Read ewe Luka 9 Bible Online

Luka 9 - ewe bible

Luka 9

¹Eye wòyɔ nusrɔ̃la wuieveawo ƒo ƒu, eye wòna ŋusẽ kple mɔ wo ɖe gbɔgbɔ vɔ̃wo katã dzi, eye be, woaɖe dɔlélewo ɖa.

²Eye wòdɔ wo ɖa be, woaɖe gbe ƒã mawufiaɖuƒe la, eye be woada gbe dɔlélawo ŋu.

³Eye wògblɔ na wo bena: Migatsɔ naneke ɖe asi hena mɔzɔzɔ o, ati loo, alo kotoku alo abolo alo klosalo alo awu eve o.

⁴Eye aƒe, si ke me miage ɖo la, minɔ afima, eye miagadze mɔ atso afima.

⁵Eye amesiwo mexɔ mi o la, ne miele dzodzo ge le du ma me la, miʋuʋu ke le miaƒe afɔwo ŋuti hena ɖaseɖiɖi ɖe wo ŋuti.

⁶Eye esi wodzo la, woyi ɖato kɔƒeawo me hele nyanyuie la gblɔm fia, eye wole gbe dam le amewo ŋu le afisiafi.

⁷Ke esi dziɖula Herodes se nusiwo katã wòwɔ la, etsi dzodzodzoe, elabena amea ɖewo gblɔ be: Yohanes tsi tre tso ame kukuwo dome;

⁸eye ɖewo hã gblɔ bena: Eliya ɖe eɖokui fia; eye ame bubuwo gblɔ bena: Blema nyagblɔɖilaa ɖe gatsi tre.

⁹Ke Herodes gblɔ bena: Yohanes la, metso ta le enu, ke ameka nye esia, amesi ŋuti mese nusiawo tɔgbe le mahã? Eye wòdi be, yeakpɔe.

¹⁰Eye esi apostoloawo tro va la, woxlẽ nusiwo wowɔ la fiae. Eye wòtso wo kpe ɖe eɖokui ŋu hekplɔ wo ɖe aga ɖe dua ɖe, si woyɔna be Betsaida la me.

¹¹Ke esi amehawo dze sii la, wodze eyome, eye wòxɔ wo, eye wòƒo nu na wo le mawufiaɖuƒe ŋuti, eye amesiwo hiã gbedala la, eda gbe le wo ŋu.

¹²Eye esi fiẽ le ɖoɖom la, ame wuieveawo va egbɔ gblɔ ne bena: Ɖe asi le ameha la ŋu, bena wòayi ɖe kɔƒeawo me kple agbleta, siwo ƒo xlã mi la, eye wòadze afima, eye woakpɔ nuɖuɖu, elabena gbedzi míele le afisia.

¹³Ke egblɔ na wo bena: Miawo la mina nu wo, ne woaɖu. Eye wogblɔ bena: Naneke mele mia si wu abolo atɔ̃ kple tomelã eve o; negbe ɖeko míayi aɖa ƒle nuɖuɖu na ameha sia katã.

¹⁴Ke wo nu anɔ ŋutsu akpe atɔ̃. Eye wògblɔ na eƒe nusrɔ̃lawo bena: Mina woabɔbɔ nɔ anyi le hahawo me, ɖesiaɖe blaatɔ̃.

¹⁵Eye wowɔ nenema, eye wona wo katã bɔbɔ nɔ anyi.

¹⁶Eye wòtsɔ abolo atɔ̃ la kple lã eveawo, eye esi wòkpo dziƒo la, eyra ɖe wo dzi, eye wòŋe wo me hetsɔe na nusrɔ̃viwo be, woatsɔ wo ana ameha la.

¹⁷Eye woɖu nu, eye wo katã woɖi ƒo; eye wofa kakɛ, siwo susɔ la, ɖe kevi wuieve me heyii.

¹⁸Eye wòva ve me bena, esi eya ɖeka le gbe dom ɖa la, nusrɔ̃lawo le eŋu, eye wòbia wo bena: Ameka amehawo gblɔna bena, menye mahã?

¹⁹Eye woɖo ŋu gblɔ bena: Yohanes mawutsidetanamelae, ke bubuwo bena: Eliya, eye ame bubuwo bena: Blema nyagblɔɖilaa ɖe gatsi tre.

²⁰Eye wògblɔ na wo bena: Ke miawo la, ameka miegblɔna bena, menye mahã? Eye Petro ɖo ŋu gblɔ bena: Mawu ƒe Kristo la.

²¹Ke egbe nya na wo, eye wòɖe se na wo bena, woagagblɔ esia na amea ɖeke o

²²hegblɔ bena: Ele na Amegbetɔvi la be, woakpe fu geɖe, eye amegãwo kple nunɔlagãwo kple agbalẽfialawo aɖo vloe, eye woawui, eye ŋkeke etɔ̃agbe la atsi tre.

²³Eye wògblɔ na wo katã bena: Ne amea ɖe le didim be, yeadze yonyeme la, negbe nu le ye ŋutɔ gbɔ, eye wòatsɔ eƒe atitsoga gbawotsyogbe, eye wòadze yonyeme.

²⁴Elabena amesi ke ɖi bena, yeaɖe yeƒe agbe la, atsrɔe, ke amesi ke atsrɔ̃ eƒe agbe le tanye la, aɖee.

²⁵Elabena viɖe ka wòanye na ame, ne xexeme blibo la katã zu etɔ, eye woatsrɔ̃, alo wòabu ye ŋutɔ ɖokui mahã?

²⁶Elabena amesi ke kpe ŋu nye kple nye nyawo la, Amegbetɔvi la akpe ŋu eya hã, ne ava le eya ŋutɔ kple Fofoa kple mawudɔla kɔkɔeawo ƒe ŋutikɔkɔe la me.

²⁷Ke mele egblɔm na mi nyateƒelɔe bena: Amea ɖewo le amesiwo le tsitre le afisia dome, esiwo mele ku ɖɔ ge akpɔ, vaseɖe esime woakpɔ mawufiaɖuƒe la o.

²⁸Eye wòva ve me anɔ ŋkeke enyi le nya siawo megbe bena, esi wòɖe Petro kple Yohanes kple Yakobo kpe ɖe eɖokui ŋu la, eyi to la dzi, be yeado gbe ɖa.

²⁹Eye esime wòle gbe dom ɖa la, eƒe mo ƒe dzedzeme trɔ, eye eƒe awu fu tititi hele dzo dam kaŋkaŋ.

³⁰Eye kpɔ ɖa, ŋutsu eve wole dze ɖom kplii, amesiwo nye Mose kple Eliya;

³¹amesiawo ɖe wo ɖokui fia le ŋutikɔkɔe me, eye woƒo nu le eƒe gododo, si nu wu ge wòala le Yerusalem la ŋuti.

³²Eye alɔ̃ tsɔ Petro kple amesiwo kpe ɖe eŋu la ŋutɔ, ke esi woƒe mo kɔ keŋ la, wokpɔ eƒe ŋutikɔkɔe la kple ŋutsu eve, siwo le tsitre ɖe egbɔ.

³³Eye wòva ve me, esi wole dzodzom le egbɔ la, Petro gblɔ na Yesu bena; Amegã, enyo na mí bena, mianɔ afisia; eye míawɔ agbadɔ etɔ̃, tɔwo ɖeka, Mose tɔ ɖeka, kple Eliya tɔ ɖeka; eye menya nusi gblɔm wòle o.

³⁴Ke esi wòle nusiawo gblɔm la, alilikpo va, eye wòdo vɔvɔli ɖe wo dzi; ke wovɔ̃, esi woyi ɖe alilikpo la me.

³⁵Eye gbe ɖi tso alilikpo la me gblɔ bena: Amesia enye vinye tiatia, miɖo to eyama!

³⁶Eye esi gbe la ɖi la, wokpɔ Yesu ɖeka ko. Eye wozi kpi, eye wometo nusiwo wokpɔ la ƒe ɖeke na amea ɖeke le ŋkeke mawo me o.

³⁷Esi ŋu eke, eye wole ɖiɖim tso to la dzi la, eva ve me bena, ameha gãa ɖe va kpee.

³⁸Eye kpɔ ɖa, ŋutsua ɖe tso ameha la me do ɣli bena: Nufiala, meɖe kuku na wò be, nakpɔ vinyeŋutsuvi ɖa, elabena nye tenu wònye;

³⁹eye kpɔ ɖa, gbɔgbɔa ɖe lénɛ, eye kasia wòdoa ɣli, eye wònyamanɛ ale bena, futukpɔ dona le enu, eye bebli hafi wòdzona le edzi, eye wògbãa lãme nɛ bliblibli.

⁴⁰Eye meɖe kuku na wò nusrɔ̃lawo be, woanyãe do goe, eye womete ŋui o.

⁴¹Eye Yesu xɔ edzi gblɔ bena: O, dzidzime maxɔse kple dzidzime totro kpaɖikpaɖi! Ɣekaɣi dzi manɔ anyi kpli mi, eye mado dzi ahe mi ase ɖo mahã? Kplɔ viwò la va afisi.

⁴²Eye esi wògbɔna la, gbɔgbɔ la hee ƒu anyi, eye wònyamae ŋutɔ. Ke Yesu wo ɖe gbɔgbɔ bliba la ta, eye wòda gbe le ɖevi la ŋu, eye wòtsɔe na fofoa.

⁴³Eye kuvia ɖo wo katã le Mawu ƒe gãnyenye ŋuti. Ke esi wo katã ƒe mo wɔ yaa le nusiwo katã wòwɔ ŋuti la, egblɔ na eƒe nusrɔ̃lawo bena:

⁴⁴Miawo la milé nya sia ɖo miaƒe towo me; elabena wole Amegbetɔvi la de ge asi na amewo.

⁴⁵Ke woawo la womese nya sia gɔme o, eye wòle ɣaɣla ɖe wo bena, ne womagadze sii o, eye wova le nya sia biabia ŋuti.

⁴⁶Eye nusesẽa ɖe ɖo wo dome bena, yewo dometɔ kae nye gã wu?

⁴⁷Ke esi Yesu kpo woƒe dzimesusuwo la, etso ɖevia ɖe ɖo exa;

⁴⁸eye wògblɔ na wo bena: Amesi ke axa ɖevi sia le nye ŋkɔ dzi la, nyee wòxɔ, eye amesi ke axɔm la, exɔ amesi dom la; elabena amesi ke nye suetɔ le mi katã dome la, eyae nye gatɔ.

⁴⁹Eye Yohanes xɔ dzi gblɔ bena: Amegã, miekpɔ amea ɖe le gbɔgbɔ vɔwo nyẽm le go dom le wò ŋkɔ dzi; eye miegbe nɛ, elabena mele mía yome o.

⁵⁰Ke Yesu gblɔ ne bena: Migagbe nɛ o; elabena amesi meto vo ɖe mía ŋuti o la, eya le mía dzi.

⁵¹Ke eva ve me, esime ŋkekeawo le enu wu ge be, woakɔe ayi dziƒo la, eya ŋutɔ tsɔ eƒe ŋku ɖo Yerusalem yiyi dzi;

⁵²eye wòdɔ dɔlawo ɖo ɖe eŋgɔ, eye esi wole yiyim la, wova ge ɖe Samariatɔwo ƒe dua ɖe me, be yewoadzra dzeƒe ɖo ɖi nɛ.

⁵³Eye womexɔe o, elabena Yerusalem yiyi ɖo eƒe ŋku me.

⁵⁴Ke esi nusrɔ̃lawo, Yakobo kple Yohanes, kpɔe la, wogblɔ bena: Aƒetɔ, èlɔ̃ bena, miana dzo natso dziƒo, eye wòafiã wo mahã?

⁵⁵Ke etrɔ, eye wòblu ɖe wo ta gblɔ bena: Alo mienyã gbɔgbɔ ka ƒomevi tɔ míenye o ba?

⁵⁶Elabena Amegbetɔvi la meva, be wòagblẽ amewo ƒe agbe o; ke boŋ, bena wòaɖe wo. Eye wodzo yi ɖe kɔƒe bubu me.

⁵⁷Ke esi wole mɔ dzi yina la, amea ɖe gblɔ nɛ bena: Aƒetɔ, afisi ke nayi ɖo la, manɔ yowòme.

⁵⁸Eye Yesu gblɔ nɛ bena: Abeiwo kpɔ dowo, eye dziƒoxeviwo hã kpɔ atɔwo; ke Amegbetɔvi la mekpɔ afisi wòatsɔ ta aziɔ ɖo o.

⁵⁹Eye wògblɔ na ame bubu bena: Dze yonyeme! Ke eya gblɔ bena: Aƒetɔ, ɖe mɔ nam, be mayi aɖaɖi fofonye hafi.

⁶⁰Ke egblɔ ne bena: Na ame kukuawo naɖi woa ŋutɔwo ƒe kukuawo; ke wò la yi ɖagblɔ mawufiaɖuƒe la fia.

⁶¹Eye ame bubu hã gblɔ bena: Aƒetɔ, manɔ yowòme; gake ɖe mɔ nam, be mayi aɖaklã amesiwo le aƒenye me hafi.

⁶²Ke Yesu gblɔ nɛ bena: Amesi tsɔ eƒe asi ɖa ɖe kodzi dzi, eye wogale megbe kpɔm la, medze mawufiaɖuƒe la o.