Read ewe Mose V 17 Bible Online

Mose V 17 - ewe bible

Mose V 17

¹Megatsɔ nyitsu alo alé, si nane wɔe alo vloƒea ɖe le eŋu la, sa vɔ na Yehowa, wò Mawu la o, elabena ŋunyɔnu wònye na Yehowa, wò Mawu la.

²Ne ŋutsu alo nyɔnua ɖe le wò du, siwo Yehowa, wò Mawu, le na wò ge la, dometɔa ɖe me, amesiwo nusi medze Yehowa, wò Mawu ŋu o, eye wòtu eƒe nubabla,

³eye wòyi ɖasubɔ mawu bubuwo hede ta agu na wo, eɖanye ɣe alo ɣleti alo dziƒonuwo katã, nusiwo ŋu nyemeɖe se le o,

⁴eye wògblɔe na wò nèse la, ekema ɖi nya la gɔme tsitotsito, eye nenye nyateƒee wowɔ nua, eye wowɔ ŋunyɔnu sia le Israel la,

⁵ekema kplɔ ŋutsu alo nyɔnu ma, si wɔ nu vɔ̃ɖi sia la, do go ɖe wò dua godo, eye naƒu kpe ŋutsu alo nyɔnu la woaku.

⁶Ne ame eve alo ame etɔ̃ ɖi ɖase la, hafi woawu amesi dze ku la, gake ame ɖeka maɖi ɖase woawui o.

⁷Ɖasefoawo natre asiɖeɖe eŋu, emegbe dukɔ blibo la nakpiti ɖe eŋu awui, eye naɖe vɔ̃ la ɖa le dowòme.

⁸Ne amewunya alo dzrenya, avuwɔnya alo nya bubua ɖe dodro sesẽ na wò le wò duwo me la, ekema tso nayi teƒe, si Yehowa, wò Mawu atia,

⁹eye nabia ta le nunɔla, siwo nye Lewitɔwo kpakple ʋɔnudrɔ̃la, si li le ɣemaɣi la gbɔ, eye woagblɔ afiatsonya na wò.

¹⁰Emegbe natso afia, abe alesi wogblɔ na wò le teƒe, si Yehowa atia la ene; eye nawɔ nusiwo katã wotia wò la pɛpɛpɛ.

¹¹Wɔ nusiwo wofia wò kple afiatsonya, siwo wogblɔ na wò la dzi, eye megadze ɖe ɖusi alo mia me le afiatsonya, siwo wogblɔ na wò la me o.

¹²Ke ne amea ɖe sẽ to ɖe nunɔla, si le Yehowa, wò Mawu, subɔm le afima, kple ʋɔnudrɔ̃la ŋu, eye meɖo to wo o la, ekema woawu ame la; eye woaɖe vɔ̃ la ɖa le Israel dome,

¹³bena Israel blibo la nasee, eye wòavɔ̃, ne womagasẽ to azɔ o.

¹⁴Ne eva anyigba, si Yehowa, wò Mawu, le na wò ge la dzi, eye nèxɔe wònye tɔwo nètso aƒe ɖe edzi, emegbe dagblɔ bena: Maɖo fia ɖe ɖokuinye nu abe dukɔ, siwo katã ƒo xlãm ene la,

¹⁵ekema naɖo fia, si Yehowa, wò Mawu, atia la, ɖe ɖokuiwò nu; natsɔ nɔviwòwo dometɔ ɖeka aɖo fia ɖe ɖokuiwò nu; mèkpɔ mɔ aɖo du bubu me tɔ, si menye nɔviwò o la, ɖe ɖokuiwò nu o.

¹⁶Ɖeko sɔ geɖe meganɔ esi o, eye megaɖo dukɔ la ɖe Egipte, be wòaƒle sɔwo o, elabena Yehowa gblɔna mi bena: Migagbugbɔ to mɔ sia dzi o.

¹⁷Fia nagaɖe srɔ̃ geɖe o, ne eƒe dzi nagatre mɔ o, eye klosalo kple sika geɖe akpa hã meganɔ esi o.

¹⁸Eye ne eva fiazi dzi la, wòana Lewitɔwo, siwo nye nunɔlawo la, nagbugbɔ se sia aŋlɔ nɛ ɖe agbalẽ me.

¹⁹Eye wòanɔ esi wòaxlẽ le eƒe agbe me ŋkekewo katã me, ne wòanya alesi wòavɔ̃ Yehowa, eƒe Mawu la, eye wòalé se kple ɖoɖo siawo katã me nyawo me ɖe asi, eye wòawɔ wo dzi,

²⁰ne megado eɖokui ɖe dzi ɖe nɔviawo ŋu, eye wòadze le se la ŋu ɖe ɖusi alo mia me o, ne eya kple viaŋutsuwo nanɔ zi la dzi eteƒe nadidi le Israel dome.