Read ewe Luka 23 Bible Online

Luka 23 - ewe bible

Luka 23

¹Eye woƒe ha blibo la katã tsi tre, eye wokplɔe yi Pilato gbɔ.

²Tete wode asi enutsotso me gblɔ bena: Míekpɔ amesia wòle miaƒe dukɔ la ƒe tame trɔm, eye wògbe na amewo bena, woagadzɔ nu na kaisaro o hele gbɔgblɔm bena, ye ŋutɔe nye Kristo, fia la.

³Eye Pilato biae gblɔ bena: Wòe nye Yudatɔwo ƒe fia la mahã? Eye wòɖo ŋu nɛ gblɔ bena: Wòe le egblɔm.

⁴Eye Pilato gblɔ na nunɔlagãwo kple amehawo bena: Nyemekpɔ vɔ̃a ɖeke le amesia ŋu o.

⁵Ke wogatsi edzi gblɔ bena: Ede zi dukɔ la me hele nu fiãm to Yudea katã me, eye wòdze gɔme tso Galilea vaseɖe afisia.

⁶Eye esi Pilato se Galilea ŋkɔ la, ebia be, Galileatɔ enye ame la mahã?

⁷Eye esi wòdze sii bena, Herodes ɖe ŋusẽ te wòtso la, eɖoe ɖe Herodes gbɔ, amesi ŋuta hã le Yerusalem le ŋkeke siawo me.

⁸Eye esi Herodes kpɔ Yesu la, ekpɔ dzidzɔ ŋutɔ; elabena edi xoxoxo be, yeakpɔe, le nusi wose le eŋu la ta, eye wòkpɔ mɔ be, awo dzesia ɖe yeakpɔ.

⁹Eye wòbia nya geɖewoe, ke eya la meɖo ɖeke ŋu nɛ o.

¹⁰Eye nunɔlagãwo kple agbalẽfialawo le tsitre hele enu tsom vevie.

¹¹Ke Herodes kple eƒe asrafowo ɖo vloe, eye woɖu fewu le eŋu, eye esi wodo aklalabiɖibiɖiwu nɛ la, egbugbɔe ɖo ɖe Pilato gbɔ.

¹²Eye Herodes kple Pilato wozu xɔlɔ̃wo le ŋkeke ma ke dzi; elabena tsã la adikã nɔ wo dome.

¹³Eye esi Pilato yɔ nunɔlagãwo kple amegãwo kpakple dukɔ la ƒo ƒu la,

¹⁴egblɔ na wo bena: Miekplɔ amesia va gbɔnye abe amesi le dukɔ la ƒe tame trɔm ene; eye kpɔ ɖa, esi medrɔ̃ ʋɔnui le miaƒe ŋku me la, nyemekpɔ vɔ̃a ɖeke le amesia ŋu, si ŋuti miele enu tsom ɖo o;

¹⁵nenema kee nye Herodes hã; elabena egbugbɔe ɖo ɖe mí; eye kpɔ ɖa, mewo naneke, si dze ku o.

¹⁶Eyaŋuti maƒoe, eye maɖe asi le eŋu.

¹⁷Ke ele nɛ be, wòaɖe asi le gatɔ ɖeka ŋu na wo le ŋkekenyuie la dzi.

¹⁸Ke wo katã do ɣli hoo gblɔ bena: Ɖe esia ɖa, eye naɖe asi le Baraba ŋuti na mí,

¹⁹amesi wòlé de gaxɔ me le zitɔtɔ le dua me kple hlɔ̃dodo ta.

²⁰Tete Pilato gaƒo nu na wo hele didim bena, yeaɖe asi le Yesu ŋu.

²¹Ke woawo la wodo ɣli gblo bena: Klãe ɖe ati ŋuti, klãe ɖe ati ŋuti!

²²Eye wògblɔ na wo zi etɔ̃lia ke bena: Nuvɔ̃ ka gã amesia wo mahã? Nyemekpɔ naneke le eŋu, si dze ku o; azɔ maƒoe, eye maɖe asi le eŋu!

²³Ke woawo la wotee ɖe eŋu hele ebiam kple gbe sesĩe bena, ɖeko woaklãe ɖe ati ŋuti. Eye woƒe gbewo wu etɔ.

²⁴Tete Pilato tso afia bena, woawo woƒe biabia dzi na wo.

²⁵Nenem eye wòɖe asi le amesi wòlé de gaxɔ me le zitɔtɔ kple hlɔ̃dodo ta la ŋu na wo, amesi wòbia; ke Yesu la, edee asi na woƒe lɔlɔ̃nu.

²⁶Eye esi wokplɔe yina la, wòlé Simon, Kirenetɔa ɖe, si tso agbleta gbɔna, eye wotsɔ atitsoga la ɖo edzi, bena wòatsɔe adze Yesu yome.

²⁷Eye ameha gãa ɖe kple nyɔnu, siwo le konyi kple avi fam ne la, kplɔe ɖo.

²⁸Ke Yesu trɔ ɖe wo ŋu gblɔ bena: Yerusalem vinyɔnuviwo, migafa avi nam o; ke boŋ miafa avi na mia ŋutɔwo mia ɖokui kple mia viwo.

²⁹Elabena kpɔ ɖa, ŋkekewo gbɔna, le esiwo me woagblɔ bena: Woayra konɔwo kple dɔ, siwo medzi vi o, kple no, siwo mena notsi kpɔ o la.

³⁰Ekema woade asi gbɔgblɔ me na towo bena: Midze mía dzi! eye na togbewo bena: Mitsyɔ mía dzi!

³¹Elabena ne wole nusiawo wɔm ɖe ati mumu ŋuti la, ekema nuka wo ge wòala de ƒuƒua ŋuti mahã?

³²Eye wokplɔ vɔ̃wɔla bubu eve hã, be woawu akpe ɖe eŋu.

³³Eye esi wova teƒe, si woyona be ametakoliƒe la, woklãe ɖe ati ŋuti le afima kple vɔ̃wɔlawo, ɖeka le nuɖusi me, eye ɖeka le mia me.

³⁴Eye Yesu gblɔ bena: Fofo, tsɔe ke wo, elabena womenya nusi wɔm wole o. Eye esi wòmã eƒe awuwo me la, wodzidze nu ɖe wo dzi.

³⁵Eye ameha la le tsi tre le nu kpɔm ɖa. Eye dumegãwo hã ɖo hehe ɖe eta gblɔ bena: Eɖe ame bubuwo, neɖe ye ŋutɔ ɖokui hã, ne esia nye Kristo, Mawu ƒe ame tiatia la.

³⁶Eye asrafo, siwo va egbɔ, be woatsɔ aha tsitsi nɛ la, hã ɖu fewu le eŋuti

³⁷gblɔ bena: Nenye wòe nye Yudatɔwo ƒe fia la, ekema ɖe wò ŋutɔ ɖokuiwò.

³⁸Eye nuŋɔŋlɔ hã le eƒe tagbɔ, esi woŋlɔ ɖe Helatɔwo, Romatɔwo kple Hebritɔwo ƒe gbe me bena: Esia nye Yudatɔwo ƒe fia la!

³⁹Eye vɔ̃wɔla, siwo wohe ɖe ati ŋuti la, dometɔ ɖeka hã gblɔ busunya ɖe eŋu bena: De menye wòe nye Kristo la oa, ɖe wò ŋutɔ ɖokuiwò kple miawo hã.

⁴⁰Tete ekeme xɔ edzi hewo ɖe eta gblɔ bena: Alo wò hã, esi nèle fɔbubu ma ke me la, ɖe meva Mawu oa?

⁴¹Ke miawo la edze mi: elabena nusi dze míaƒe nuwɔwɔwo la, eya kpɔm miele; ke amesia la mewo nu tovoa ɖeke kpɔ o.

⁴²Eye wògblɔ bena: Yesu, ɖo ŋku dzinye, ne eva ɖo wò fiaɖuƒe la me.

⁴³Eye wògblɔ nɛ bena: Vavã mele egblɔm na wò bena: Egbea ke nana Paradiso la me kplim.

⁴⁴Eye ano gaƒoƒo adelia me la zãdokeli do ɖe anyigba blibo la katã dzi vaseɖe gaƒoƒo asiekelia dzi,

⁴⁵eye ɣe la ɖo viviti, eye mawuxɔmetsovɔ la dze ɖe eve kpla.

⁴⁶Eye esi Yesu do ɣli kple gbe sesĩe la, egblɔ bena: Fofo, asiwò me metsɔ nye gbɔgbɔ la de; ke esi wògblɔ esia la, etsɔ gbɔgbɔ la na.

⁴⁷Eye esi asrafowo dzikpɔla kpɔ nusiwo va dzɔ la, ekafu Mawu gblɔ bena: Vavã amesia nye ame dzɔdzɔe.

⁴⁸Eye ameha, siwo katã va ƒo ƒu ɖe nukpɔkpɔ sia ŋu la, esi wokpɔ nusiwo va dzo la, wogbugbɔ hele woƒe akɔtawo ƒom.

⁴⁹Eye eƒe ame nyanyɛwo katã kple nyɔnu, siwo dze eyome tso Galilea la, le tsitre le adzoge ke hele nusiawo kpam ɖa.

⁵⁰Eye kpɔ ɖa, ŋutsua ɖe, si ŋkɔ enye Yosef, amesi nye adaŋudela kple ame nyui kple ame dzɔdzɔe,

⁵¹(amesia melɔ̃ woƒe adaŋudede kple woƒe nuwɔwɔ dzi o,) etso Arimatia, si nye Yudatɔwo ƒe dua ɖe la, eye wòle mawufiaɖuƒe la lalam;

⁵²amesia yi Pilato gbɔ ɖabia Yesu ƒe kukua.

⁵³Eye woɖee ɖe anyi, eye wòxatsa aklala ɖe eŋu, eye wòtsɔe mlɔ yɔdo, si woɖe ɖe kpe gbadza me la me, esi me amea ɖeke memlɔ kpɔ o.

⁵⁴Eye wònye dzadzraɖoŋkeke, eye Sabat tu aƒe.

⁵⁵Eye nyɔnu, siwo dze eyome tso Galilea va la, kpɔ yɔdo la ɖa, kple alesi wotsɔ eƒe kuku la mlɔ anyii.

⁵⁶Eye wogbugbɔ yi ɖadzra atike ʋeʋẽe kple ami ɖo. Ke wodzudzɔ le Sabat dzi le se la nu.