Read ewe Luka 4 Bible Online

Luka 4 - ewe bible

Luka 4

¹Eye Yesu, esi wòyɔ fũ kple Gbɔgbɔ kɔkɔe la, egbugbɔ tso Yordan nu, eye Gbɔgbɔ la kplɔe yi gbedzi,

²eye Abosam le etem kpɔ ŋkeke blane sɔŋ. Eye meɖu naneke le ŋkeke mawo me o, eye esi ŋkekeawo wu nu la, dɔ wui.

³Eye Abosam gblɔ nɛ bena: Nenye Mawuvi nènye la, ekema gblɔ na kpe sia, ne wòatrɔ zu abolo.

⁴Eye Yesu xɔ edzi gblɔ nɛ bena: Woŋlɔ ɖi bena: „Menye abolo ɖeɖeko ŋuti ame lanɔ agbe ɖo o, negbe le Mawu ƒe nya sia nya ŋuti.“

⁵Eye esi wòkplɔe yi to kɔkɔa ɖe dzi la, eɖe xexeme fiaɖuƒewo katã fiae le aɖabaƒoƒo ɖeka me.

⁶Eye Abosam gblɔ ne bena: Wòe matsɔ ŋusẽ sia katã kple woƒe ŋutikɔkɔe ana; elabena nyee wotsɔe de asi na, eye matsɔe ana amesi ke melɔ̃.

⁷Azɔ wò ta, ne ède ta agu nam la, wo katã lazu tɔwo.

⁸Eye Yesu xɔ edzi gblɔ nɛ bena: Woŋlɔ ɖi bena: „Aƒetɔ, wò Mawu la, naɖe la agu na, eye eya ɖeka ko nasubɔ.“

⁹Tete wòkplɔe yi Yerusalem, eye wòtsɔe ɖo mawuxɔ ƒe tsutsuẽƒe, eye wògblɔ nɛ bena: Nenye Mawuvi nènye la, ekema tsɔ ɖokuiwò xlã ɖe anyi tso afisia:

¹⁰elabena woŋlɔ ɖi bena: „Ade se na eƒe dɔlawo le ŋutiwò bena, woakpɔ tawò nyuie,

¹¹eye woƒe asiwò me woatsɔ wò aɖo, bena nagatsɔ wò afɔ axlã de kpea ɖeke o.“

¹²Eye Yesu xɔ edzi nɛ bena: Wogblɔ ɖi bena: „Megate Aƒetɔ, wò Mawu la, kpɔ o!“

¹³Eye esi Abosam wu tetekpɔwo katã nu la, ete ɖa le egbɔ gbɔ.

¹⁴Eye Yesu gbugbɔ yi Galilea le Gbɔgbɔ la ƒe ŋusẽ me; eye eƒe ŋkɔ ɖi hoo le afima nutoawo katã me godoo.

¹⁵Eye wòfiã nu le woƒe ƒuƒoƒewo, eye wo katã wokafui.

¹⁶Eye wòva Nazaret, afisi wonyii le, eye le eƒe kɔa nu la eyi ɖe ƒuƒoƒe la le Sabat-ŋkeke dzi, eye wòtsi tre be, yeaxlẽ agbalẽ.

¹⁷Eye wotso nyagblɔɖila Yesaya ƒe agbalẽ nɛ, eye esi wòdu agbalẽa la, ekpɔ teƒe, afisi woŋlɔ ɖo bena:

¹⁸Aƒetɔ ƒe Gbɔgbɔ le dzinye, le esi ta wosi ami nam ɖo, bena magblɔ Nyanyuie afia ame dahewo, edɔm, bena mayɔ dɔ amesiwo ƒe dzi gbã,

¹⁹eye be maɖe gbe ƒã ɖokuisinɔnɔ na aboyomewo kple nukpekpe na ŋkuagbãtɔwo, be mana amesiwo wole funyafunya wɔmi la, nanɔ wo ɖokui si, eye be maɖe gbe ƒã Aƒetɔ ƒe ƒe nyui la.“

²⁰Eye esi wòtu agbalẽa la, etsɔe na dɔla la, eye wòbɔbɔ nɔ anyi, eye amesiwo katã le ƒuƒoƒea la, fɔ ŋku ɖe edzi dzoɣlii.

²¹Eye wòde asi gbɔgblɔ me na wo bena: Egbe wowu ŋɔŋlɔ sia nu le miaƒe towo me.

²²Eye ameawo katã ɖi ɖase nɛ, eye woƒe mo wo yaa le amenuvevenya, siwo do go tso eƒe nu me lã ŋuti, eye wogblɔ bena: Alo amesia la menye Yosef vie o ɖe?

²³Eye wògblɔ na wo bena: Míado lo sia nam tsã be: „Gbedala, da gbe ɖokuiwò ŋu!“ Nusiwo miese bena, nèwɔ le Kapernaum la, wɔe le mía ɖe afisia hã.

²⁴Eye wògblɔ bena: Vavã mele egblɔm na mi bena: Nyagblɔɖilaa ɖeke medzea ye ŋutɔ detɔwo ŋu o.

²⁵Ke nyateƒe gblɔm mele na mi bena: Ahosi geɖewo le Israel le Eliya ƒe ŋkekewo me, esime wotu dziƒo nu ƒe etɔ̃ kple ɣleti ade, eye dɔwuame gãa ɖe va anyigba la katã dzi;

²⁶eye womeɖo Eliya ɖe wo dometɔa ɖeke gbɔ o, negbe ɖe Sarepta le Zidon-nyigba dzi de nyanu ahosia ɖe gbɔ ko.

²⁷Eye anyidzela geɖewo le Israel le nyagblɔɖila Elisa gali, eye womeklɔ wo dometɔa ɖeke ŋuti o, negbe Naeman, Siriatɔ la ko.

²⁸Eye esi amesiwo katã le ƒuƒoƒe la, se nusiawo la, dome ve wo ŋutɔ;

²⁹eye wotsi tre, eye wotu asi ʋume nɛ do go le dua me, eye wokplɔe vaseɖe to, si dzi wotso woƒe dua ɖo la, ƒe abunu, bena woatrɔ gboe aƒu abu me.

³⁰Ke eto wo titina ke heyi kɔ̃.

³¹Eye wòɖi va Kapernaum, si nye Galilea-du la me. Eye wòle nu fiam wo le Sabat-ŋkeke dzi;

³²eye kuvia ɖo wo le eƒe nufiafia la ŋuti, elabena egblɔ nya ŋusẽtɔe.

³³Eye ŋutsua ɖe le ƒuƒoƒe la, amesi me Abosam ƒe gbɔgbɔ bliba le, eye wòdo ɣli kple gbe sesĩe bena:

³⁴Ago gbɔ, nya kae le mía kpli wò dome, wò Yesu, Nazaretetɔ? Ɖe nèva mía tsrɔ̃ gea? Menya wò amesi nènye: Mawu ƒe kɔkɔetɔ la nènye.

³⁵Eye Yesu wo ɖe eta gblɔ bena: Mia wò nu, eye naɖo go le eme! Eye esi Abosam la tsoe xlã ɖe titina la, eɖo go le eme, eye mewo nu ve-via ɖekee o.

³⁶Eye kuvia ɖo wo katã, eye wogblɔ le wo nɔewo dome bena: Nuka nyae nye esi ma? Elabena ekpɔ mɔ kple ŋusẽ hedea se na gbɔgbɔ blibawo, eye woɖoa go.

³⁷Eye eƒe ŋkɔ ɖi hoo le afima nutowo katã me godoo.

³⁸Ke esi wòtsi tre la, edo go le ƒuƒoƒe la heyi ɖe Simon ƒe me. Eye Simon lɔ̃xo le ŋudza sesẽa ɖe lém, eye woɖe kuku nɛ ɖe eta.

³⁹Eye esi wòtsi tre bi ɖe edzi la, ewo ɖe ŋudza la ta, eye wòdzo le edzi; ke etsi tre enumake, eye wòsubɔ wo.

⁴⁰Eye esime ɣe le to ɖom la, amesiwo katã si dɔléla bubu ƒomeviwo le la, wotsɔ wo va egbɔ, eye wòda asiwo ɖe wo dome ɖesiaɖe dzi ɖekaɖeka heda gbe wo ŋu.

⁴¹Eye gbɔgbɔ vɔ̃wo hã do go le ame geɖewo me, eye wole ɣli dom le gbɔgblɔm bena: Wòe nye Mawu ƒe Vi la. Eye wòwona ɖe wo ta, eye mena mo wo be, woaƒo nu o, elabena wonyae bena, eyae nye Kristo la.

⁴²Eye esi ŋu eke la, edo go heyi gbedzi, eye amehawo dii, eye wova egbɔ, eye wosikae ɖi, bena megadzo le yewo gbɔ o.

⁴³Ke egblɔ na wo bena: Ele nam be, magblɔ mawufiaɖuƒe la ŋu nyanyuie afia du bubuawo hã; elabena eyata wodɔm ɖo.

⁴⁴Eye wòle nya gblɔm le Galilea ƒuƒoƒeawo.