ke ne miegblɔ bena: Amewo gbɔ wòtso la, ekema dukɔ la katã laƒu kpe mí; elabena wokpɔ kakaɖedzi bena, Yohanes enye nyagblɔɖila.

⁷Eye woɖo ŋu bena, yewomenya afisi wòtso o.

⁸Eye Yesu gblɔ nɛ wo bena: Ekema nye hã nyemagblɔ ŋusẽ, si metso wɔ nusiawo na mi o.

⁹Eye wòde asi lo sia dodo me na dukɔ la bena: Amea ɖe de weingble, eye woɖee asi na agbleŋlɔlawo, eye wòyi nugbe eteƒe didi.

¹⁰Eye le ɣeyiɣi nyui la dzi la edo dɔla ɖo ɖe agbledelawo gbɔ, bena woatsɔ weingble la ƒe kutsetsea ɖewo anɛ, ke agbledelawo ƒoe, eye wodoe ɖa asi ƒuƒlu.

¹¹Eye wògadɔ dɔla bubu ɖa; ke woƒo eya hã, eye esi wodo ŋukpee la, wodɔe ɖa asi ƒuƒlu.

¹²Eye wògadɔ etɔ̃lia ɖa, ke esi woɖe abi eya ŋu la, wokɔe ƒu gbe.

¹³Ke weingble la ƒe aƒetɔ gblɔ bena: Nuka wɔ ge mala? Madɔ vinye lɔlɔ̃tɔ ɖa; ɖewohĩ wòasi eya ŋku me ɖa.

¹⁴Ke esi agbledelawo kpɔe la, wode adaŋu kple wo nɔewo gblɔ bena: Esia nye domenyila la, mina miawui, bena domenyinyi la nazu mía tɔ.

¹⁵Eye esi wokɔe ƒu gbe ɖe weingble la xa la, wowui. Azɔ nuka weingble la ƒe aƒetɔ awɔ wo mahã?

¹⁶Ava, eye wòatsrɔ̃ agbledela siawo, eye wòade agble la asi na ame bubuwo. Ke esi wose esia la, wogblɔ bena: Kpao, meganɔ nenema o!

¹⁷Eye wòkpɔ wo dũ gblo bena: Nuka gɔ̃e nye esia, si woŋlɔ ɖi bena: „Kpe, si xɔtulawo gbe la, eya ke tro zu dzogoekpe“ mahã?

¹⁸Amesiame, si adze kpe ma dzi la, aŋe gudugudu; ke amesi dzi wòadze la, atui memie.

¹⁹Eye agbalẽfialawo kple nunɔlagãwo di bena, yewoalée le gaƒoƒo ma me, ke wovɔ̃ dukɔ la, elabena wodze sii bena, edo lo sia ɖe yewo ŋu.

²⁰Eye wole eŋu dzɔm, eye wodo adzamenɔla, siwo da alakpa be, yewonye ame dzɔdzɔewo la ɖa, bena woalée le nya me, ne yewoadee asi na fia kple mɔ̃mefia ƒe ŋusẽ?

²¹Eye wobiae gblo bena: Nufiala, míenyae bena, nègblɔa nya, eye nefia nu ɖe eteƒe, eye mèkpɔa ame ŋku me o; ke boŋ nèle Mawu ƒe ma la fiãm le nyateƒe me.

²²Woɖe mɔ bena, miadzɔ nu na kaisaro loo, alo womeɖe mɔ oa?

²³Eye esi wòdze si woƒe aɖaŋu vɔ̃a la, egblɔ na wo bena: Nuka miele teyem kpɔ mahã?

²⁴Mifia denario lam: ameka ƒe tata kple ŋɔŋlɔe le edzi mahã? Eye wogblɔ bena: Kaisaro tɔe.

²⁵Eye wògblɔ na wo bena: Eyaŋuti mitsɔ nusi nye kaisaro tɔ la, na kaisaro, eye nusi nye Mawu tɔ la, na Mawu!

²⁶Eye womete ŋu lée le eƒe nya me le dukɔ la ƒe ŋku me o, eye woƒe mo wɔ yaa le eƒe ŋuɖoɖo la ŋuti, eye wozi kpi.

²⁷Tete zadukitɔwo dometɔa ɖewo, siwo sẽa nu le tsitretsitsi ŋuti bena, meli o la, va biae bena:

²⁸Nufiala, Mose ŋlɔ ɖi na mí bena: Ne amea ɖe nɔviŋutsu, tsi srɔ̃ le esi la ku, eye megblẽ viwo ɖi o la, nɔvia naɖe srɔ̃a, eye wòado ƒome ɖi na nɔvia.

²⁹Azɔ nɔviŋutsu adre li, eye esi gbãtɔ ɖe srɔ̃ la, eku megblẽ viwo ɖi o;

³⁰eye evelia

³¹kple etɔ̃lia hã ɖee, eye nenema ke wo ame adre la katã megblẽ viwo ɖi o, eye woku.

³²Emegbe la nyɔnu la hã ku.

³³Azɔ le tsitretsitsi la me ɖee, wo dometɔ ka srɔ̃ nyɔnu la azu mahã? Elabena wo ame adre la katã ɖee kpɔ.

³⁴Eye Yesu gblɔ na wo bena: Xexe sia me viwo ɖea srɔ̃, eye wotsɔa wo nana, be woaɖe;

³⁵ke amesiwo dze be, woƒe asi nasu xexe keme kple ame kukuwo ƒe tsitretsitsi dzi la, womeɖea srɔ̃ o, eye wometsɔa wo nana, be woaɖe hã o,

³⁶elabena womagate ŋu aku o; elabena woɖi mawudɔlawo, eye wonye Mawu kple tsitretsitsi la ƒe viwo.

³⁷Ke bena ame kukuwo atsi tre la, Mose hã gblɔe fia le ŋuve la gbɔ, esi wòyɔ Aƒetɔ la bena: „Abraham ƒe Mawu kple Isak ƒe Mawu kple Yakob ƒe Mawu.“

³⁸Ke Mawu la, menye ame kukuwo ƒe Mawu wònye o, ke boŋ ame gbagbewo tɔe; elabena wo katã wole agbe nɛ.

³⁹Eye agbalẽfialawo dometɔa ɖewo xɔ edzi gblɔ bena: Nufiala, ègblɔe nyuie.

⁴⁰Eye womegado dzi bia nyaa ɖekee o.

⁴¹Eye wògblɔ na wo bena: Aleke wɔ miegblɔ bena: Kristo la nye Dawid vi mahã?

⁴²Elabena Dawid ŋutɔ gblɔ le Psalmo ƒe agbalẽ me bena: Aƒetɔ la gblɔ na nye Aƒetɔ bena: „Bɔbɔ nɔ nye nuɖusi me,

⁴³vaseɖe esime matso wò ketɔwo awɔ wò afɔɖodzinu.“

⁴⁴Azɔ ne Dawid yɔnɛ be Aƒetɔ la, aleke wo wònye via mahã?

⁴⁵Ke esi dukɔ la katã le to ɖomii la, egblɔ na nusrɔ̃lawo bena;

⁴⁶Mikpɔ mia ɖokui dzi nyuie le agbalẽfialawo ŋuti, amesiwo lɔ̃a tsatsa le awu ʋlayawo me kple gbeɖonamewo le ablɔwo me kple nɔƒe gbãtɔwo nɔnɔ le ƒuƒoƒewo kpakple kplɔ̃ta nɔnɔwo le nuɖuƒewo;

⁴⁷amesiwo mia ahosiwo ƒe aƒewo, eye wodaa alakpa nɔa gbe ɖiɖiwo dom ɖa; amesiawo laxɔ fɔbubu sesẽtɔ awu.