Read ewe Luka 24 Bible Online

Luka 24 - ewe bible

Luka 24

¹Eye le kwasiɖa ƒe ŋkeke gbãtɔ ƒe ŋdikanya la wova yɔdo la gbɔ, eye wotsɔ atike ʋeʋẽe, si wodzra ɖo la, de asi, eye amea ɖewo hã kpe ɖe wo ŋu heva.

²Ke wokpɔ be, wòmũ kpe la ɖa le yɔdo la nu.

³Eye esi woyi de eme la, womekpɔ Aƒetɔ Yesu ƒe kuku la o.

⁴Eye wòva ve me, esi wotsi dzodzodzoe le esia ŋuti la, kpɔ ɖa, ŋutsu eve le tsitre de wo gbɔ le awu ʋlaya dadzowo me;

⁵ke esi wovɔ̃, eye wode mo to la, wogblɔ na wo bena: Nukaŋuti miele ame gbagbe dim le ame kukuwo dome mahã?

⁶Mele afisia o, ke boŋ etsi tre; mido ŋku edzi, alesi wògblɔ na mi, esime wogale Galilea la bena:

⁷Ele be, woade Amegbetɔvi la asi na nuvɔ̃wɔlawo, eye woaklãe de ati ŋuti, eye ŋkeke etɔ̃agbe la wòatsi tre!

⁸Eye wodo ŋku eƒe nyawo dzi,

⁹eye esi wogbugbɔ tso yɔdo la gbɔ la, woka nusiawo katã ta na ame wuidekɛawo kple ame mamleawo katã.

¹⁰Ke amesiwo gblɔ nusiawo na apostoloawo la, woawoe nye Maria, Magdalatɔ, kple Yohana kple Maria, Yakobo dada, kple nyɔnu mamle, siwo kpe de wo ŋuti.

¹¹Eye nya siawo dze le woƒe ŋku me abe bometsinya ene, eye womexɔ wo dzi se o.

¹²Ke Petro tsi tre, eye wòƒu du yi yɔdo la gbɔ, eye esi wòdo kɔ de eme la, ekpɔ aklala ɖeɖeko, eye wòdzo yi aƒe, eye eƒe mo wo yaa le nusi va dzo la ŋuti.

¹³Eye kpɔ ɖa, le ŋkeke ma dzi la wo dome ame eve yina de kɔƒea de, si ŋkɔ nye Emaus la me, eya kple Yerusalem dome anɔ stadio blaade.

¹⁴Eye wole dze ɖom kple wo nɔewo le nusiawo katã, siwo va dzɔ la ŋuti.

¹⁵Eye wòva ve me bena, esi wole dze ɖom, eye wole wo nɔewo biam la, Yesu ŋutɔ va tu wo hele azɔli zɔm kpli wo.

¹⁶Gake woƒe ŋkuwo dzi tsyɔ, bena womedze sii o.

¹⁷Eye wògblɔ na wo bena: Nya ka ƒomeviwo nye esi ŋuti miele dze ɖom le le mia nɔewo dome le miaƒe azɔlizɔzɔ me, eye miele nublanuinu wɔm ale?

¹⁸Eye wo dometɔ ɖeka, si ŋkɔ nye Kleopa la, do ŋu gblɔ ne bena: Alo wò ɖeka koe dze Yerusalem, eye mènya nusiwo va dzɔ le eme le ŋkeke siawo me o mahã?

¹⁹Egblɔ na wo bena: Ka wòe? Eye woɖo ŋu nɛ bena: Yesu, Nazaretetɔ la, ŋutinyae, amesi nye nyagblɔɖila ŋusẽtɔ le nuwɔwɔ kple nyagbɔgblɔ me le Mawu kple dukɔ la ƒe ŋku me;

²⁰alesi miaƒe nunɔlagãwo kple dumegãwo ɖee asi, be woatso kufia nɛ, eye woaklãe ɖe ati ŋuti.

²¹Ke miawo la miekpɔ mɔ bena, eyae nye amesi le Israel ɖe ge. Kpe ɖe esiawo katã ŋuti la egbee nye ŋkeke etɔ̃lia, tso esime nusiawo va ve me.

²²Gawu la mia dome nyɔnua ɖewo hã, siwo de yɔdo la gbɔ ŋdikanya la, do voɖi na mí;

²³eye esi womekpɔ eƒe kukua o la, wova gblɔ bena, yewokpɔ mawudɔlawo, amesiwo gblɔ bena: Ele agbe!

²⁴Eye mía dometɔa ɖewo yi yɔdo la gbɔ, eye wokpɔe, abe alesi nyɔnuawo gblɔ ene; ke eya ŋutɔ la womekpɔe o.

²⁵Eye wògblɔ na wo bena: O, ame masenugɔmewo kple amesiwo ƒe dzi le blewu be, woaxɔ nusiwo katã nyagblɔɖilawo gblo ɖi la, dzi ase.

²⁶Alo mele na Kristo be, wòakpe nusiawo ƒe fu, eye wòayi ɖe eƒe ŋutikɔkɔe la me o mahã?

²⁷Eye esi wòdze egɔme tso Mose kple nyagblɔɖilawo katã dzi la, ede nusiwo le ŋɔŋlɔawo katã me le eŋuti la, ƒe gome fia wo.

²⁸Eye esi wogogo kɔƒe, si me yina wole la, ewɔ abe ɖe wòle eme tsom ene.

²⁹Eye wozi edzi gblɔ bena: Na anyi kpli mí, elabena zã le dodom, eye ŋkeke la yi vɔ. Eye wòyi de eme, be yeanɔ anyi kpli wo.

³⁰Eye wòva ve me bena, esi eya kple wo le nuɖuƒe la, etsɔ abolo la, eye esi wòyra ɖe edzi, eye wòŋe eme la, etsɔe na wo.

³¹Tete woƒe ŋkuwo ʋu, eye wodze sii, eye wobu vi le wo gbɔ.

³²Eye wogblɔ na wo nɔewo bena: Alo míaƒe dzi melé dzo le mia me, esi wòle nu ƒom na mi le mɔa dzi, eye wòle ŋɔŋlɔawo me ɖem na mí la o mahã?

³³Eye wotsi tre le gaƒoƒo ma ke dzi, eye wogbugbɔ yi Yerusalem, eye wokpɔ ame wuiɖekɛawo kple amesiwo kpe ɖe wo ŋuti la, ƒo ƒu ɖi,

³⁴eye wogblɔ bena: Aƒetɔ la tsi tre vavã, eye wòɖe eɖokui fia Simon.

³⁵Eye woawo la woxlẽ nusiwo va dzo le mɔa dzi kple alesi wodze sii le aboloŋeŋe la me la, fia wo.

³⁶Ke esi wole nu ƒom le nusiawo ŋuti la, eya ŋutɔ tsi tre ɖe wo titina, eye wògblɔ na wo bena: Ŋutifafa nanɔ anyi kpli mi!

³⁷Eye woɖi vo, eye wovɔ̃ ŋutɔ, eye wosusu bena, yewokpɔ gbɔgbɔa ɖe.

³⁸Eye wògblɔ na wo bena: Nuka wɔ mieʋuʋu, eye nukaŋuti ɖikeke ɖo miaƒe dzi me mahã?

³⁹Mikpɔ nye asiwo kple nye afɔwo ɖa bena, nye ŋutɔe nye esi; miƒo asi ŋunye, eye miakpɔe; elabena lã kple ƒu meli na gbɔgbɔ, abe alesi miekpɔ le ŋunye la ene o.

⁴⁰Eye esi wògblɔ esia la, etso eƒe asiwo kple eƒe afɔwo hefiã wo.

⁴¹Ke esi womexɔe se o le dzi, si dzo wo kple nuku, si wòwɔ na wo ŋuti la, egblɔ na wo bena: Nuɖuɖua ɖe le mia si le afisia mahã?

⁴²Eye wotso kalãmi kakɛa ɖe nɛ.

⁴³Eye wòtsɔe heɖu le woƒe ŋku me.

⁴⁴Eye wògblɔ na wo bena: Esiawo nye nye nya, siwo megblɔ na mi, esi megali kpli mi la bena: Ele be, woawu nusiwo katã woŋlɔ ɖe Mose ƒe se la kple nyagblɔɖilawo kpakple Psalmowo me le ŋutinye la nu.

⁴⁵Tete woʋu woƒe tame, bena wòase ŋɔŋlɔawo gome;

⁴⁶eye wògblɔ na wo bena: Nenema woŋlɔ ɖi bena: Kristo lakpe fu, eye wòatsi tre tso ame kukuwo dome le ŋkeke etɔ̃agbe;

⁴⁷eye bena, woaɖe gbe ƒã dzimetɔtrɔ hena nuvɔ̃wo ƒe keke le eƒe ŋkɔa dzi na dukɔwo katã la, adze gɔme atso Yerusalem.

⁴⁸Miawoe nye nusiawo ƒe ɖaseɖilawo.

⁴⁹Eye nye la mado Fofonye ƒe ŋugbedodo la ɖe mia dzi; ke miawo la minɔ Yerusalem-du la me, vaseɖe esime woatso ŋusẽ atso dziƒo ado na mi.

⁵⁰Eye wòkplɔ wo do go vaseɖe Betania, eye wòkɔ eƒe asiwo dzi heyra wo.

⁵¹Eye wòva ve me, esime wòle wo yram la, wotee ɖa le wo gbɔ, eye wokɔe yi dziƒo.

⁵²Eye esi wodze klo de ta agu nɛ la, wogbugbɔ yi Yerusalem kple dzidzɔ gã;

⁵³eye wonɔa mawuxɔ la me ɖaa henɔa Mawu kafum.