Read ewe Mose V 6 Bible Online

Mose V 6 - ewe bible

Mose V 6

¹Esia nye se kple ɖoɖo kpakple kɔnu, siwo Yehowa, mia Mawu gblɔ, bena woafia mi, ne miawɔ wo dzi le anyigba, si dzi yim miele, bena míaxɔe wòanye mia tɔ la dzi,

²ne miavo Yehowa, mia Mawu la, eye mia kple viwòwo kple wò tɔgbuiyɔviwo miawɔ ɖoɖo kple se, siwo megblɔ na mi la dzi, le miaƒe agbe me ŋkekewo katã me, bena mianɔ agbe didie.

³Eyata Israel see, lé wo me ɖe asi, eye nawɔ wo dzi, ne wòanyo na wò, eye nadzi ɖe dzi le anyigba, si dzi notsi kple anyitsi bɔ ɖo la dzi, abe alesi Yehowa, fofowòwo ƒe Mawu la, do ŋugbe na wò ene.

⁴Israel, see, Yehowa, mía Mawu la, Yehowa ɖeka koe!

⁵Eyata tsɔ wò dzi blibo kple wò luʋɔ blibo kpakple wò ŋusẽ katã lɔ̃ Yehowa, wo Mawu la.

⁶Eye nya, siwo megblɔ na wò egbe la, natsi dzi me na wò.

⁷Ku wo ɖe to me na viwòwo, eye naƒo nu le wo ŋu, ne èbɔbɔ nɔ aƒewò me, alo nèle mo dzi, ne èmlɔ anyi, alo nèfɔ.

⁸Bla wo ɖe wò asi ŋu abe dzesi ene, eye bla wo ɖe ŋgonu le ŋudome;

⁹ŋlɔ wo ɖe wò xɔ ƒe ʋɔtrutiwo kple wò agbowo nu.

¹⁰Ne Yehowa, wò Mawu, kple wò va anyigba, si ŋu wòka atam ɖo na fofowòwo Abraham, Isak kple Yakob bena, yeatsɔe na wò dzi, afisi du gã nyui, siwo menye wòe tso wo o la le,

¹¹eye xɔwo yɔ fũ kple nu nyui, siwo menye wòe de wo me o, afisi vudo, siwo menye wòe ɖe wo o, kple weingble kpakple amitibɔ, siwo menye wòe tso wo o la le, eye nèɖu nu ɖi ƒo la,

¹²ekema kpo nyuie, bena mãgaŋlɔ Yehowa, si kplɔ wò tso kluvinyenyeƒe me, le Egipte-nyigba dzi la be o.

¹³Vɔ̃ Yehowa, wò Mawu la, eye nasubɔe, eye natsɔ eƒe ŋkɔ aka atame.

¹⁴Migadze dukɔ, siwo ƒo xlã mi la, ƒe mawuwo yome o.

¹⁵Elabena Yehowa, wò Mawu la, ŋuʋã Mawu wònye le dowòme, bena Yehowa magaɖo dɔmedzoe ɖe ŋuwò, eye woatsrɔ̃ wò ɖa le anyigba dzi o.

¹⁶Migate Yehowa, mia Mawu la kpo, abe alesi mietee kpɔ le Masa la ene o;

¹⁷ke boŋ miwo Yehowa, mia Mawu, ƒe sewo, eƒe ɖaseɖiɖiwo kple ɖoɖowo, siwo wògblɔ na mi la dzi.

¹⁸Wɔ nusi dzɔ, eye wònyo le Yehowa ŋku me, bena eme na-nyo na wò, eye nayi aɖaxɔ anyigba nyui, si ŋu Yehowa ka atam ɖo na fofowòwo la,

¹⁹eye Yehowa anyã wò futɔwo katã le ŋgɔwò, abe alesi wòdo ŋugbe ene.

²⁰Ne viwò ava bia wò gbaɖegbe bena: Nukata Yehowa, mía Mawu, gblɔ ɖaseɖiɖi, ɖoɖo kple se siawo na mi hã la,

²¹ekema gblɔ na viwò bena: Míenye kluviwo na Farao le Egipte kpɔ, eye Yehowa tsɔ asi sesẽ kplɔ mi tso Egipte,

²²eye Yehowa wɔ dzesi kple nukunu gã dziŋɔwo le Egipte, ɖe Farao kple eƒe aƒe blibo la ŋu miekpɔ;

²³ke èkplɔ miawo va tso afima, bena wòakplɔ mi ayii, ne wòatsɔ anyigba, si ŋu wòka atam ɖo na mía fofowo la na mí.

²⁴Eye Yehowa de se na mi bena, míawɔ ɖoɖo siawo katã dzi, míavɔ̃ Yehowa, mía Mawu la, bena wòanyo na mí ɣesiaɣi, ne mianɔ agbe, abe alesi wòzu egbe siawo ene.

²⁵Ne mielé se siawo katã me ɖe asi, eye miewɔ wo dzi, abe alesi wòɖe se na mi ene la, woabui dzɔdzɔenyenye na mi.