Read ewe Mose V 34 Bible Online

Mose V 34 - ewe bible

Mose V 34

¹Esi Mose lia Nebo-to la hede Pisga tame le Moab-tagba le Yerixo kasa la, Yehowa na wòkpɔ anyigba blibo la tso Gilead vaseɖe Dan,

²Naftali blibo la, Efrayim kple Manase ƒe anyigba, kpakple Yuda ƒe anyigba blibo la vaseɖe ƒu nu,

³dziehe gome kple devedu Yerixo ƒe gbadzaƒe nusiwo me vaseɖe Zoar ke.

⁴Eye Yehowa gblɔ nɛ bena: Esia nye anyigba, si ŋu meka atam ɖo hedo ŋugbe na Abraham, Isak kple Yakob bena, matsɔe na woƒe dzidzimeviwo. Mena nèkpɔe kple wò ŋkuwo, ke made afima akpɔ o.

⁵Eye Mose, Yehowa ƒe dɔla, ku ɖe afima le Moab-nyigba dzi, abe alesi Yehowa gblɔ ene.

⁶Eye wòɖii ɖe bali la me le Moab-nyigba dzi le Bet-Peor kasa; ke amea ɖeke menya eɖiƒe vaseɖe egbe o.

⁷Mose xɔ ƒe alafa ɖeka blave hafi ku; ke eƒe ŋkuwo metsi o, eye agbe gale eŋu.

⁸Eye Israel-viwo fa na Mose ŋkeke blaetɔ̃ sɔŋ le Moab-tagba. Emegbe wowu avifafa-ŋkekeawo kple funyinyi na Mose nu.

⁹Eye nunyagbɔgbɔ yɔ Yosua, Nun vi fũ, elabena Mose da asi ɖe edzi. Eye Israel-viwo ɖo toe, eye wowɔ, abe alesi Yehowa de se na Mose ene.

¹⁰Ke nyagblɔɖila ɖeke megana Israel kpɔ abe Mose, Yehowa nya ŋku me kple ŋku me ene o;

¹¹amesi Yehowa ɖɔ ɖe Egipte-nyigba dzi, be wòawɔ dzesiwo kple nukunuwo ɖe Farao kple eƒe dɔlawo katã kpakple eƒe anyigba blibo la ŋu;

¹²hekpe ɖe ŋusẽnu kple nu tsu dziŋɔ, siwo katã Mose wɔ le Israel blibo la ŋku me ŋuti.