Read ewe Mose V 23 Bible Online

Mose V 23 - ewe bible

Mose V 23

¹Amea ɖeke megaɖe fofoa srɔ̃, eye wòaklo fofoa ƒe avɔ o.

²Amesi wòto voku na, alo wolã kakalikɛ nɛ la, mekpɔ mɔ anɔ Yehowa ƒe ha la me o.

³Ahasivia ɖeke mekpɔ mɔ anɔ Yehowa ƒe ha la me o; kekeke eƒe dzidzime ewolia ke hã mekpɔ mɔ anɔ Yehowa ƒe ha la me o.

⁴Amonitɔ kple Moabitɔa ɖeke mekpɔ mɔ anɔ Yehowa ƒe ha la me o, kekeke woƒe dzidzime ewolia ke hã mekpɔ mɔ anɔ Yehowa ƒe ha la me gbeɖe o;

⁵elabena wometsɔ abolo kple tsi va kpe mi le mɔ dzi, esime mieʋu tso Egipte la o, eye woda Bileam, Beor vi, tso Petor le Mesopotamia ɖe mia ŋu, be wòaƒo fi ade mi.

⁶Ke Yehowa, wò Mawu, meɖo to Bileam o, eye Yehowa, wò Mawu, na fiƒode la trɔ zu yayra na wò, le esi Yehowa, wò Mawu, lɔ wò ta.

⁷Megadi nyuie alo dzɔgbenyuie na wo le wò agbe me ŋkekewo katã me gbeɖe o.

⁸Meganyɔ ŋu Edomitɔ o, elabena nɔviwò wònye, eye meganyɔ ŋu Egiptetɔ o, elabena ènye amedzro kpɔ le eƒe anyigba dzi.

⁹Woƒe dzidzimevi etɔ̃lia kpɔ mɔ anɔ Yehowa ƒe ha la me.

¹⁰Ŋe eho aʋa ɖe wò futɔwo ŋu, eye nèƒu asaɖa anyi la, ekema kpo nyuie le vɔ̃wo katã ŋu.

¹¹Ne ŋutsua ɖe le dowòme, amesi nyẽ tsi le zã me, eye eŋu meka o la, ekema wòado le asaɖa la me, eye mekpɔ mo ava asaɖa la me o.

¹²Le ɣetrɔ me la wòalé tsi, eye ne ɣe ɖo to la, ekpɔ mɔ ava asaɖa la me.

¹³Ɖo agboti ɖe asaɖa godo, afima nade afɔdzi ɖo.

¹⁴Eye nakpa ati gbabɛ akpe ɖe wò aʋawɔnuwo ŋu, eye ne èle afɔdzi de ge la, natsɔe aɖe ɖoe, emegbe natsɔe axe ke ɖe edzi.

¹⁵Elabena Yehowa, wò Mawu, le yiyim le wò asaɖa la me, bena woaxɔ na wò, eye wòatsɔ wò futɔwo aɖe asi na wò. Eyata wò asaɖa nanɔ kɔkɔe, ne magakpɔ fenua ɖeke, eye wòatrɔ adzo le gbɔwò o.

¹⁶Ne kluvia ɖe, si le eƒe aƒetɔ gbɔ, va si wò tso la, megakplɔe de asi na eƒe aƒetɔ o.

¹⁷Ke boŋ woatsi gbɔwò le wò duwo dometɔ ɖeka, si dze eŋu wotia la me, eye megatee ɖe anyi o.

¹⁸Gboloa ɖeke meganɔ Israel-vinyɔnuwo dome o, eye Israel-viŋutsua ɖeke meganye ahasitɔ o.

¹⁹Megaɖe adzɔgbe atsɔ nyɔnu alo ŋutsu ƒe ahasihoa ɖeke ava Yehowa, wò Mawu la, ƒe me o, elabena ŋunyɔnu woa kple eve la siaa nye na Yehowa, wò Mawu la.

²⁰Megaxɔ deme le nɔviwò si o, eɖanye ɖe ga alo nuɖuɖu alo nusianu, si woaɖo woaxɔ deme ɖe dzi la dzi o.

²¹Ekpɔ mɔ axɔ deme le du bubu me tɔwo si, ke megaxɔ deme le nɔviwò si o, bena Yehowa, wò Mawu, nayra wò le nusiwo katã netsɔ wò asi wɔ dɔ kpɔ la me, le anyigba, si dzi yim nèle, be naxɔe wòanye tɔwò la dzi.

²²Ne èɖe adzɔgbe na Yehowa, wò Mawu la, ekema megahe edziwɔwɔ ɖe megbe o, elabena Yehowa, wò Mawu, abiae tso asiwò kokoko, ne megaɖi fɔ o.

²³Ke ne ègbe adzɔgbeɖeɖe la, ekema meɖi tɔa ɖeke o.

²⁴Lé nya, si do le nuwo la me ɖe asi, eye nawɔ nya, si nègblɔ heɖe adzɔgbe le ɖokuiwò si na Yehowa, wò Mawu la dzi.

²⁵Ne èva hawòvi ƒe weingble me la, ekema ɖu tsetseawo alesi dze ŋuwò, vaseɖe esime naɖi ƒo; ɖeko megatsɔ ɖeke ɖe wò nuwo me o

²⁶Ne eva hawòvi ƒe mɔligble me la, ekpɔ mɔ atsɔ asi aƒlɔ mɔlikuawoe, ɖeko megatsɔ hɛ si hawòvi ƒe mɔli o.