Read ewe Luka 3 Bible Online

Luka 3 - ewe bible

Luka 3

¹Eye le kaisaro Tiberio ƒe fiaɖuɖu ƒe ƒe wuiatɔ̃lia me, esi Pontio Pilato le mɔ̃mefia ɖum le Yudea, eye Herodes enye dziɖula le Galilea, eye nɔvia Filipo enye dziɖula le Iturea kple Traxoniti-nyigbawo dzi, eye Lisania enye dziɖula le Abilene,

²eye Hana kple Kayafa wonye nunɔlagãwo la, Mawu ƒe nya va Yohanes, Zaxarya vi la gbɔ le gbedzi.

³Eye wòva Yordan-nutowo katã me godoo hele gbe ƒã ɖem dzimetɔtrɔ ƒe mawutsidedetaname hena nuvɔ̃wo ƒe keke;

⁴alesi woŋlɔ ɖi le nyagblɔɖila Yesaya ƒe nyagblɔɖigbalẽ me bena: „Amesi le ɣli dom le gbeadzi ƒe gbe enye esi: Midzra Aƒetɔ ƒe mɔ la ɖo, miwɔ eƒe mɔtatawo dzɔdzɔe.

⁵Woaxe ʋe sia ʋe, eye woabɔbɔ to sia to kple togbɛ sia togbɛ ɖe anyi, eye mɔ gɔglɔ̃wo lazu dzɔdzɔe, eye mɔ tsakliwo lazu zɔzrɔ̃e!

⁶Eye ŋutilã katã akpɔ Mawu ƒe xɔxɔ la.

⁷Azɔ egblɔ na ameha, siwo do go, bena wòaɖe mawutsi ta na yewo la bena: Dawo ƒe dzidzimewo! Amekae gblɔe fia mi bena, miasi atso dɔmedzoe, si gbɔna la nu mahã?

⁸Azɔ mitse ku, siwo dze dzimetɔtrɔ, eye migade asi gbɔgblɔ me le mia ɖokui me bena: Abraham ye nye mía fofo o; elabena mele egblɔm na mi bena: Mawu ate ŋu anyɔ viwo atso kpe siawo me ke na Abraham.

⁹Ke wotsɔ fia ɖo atiwo ƒe ke dzi gɔ̃ hã xoxo; azɔ ati sia ati, si metsea ku nyui o la, wolãnɛ, eye wotsɔnɛ ɖea dzo me.

¹⁰Eye amehawo biae bena: Ekema nuka wɔ ge míala?

¹¹Eye wòɖo ŋu gblɔ na wo bena: Amesi awu eve le esi la, nena amesi ɖeke mele esi o, eye amesi nunyiame le esi la, newɔ nenema ke.

¹²Eye nudzɔlawo hã va be, wòade mawutsi ta na yewo, eye wogblɔ nɛ bena: Nufiala, nuka wɔ ge míala?

¹³Eye wògblɔ na wo bena: Nusi ke woɖo na mi la, migaxɔ xɔɖedzi o.“

¹⁴Eye asrafowo hã biae gblɔ bena: Miawo hã nuka wo ge míala? Eye wògblɔ na wo bena: Migado ŋɔdzi na amea ɖeke xɔ nu le esi o, eye migatso amea ɖeke nu hã dzro o, eye miaƒe fetu nadze mia ŋu!

¹⁵Ke esi dukɔ la le nukpɔkpɔ me, eye wo katã wole ɖi kem le woƒe dzi me le Yohanes ŋuti be, ɖewo mahĩ eyae nye Kristo la la,

¹⁶Yohanes ɖo ŋu gblɔ na wo bena: Nye la metsɔ tsi de mawutsi ta na mi; ke amesi tri akɔ wum, amesi ƒe atokotawo nu ka medzem be, matui o la, eya ŋutɔ gbɔna be, wòatsɔ Gbɔgbɔ kɔkɔe kple dzo ade mawutsi ta na mi;

¹⁷amesi si lugbɔnu le, be wòakplɔ eƒe lugbɔƒe keŋkeŋ, eye wòaƒo lu la ƒu alɔ ɖe eƒe ava me; ke tsroa la, wòatsɔ dzo matsimatsi atɔe.

¹⁸Eye wògblɔ nyanyuie fia dukɔ la hele nu xlɔ̃m wo le nu bubu ƒomevi geɖewo hã ŋuti;

¹⁹ke dziɖula Herodes, si wogbe nya na le Herodia, nɔvia srɔ̃ kple nu vɔ̃ɖi, siwo katã Herodes wɔ la ŋuti la,

²⁰etsɔ Yohanes de gaxɔ me hekpe ɖe nusiawo katã ŋuti.

²¹Eye esi wòde mawutsi ta na dukɔ la katã, eye woɖee na Yesu hã la, edo gbe ɖa, eye wòva ve me bena, dziƒo ʋu,

²²eye Gbɔgbɔ kɔkɔe la ɖi le nɔnɔmekpɔkpɔ me abe akpakpa ene ɖe, eyama dzi, eye gbe ɖi tso dziƒo gblɔ bena: Wòe nye vinye, si gbɔ nyemelɔ̃a nu le o, wò me mekpɔa ŋudzedze lena.

²³Eye Yesu ŋutɔ, esi wòdze ɖɔ gɔme la, exɔ ƒe anɔ ƒe blaetɔ̃, eye wònye — le amewo ƒe susu nu — Yosef vi, amesi nye Eli vi,

²⁴amesi nye Mata vi, amesi nye Lewi vi, amesi nye Melxi vi, amesi nye Yona vi, amesi nye Yosef vi,

²⁵amesi nye Matatia vi, amesi nye Amos vi, amesi nye Nahum vi, amesi nye Esli vi, amesi nye Nagae vi,

²⁶amesi nye Mahat vi, amesi nye Matatia vi, amesi nye Semei vi, amesi nye Yosef vi, amesi nye Yuda vi,

²⁷amesi nye Yohanan vi, amesi nye Resa vi, amesi nye Zerubabel vi, amesi nye Salatiel vi, amesi nye Neri vi,

²⁸amesi nye Melxi vi, amesi nye Adi vi, amesi nye Kosam vi, amesi nye Elmadam vi, amesi nye Er vi,

²⁹amesi nye Yose vi, amesi nye Eliezer vi, amesi nye Yorim vi, amesi nye Matat vi, amesi nye Lewi vi,

³⁰amesi nye Simeon vi, amesi nye Yuda vi, amesi nye Yosef vi, amesi nye Yonan vi, amesi nye Eliakim vi,

³¹amesi nye Melea vi, amesi nye Mena vi, amesi nye Matata vi, amesi nye Natan vi, amesi nye Dawid vi,

³²amesi nye Isai vi, amesi nye Obed vi, amesi nye Boaz vi, amesi nye Salmon vi, amesi nye Nahason vi,

³³amesi nye Aminadab vi, amesi nye Aram vi, amesi nye Esron vi, amesi nye Fares vi, amesi nye Yada vi,

³⁴amesi nye Yakob vi, amesi nye Isak vi, amesi nye Abraham vi, amesi nye Tara vi, amesi nye Nahor vi,

³⁵amesi nye Seruk vi, amesi nye Regu vi, amesi nye Peleg vi, amesi nye Eber vi, amesi nye Sala vi,

³⁶amesi nye Kainan vi, amesi nye Arfaksad vi, amesi nye Sem vi, amesi nye Noa vi, amesi nye Lamex vi,

³⁷amesi nye Metusala vi, amesi nye Enox vi, amesi nye Yared vi, amesi nye Mahalaleel vi, amesi nye Kainan vi,

³⁸amesi nye Enos vi, amesi nye Set vi, amesi nye Adam vi, amesi nye Mawu tɔ.