Read ewe Mose V 20 Bible Online

Mose V 20 - ewe bible

Mose V 20

¹Ne èho aʋa ɖe wò futowo ŋu, eye nekpɔ sɔwo, tasiaɖamwo kple aʋakɔ, si sɔ gbɔ wu wò la, megavɔ̃ wo o, elabena Yehowa, wò Mawu, si kplɔ wò tso Egipte-nyigba dzi la, li kpli wò.

²Hafi miava ho aʋa la, nunɔla natsi tre, eye wòaƒo nu kple aʋakɔ la

³agblɔ na wo bena: Israel see, egbe miele aʋa ho ge ɖe miaƒe futowo ŋu, dzi megaɖe le mia ƒo o, eye migavɔ̃ o, dzidzi megaƒo mi o, eye womegadzi ŋɔ na mi o!

⁴Elabena Yehowa, mia Mawu, ayi kpli mi, be wòawɔ aʋa kple miaƒe futɔwo na mi, eye wòaxɔ na mi.

⁵Eye dzikpɔlawo nagblɔ na aʋakɔ la bena: Ne ŋutsua ɖe tu xɔ yeye, eye meʋu ɖe eme haɖe o la, ekema wòagbugbɔ ayi aƒe, bena magaku ɖe aʋa me, eye ŋutsu bubu naʋu ɖe eme o.

⁶Ne ŋutsua ɖe de weingble, eye mede nu eme nua ɖeke ŋu haɖe o la, ekema wòagbugbɔ ayi aƒe, bena magaku ɖe aʋa me, eye ŋutsu bubu nawɔ eŋu ɖɔ o.

⁷Ne ŋutsua ɖe bia nyɔnu ta, eye mekpɔ ɖee haɖe o la, ekema wòagbugbɔ ayi aƒe, bena magaku ɖe aʋa me, eye ŋutsu bubu naɖee o.

⁸Eye dzikpɔlawo naƒo nu kple aʋakɔ la ayi dzi agblɔ bena: Ne ŋutsua ɖe le vɔvɔ̃m, eye dzi mele eƒo o la, ekema wòagbugbɔ ayi aƒe, bena magade vovɔ̃ lãme na nɔviawo abe eya ŋuta ene o.

⁹Eye ne dzikpɔlawo ƒo nu kple aʋakɔ la vɔ la, ekema woaɖo aʋafiawo aʋakɔ la nu.

¹⁰Ne èho aʋa ɖe dua ɖe ŋu, eye nete tui la, ekema bia be, wòana ta.

¹¹Ne wolã edzi na wò, eye woʋu agbo na wò la, ekema amesiwo katã le eme la, nawɔ do na wò, eye woasusɔ wò.

¹²Ke ne wobe, yewomana la o, eye woho aʋa ɖe ŋuwò la, ekema ɖe to ɖe wo;

¹³eye ne Yehowa, wò Mawu, tsɔ wo de asi na wò la, ekema wu ŋutsu, siwo katã le eme la, kple yi;

¹⁴negbe nyɔnuwo kple ɖeviwo kple lãwo kpakple aboyonu, siwo katã le dua me la, ko naha na ɖokuiwò, eye naɖu wò futowo ƒe aboyonu, siwo Yehowa, wò Mawu, na wò la.

¹⁵Alea nawɔ du, siwo katã le adzɔge ʋĩ tso gbɔwò, eye womenye dukɔ siawo ƒe duwo o la hãe.

¹⁶Ke mèkpɔ mɔ ana amea ɖeke natsi agbe le dukɔ siawo ƒe du, siwo Yehowa, wò Mawu, ana wò wòanye wò domenyinu lãme o;

¹⁷ke boŋ natsrɔ̃ Xititɔwo, Amoritɔwo, Kanaanitɔwo, Perizitɔwo, Xiwitɔwo kple Yebusitɔwo gbidigbidi, abe alesi Yehowa, wò Mawu, de se na wò ene,

¹⁸ne womagava fia ŋunyɔnu, siwo katã wowɔna na woƒe mawuwo la, wɔwɔ mi, eye miawo nuvɔ̃ ɖe Yehowa, mia Mawu ŋu o.

¹⁹Ne èbe, yeawɔ aʋa kple dua ɖe axɔe, eye nèɖe to ɖee eteƒe didi la, ekema megatsɔ̃ fia gblẽ woƒe atiwo o, ke boŋ èkpɔ mɔ aɖu woƒe tsetse, eye megalã wo o, elabena agblemeti menye ame wònye nèva to ɖe ge ɖee o.

²⁰Negbe ati, siwo nènya be, womeɖua woƒe tsetse o la, ko nagblẽ, eye nalã wo atsɔ tɔ kpɔ ɖe du, si le aʋa wɔm kpli wò la ŋu, vaseɖe esime naɖu edzi.