Read ewe Luka 22 Bible Online

Luka 22 - ewe bible

Luka 22

¹Eye abolo maʋãmaʋã ƒe ŋkekenyuie, si woyɔna be ŋutitoto la ɖo.

²Eye nunɔlagãwo kple agbalẽfialawo di alesi woawɔ awui, elabena wovɔ̃ dukɔ la.

³Ke Satana yi ɖe Yuda, ame wuieveawo dometɔ ɖeka, si woyɔna be Iskariot la me.

⁴Eye wòdzo heyi ɖaƒo nu kple nunɔlagãwo kple aʋafiawo, alesi woawɔ aɖe eyama asi na wo.

⁵Eye dzi dzo wo, eye wodo ŋugbe nɛ be, yewoana gae.

⁶Eye wòlɔ̃ edzi na wo, eye wòle asinu nyuia ɖe dim be, yeadee asi na wo zimatɔmatɔe.

⁷Eye abolo maʋamaʋã ƒe ŋkeke la ɖo, esi dzi wòle be, woawu ŋutitotolẽvi la le.

⁸Eye wòdɔ Petro kple Yohanes gblɔ bena: Miheyi ɖadzra ŋutitotolẽvi la ɖo na mi, be miaɖu.

⁹Ke wogblɔ nɛ bena: Afika dim nèle bena, míadzra ɖo mahã?

¹⁰Eye wògblɔ na wo bena: Kpɔ ɖa, ne miede dua me la, amea ɖe, si tso tsikplu la, akpe mi; midze eyome yi aƒe, si ke me wòyi ɖo la me.

¹¹Eye miagblɔ na aƒeatɔ bena: Nufiala gblɔ na wò bena: Afika dzeƒe le, afisi mía kple nye nusrɔ̃lawo míaɖu ŋutitotolẽvi la le mahã?

¹²Eye ame ma afia xa gãa ɖe, si me woɖo nuwoe la mi le dziƒo, midzrɛ ɖo le afima.

¹³Eye esi woyi la, wokpɔe, abe alesi wògblɔ na wo la ene; eye wodzra ŋutitotolẽvi la o.

¹⁴Eye esi gaƒoƒo la de la, ebɔbɔ nɔ anyi, eye apostoloawo kpe ɖe eŋuti.

¹⁵Eye wògblɔ na wo bena: Medi vevie ŋuta bena, maɖu ŋutitotolẽvi sia kpli mi, hafi ne makpe fu;

¹⁶elabena mele egblɔm na mi bena: Nyemegale ɖeke ɖu ge akpɔ o, vaseɖe esime woawu enu le mawufiaɖuƒe la me.

¹⁷Eye esi wòtso kplu ɖe asi la, eda akpe ɖe edzi hegblɔ bena: Mixa esia, eye mimã me le mia nɔewo dome;

¹⁸elabena mele egblɔm na mi bena: Tso esia dzi la nyemegale weintsetsea ɖeke me tsi no ge akpɔ o, vaseɖe esime mawufiaɖuƒe la ava.

¹⁹Eye esi wòtsɔ abolo ɖe asi la, eda akpe ɖe edzi, eye wòŋe eme hetsɔe na wo gblɔ bena: Esiae nye nye ŋutilã, si wona le mia ta: miwɔ esia hena ŋkuɖoɖo dzinye.

²⁰Eye nenema ke wòtsɔ kplu la le fiẽnuɖuɖu la megbe hegblɔ bena: Kplu sia enye nubabla yeye le nye ʋu me, si woka ɖe anyi le mia ta.

²¹Ke kpɔ ɖa, yonyememɔfiala ƒe asi le kplɔ̃a dzi kplim.

²²Elabena ele eme bena, Amegbetɔvi la le yiyim le ɖoɖo la nu; gake baba na ame ma, si dzi wòato aɖee asi!

²³Eye wode asi biabia me le wo nɔewo dome bena, yewo dometɔ ka gɔ̃e le nusia wo ge mahã?

²⁴Ke dzre hã ɖo wo dome bena, yewo dometɔ kae nye gãtɔ mahã?

²⁵Eye wògblɔ na wo bena: Dukɔwo ƒe fiawo ɖu aƒetɔwo ɖe wo dzi, eye amesiwo kpɔ ŋusẽ ɖe wo dzi la, woyɔ wo bena amenuvelawo.

²⁶Ke miawo la miganɔ nenema o; hafi boŋ amesi nye gãtɔ le mia dome la, nazu abe suetɔ ene; eye amesi nye amegã la, nazu abe subɔla ene.

²⁷Elabena amekae nye gã wu, amesi bɔbɔ nɔ kplɔ̃ ŋuti loo, alo amesi le subɔsubɔm mahã? Menye amesi bɔbɔ nɔ kplɔ̃ ŋuti oa? Ke nye la mele mia titina abe subɔla ene.

²⁸Ke miawo la mieɖo dzi nɔ anyi kplim le nye tetekpɔwo me;

²⁹eye nye la mele fiaɖuƒe ɖom ɖi na mi, abe alesi Fofonye hã ɖoe ɖi nam ene,

³⁰bena miaɖu nu, eye miano nu le nye kplɔ̃ ŋu le nye fiaɖuƒe la me, eye miabɔbɔ nɔ fiazikpuiwo dzi, be miadrɔ̃ ʋɔnu Israel-ƒome wuieveawo.

³¹Ke Aƒetɔ la gblɔ bena: Simon, Simon, kpɔ ɖa, Satana le mia dim, bena yeagbɔ mi, abe alesi wogbɔa lu ene;

³²ke nye la meɖe kuku ɖe tawò, bena wò xɔse nu nagatsi o; eye wò la, gbesigbe nètrɔ la, nado ŋusẽ nɔviwòwo!

³³Eye wògblɔ ne bena: Aƒetɔ, mesu te be, mia kpli wò míayi gaxɔ me kple ku me.

³⁴Eye wògblɔ bena: Petro, mele egblɔm na wò bena: Koklo mele atɔ ku ge egbea, hafi nasẽ nu zi etɔ̃ bena, yemenyam o.

³⁵Eye wògblɔ na wo bena. Esi medɔ mi, gakotoku kple mɔzɔkotoku kple atokotawo manɔ mia sii la, ɖe nane hiã mi mahã? Eye wogblɔ bena: Naneke mehiã mí o.

³⁶Egblɔ na wo bena: Ke azɔ la, amesi gakotoku le esi la, netsɔe, nenema ke mɔzɔkotoku hã; eye amesi si mele o la, nedzra eƒe avɔ, eye wòaƒle yi.

³⁷Elabena mele egblɔm na mi bena: Ele be, woawu nusia, si woŋlɔ ɖi la nu ɖe ŋunye bena: „Eye wobui ɖe vodalawo dome;“ elabena nusi wogblɔ ɖi le ŋutinye la, le enu wu ge.

³⁸Eye wogblɔ bena: Aƒetɔ, kpɔ ɖa, yi evee nye esi! Eye wògblɔ na wo bena: Esɔ gbɔ.

³⁹Eye abe alesi wònɔa wɔwɔm ene la, edo go yi ɖe Amito la ŋu, eye nusrɔ̃lawo hã kplɔe ɖo.

⁴⁰Ke esi wòɖo teƒea la, egblɔ na wo bena: Mido gbe ɖa bena, miagadze tetekpɔa me o.

⁴¹Eye wòdzo le wo gbɔ anɔ abe kpedadadzeƒe ene, eye wòdze klo do gbe ɖa gblɔ bena:

⁴²Fofo, ne èlɔ̃ la, tsɔ kplu sia yii le gbɔnye; gake menye nye lɔlɔ̃nu o, ke boŋ tsiwo woawɔ.

⁴³Ke mawudɔla ɖe tso dziƒo ɖe eɖokui fiae hele ŋusẽ domii.

⁴⁴Eye le eƒe ʋiʋli me la edo gbe ɖa vevie gawu, eye wòva ve me bena, eƒe fifia le abe ʋukɔwo ene hele gegem ɖe anyigba toŋtoŋ.

⁴⁵Eye esi wòtsi tre tso gbedodoɖa me la, eva nusrɔ̃lawo gbɔ, eye wòkpɔ wo le alɔ̃ dɔm le nuxaxa ta;

⁴⁶eye wògblɔ na wo bena: Nukaŋuti miele alɔ̃ dɔm? Mitsi tre, ne míado gbe ɖa, bena miagadze tetekpɔ me o!

⁴⁷Esi wogale nuƒoƒo dzi la, kpɔ ɖa, amehaa ɖe kple ame wuieveawo dometɔ ɖeka, si woyɔna be Yuda la, le ŋgɔ na wo; eye wote ɖe Yesu ŋu, be yeagbugbɔ nu ne.

⁴⁸Ke Yesu gblɔ nɛ bena: Yuda, nugbugbɔ nètsɔ le Amegbetɔvi la ɖem asi mahã?

⁴⁹Eye esi amesiwo le eŋu la, kpɔ nusi le dzɔdzɔ ge la, wogblɔ bena: Aƒetɔ, ɖe miadza wo kple yi mahã?

⁵⁰Eye wo dometɔ ɖeka da yi nunɔlagã la ƒe dɔla, eye wòkpa eƒe nuɖusimeto.

⁵¹Ke Yesu xɔ dzi gblɔ bena: Mina mɔ wo, be woayi dzi nenema. Eye wòde asi eƒe to ŋu, eye wòda gbe eŋu.

⁵²Eye Yesu gblɔ na nunɔlagãwo kple mawuxɔdzikpɔlawo kpakple amegã, siwo va dze edzi la bena: Mietso ɖe ŋunye kple yiwo kple kpowo, abe alesi wotsona ɖe adzodala ŋu ene.

⁵³Gbawotsyogbe menɔ mawuxɔ la me kpli mi, eye mieɖo miaƒe asiwò ɖe gbɔnye kpɔ o; ke esia enye miaƒe gaƒoƒo kple viviti ƒe ŋusẽ.

⁵⁴Eye esi wòlée la, wokplɔe heyi ɖe nunɔlagã la ƒe me. Ke Petro dze eyome ʋi gbɔna.

⁵⁵Eye esi wodo dzo ɖe mɔ̃ la titina, eye woƒo ƒu ɖe egbɔ la, Petro bɔbɔ nɔ wo dome.

⁵⁶Eye esi dɔlanyɔnua ɖe kpɔe le anyinɔƒe ɖe dzo la gbɔ la, ekpɔe du gblɔ bena: Amesia hã nɔ egbɔ kpɔ.

⁵⁷Ke egbe nu le egbɔ gblɔ bena: Nyɔnu, nyemenya eyama o.

⁵⁸Eye emegbe ʋee la ame bubu kpɔe, eye wògblɔ bena: Wò hã wo dometɔ ɖeka nènye. Ke Petro gblɔ bena: Ame, menye nyee o.

⁵⁹Eye ana gaƒoƒo ɖeka megbe la ame bubua ɖe va ɖo kpe edzi gblɔ bena: Nyateƒee, amesia hã no egbo kpo; elabena Galileatɔ hã wònye.

⁶⁰Ke Petro gblɔ bena: Ame, nyemenya nusi gblɔm nèle o. Eye esi wògale nuƒoƒo dzi la, kasia koklo ku atɔ.

⁶¹Eye Aƒetɔ la trɔ kpɔ Petro dũ. Eye Petro ɖo ŋku Aƒetɔ la ƒe nya dzi, alesi wògblɔ nɛ bena: Hafi koklo naku atɔ egbe sia la, agbe nu le gbɔnye zi etɔ̃.

⁶²Eye Petro do go, eye wòfa avi vevie.

⁶³Eye ŋutsu, siwo lé Yesu ɖe asi la, woɖu fewu le eŋuti, eye woƒoe.

⁶⁴Eye esi wotsyɔ nu mo nɛ la, wobiae gblɔ bena: Amekae nye amesi ƒo wò, gblɔe fia mí!

⁶⁵Eye wogblɔ busunya bubu ƒomevi geɖewo ɖe eŋu.

⁶⁶Eye esi ŋu ke la, dumegãwo kple nunɔlagãwo kpakple agbalẽfialawo ɖi anyi, eye wokplɔe heyi ɖe woƒe takpekpe la me gblɔ bena: Nenye wòe nye Kristo la, gblɔe na mi.

⁶⁷Eye wògblɔ na wo bena: Ne megblɔe na mi la, miele exɔ ge ase o;

⁶⁸eye ne mebia nyaa ɖe mi la, miele eŋu ɖo ge nam o; eye miele asi hã ɖe ge le ŋunye o.

⁶⁹Tso esia dzi la Amegbetɔvi la anɔ anyi ɖe Mawu ƒe ŋusẽ ƒe nuɖusi me.

⁷⁰Eye wo katã gblɔ bena: Ekema Mawuvi nènye mahã? Eye wògblɔ na wo bena: Miawoe le egblɔm bena: Nyee.

⁷¹Tete woawo gblɔ bena: Ɖaseɖiɖi ka gahiã mí? Elabena mía ŋutɔwo miesee tso eya ŋutɔ ƒe nu me.