Read ewe Mose V 29 Bible Online

Mose V 29 - ewe bible

Mose V 29

¹Eye Mose yɔ Israel blibo la gblɔ na wo bena: Miekpɔ nusi Yehowa wo le mia ŋku me ɖe Farao kple eƒe dɔlawo kpakple eƒe dukɔ blibo la ŋu le Egipte-nyigba dzi,

²eye miekpɔ nutsuwɔwɔ, dzesi kple nukunu gã mawo.

³Ke Yehowa mena dzi mi, be miase nu gɔmee, mena ŋku mi, be míakpɔ nui, eye mena to mi, be miase nui vaseɖe egbe o.

⁴Mekplɔ mi to gbedzi ƒe blane sɔŋ; ava mevuvu le mia ŋu o, eye afɔkpa mevuvu le afa na mi o.

⁵Miekpɔ abolo ɖu o, eye mieno wein alo aha mũamea ɖeke o, ne miadze su be, nyee nye Yehowa, mia Mawu.

⁶Eye esi mieva teƒe sia la, Sixon, Xesbon-fia kple Og, Basan-fia ho aʋa ɖe mia ŋuti, ke miesi wo,

⁷eye miexɔ woƒe anyigba hetsɔ na Ruben-viwo, Gad-viwo kple Manase-viwo ƒe to afã, bena wòanye woƒe domenyinu.

⁸Eyata milé nubabla sia ƒe nyawo me ɖe asi, eye miwo wo dzi, bena nusianu, si miawɔ la, nadze dzi na mi.

⁹Mi katã miele tsitre ɖe Yehowa, mia Mawu ŋku me egbe, miaƒe towo ƒe amegãwo, miaƒe ame tsitsiwo, mia dzikpɔlawo kple Israel ƒe ŋutsuwo katã,

¹⁰miaƒe vidzĩewo, mia srɔ̃wo kple ame-dzro, si le miaƒe asaɖa me, miaƒe nakefɔla kple tsidula siaa,

¹¹bena naɖo Yehowa, wò Mawu ƒe nubabla kple atam, si Yehowa, wò Mawu, ka na wò la me egbe;

¹²ne wòaɖo wò egbe nanye eƒe dukɔ, eye eya nanye wò Mawu, abe alesi wòdo ŋugbe na wò kple alesi wòka atam na fofowò Abraham, Isak kple Yakob la ene.

¹³Menye miawo ɖeɖe mebia nusia kpli o, eye menye miawo ɖeɖe meka atam sia na o,

¹⁴ke boŋ amesiwo le tsitre ɖe afisia kpli mí le Yehowa, mía Mawu ŋku me egbea, kpakple amesiwo mele afisia kpli mí egbea o la siaae.

¹⁵Elabena mia ŋutɔwo mienyã, alesi mieno Egipte-nyigba dzi kple alesi mieto dukɔdukɔwo domee,

¹⁶eye miekpɔ woƒe ŋunyɔnuwo kple legbawo, siwo nye ati, kpe, klosalo kple sika la, le wo gbɔ.

¹⁷Ɖeko ŋutsu alo nyɔnu, ƒome alo toa ɖeke meganɔ mia dome, si ƒe dzi atrɔ le Yehowa, mía Mawu la yome egbea o, eye miaƒe kèa ɖeke meganɔ anyi anye aɖi kple atsa o;

¹⁸amesi ase fiƒodenya siawo avɔ tso, ade dzi ƒo na eɖokui agblɔ le eƒe dzi me bena; ne mese dzime le yiyim hã, ŋunye afa o, bena ne womagatsrɔ̃ amesi ɖi ko kple amesi tsikɔ le wuwum la siaa o.

¹⁹Yehowa matsɔe akee o, ke boŋ Yehowa ƒe dɔmedzoe abi ɖe ame ma ŋu, eye wòaʋã ŋui; fiƒode, siwo katã woŋlɔ ɖe agbalẽ sia me la, ava edzi, eye Yehowa atsrɔ̃ eƒe ŋkɔ ɖa le dziƒoa te.

²⁰Yehowa aɖee ɖa le Israel ƒe toawo katã me, eye wòana dzɔgbevɔ̃e nava edzi, abe alesi nubabla ƒe fiƒode, siwo katã woŋlɔ ɖe sea ƒe agbalẽ me la le ene.

²¹Eye ne miaƒe dzidzimevi, siwo ava le mia megbe, kple ɖu bubu me tɔwo, siwo tso anyigba ɖiɖiwo dzi, kpɔ anyigba sia ƒe fuwɔamewo kple dɔléle, siwo Yehowa he va edzi,

²²kple alesi woƒe anyigba fiã hetrɔ zu aŋɔ kple dze, womate ŋu aƒa nu ɖe edzi o, naneke mate ŋu ato ɖo le edzi o, eye gbea ɖeke mate ŋu amie ɖe edzi o, abe Sodom kple Gomora, Adma kple Zeboyim, siwo ŋu Yehowa do dɔmedzoe kple dziku ɖo hetrɔ bu anyi ene la, ekema woaƒo nu le eŋu,

²³eye dukɔwo katã agble bena: Nukaŋuti Yehowa wo anyigba sia alea, eye dɔmedzoe gã ka ƒomevi enye si?

²⁴Tete woaɖo ŋu be: Esi wotu Yehowa, wo fofowo ƒe Mawu ƒe nu, si wòbia kpli wo, le esime wòkplɔ wo tso Egipte-nyigba dzi,

²⁵eye woyi ɖasubɔ mawu bubuwo hede ta agu na mawu, siwo womenya o, eye metsɔ wo na wo o ŋuti la,

²⁶eyata Yehowa do dɔmedzoe ɖe anyigba ma ŋu, eye wòhe fiƒode, siwo katã woŋlɔ ɖe agbalẽ sia me la, va wo dzi ɖo.

²⁷Eyata Yehowa tsɔ dɔmedzoe, dziku kple aɖa ho wo tso woƒe anyigba dzi heƒu gbe ɖe anyigba bubu dzi, abe alesi wòzu egbe siawo ene.

²⁸Nusi ɣla enye Yehowa, mía Mawu tɔ, ke nusi le gaglãgbe enye mía kple mia viwo to tegbee, be miawo se sia ƒe nyawo katã dzi.