Read ewe Yohanes 1 Bible Online

Yohanes 1 - ewe bible

Yohanes 1

¹Le gɔmedzedzea me Nya la li, eye Nya la li kple Mawu, eye Nya lae nye Mawu.

²Eya kple Mawue li le gɔmedzedzea me.

³Wowɔ nuwo katã to eyama dzi, eye eya manɔme la womewɔa naneke, si wowɔna o.

⁴Eya me agbe le, eye agbe la nye amewo ƒe kekeli la.

⁵Eye kekeli la klẽna le viviti me, eye viviti la mexɔe o.

⁶Amea ɖe va dzo, si Mawu do, eŋkɔe nye Yohanes.

⁷Amesia va le ɖaseɖiɖi ta, bena wòaɖi ɖase le kekeli la ŋuti, bena amewo katã naxɔ ase to eyama dzi.

⁸Menye eyae nye kekeli la o, ke boŋ bena wòaɖi ɖase le kekeli la ŋuti.

⁹Kekeli vavã, si klẽna ɖe amesiame me la, li gbɔna ɖe xexea me.

¹⁰Ele xexea me, eye wowɔ xexeame to eyama dzi, eye xexeame medze sii o.

¹¹Eva ye ŋutɔ tɔwo gbɔ, eye ye ŋutɔ tɔwo mexɔe o.

¹²Ke ame geɖe alesinu xɔe la, ena ŋusẽ wo, be woazu mawuviwo, amesiwo xɔa eƒe ŋkɔ dzi sena,

¹³amesiwo womedzi tso ʋu alo tso ŋutilã ƒe lɔlɔ̃nu alo tso ŋutsu ƒe lɔlɔ̃nu me o ke boŋ Mawu me wodzi wo tso.

¹⁴Eye Nya la trɔ zu ŋutilã, eye wònɔ anyi le mia dome, eye míekpɔ eƒe ŋutikɔkɔe abe Tenuvi, si wodzi tso Fofoa gbã la, ƒe ŋutikɔkɔe ene, eye amenuveve kple nyateƒe yɔe fũ.

¹⁵Yohanes ɖi ɖase le eŋuti, eye wòdo ɣli gblɔ bena: Esia nye amesi ŋuti megblɔ le bena: Amesi, le megbenye gbɔna la, tre vava nam, elabena eli, hafi meli.

¹⁶Elabena tso eƒe agbɔsɔsɔ me la mi katã miexɔ amenuveve ɖe amenuveve dzi.

¹⁷Elabena wona se la to Mose dzi; amenuveve kple nyateƒe va to Yesu Kristo dzi.

¹⁸Amea ɖeke mekpɔ Mawu ɣeaɖekeɣi kpɔ o; Tenuvi si le Fofoa kɔme la, eya gblɔe fia mi.

¹⁹Eye esia nye Yohanes ƒe ɖaseɖiɖi, esi Yudatɔwo dɔ nunɔlawo kple Lewitɔwo ɖa tso Yerusalem, bena woabiae bena: Ameka nenyea?

²⁰Eye woʋu me, eye mese nu o, eye wòʋu me bena: Menye nyee nye Kristo la o.

²¹Eye wobiae bena: Ekema amekae? Eliya nenyea? Egblɔ bena: Menye nyee o. Nyagblɔɖila la nènyea? Eye wòɖo ŋu bena: O.

²²Eye wogblɔ nɛ bena: Ameka gã nènye? Bena miana ŋuɖoɖo amesiwo dɔ mi ɖa. Nuka gblɔm nèle le ɖokuiwò ŋu?

²³Egblɔ bena: Amesi le ɣli dom le gbeadzi la ƒe gbe menye: „Midzra Aƒetɔ ƒe mɔ la ɖo“ abe alesi nyagblɔɖila Yesaya gblɔ ene.

²⁴Eye ame dodowo tso farisitɔwo gbɔ.

²⁵Eye wobiae gblɔ nɛ bena: Nukaŋuti nèle mawutsi dem ta na amewo, esi menye Kristo alo Eliya alo nyagblɔɖila nènye o mahã?

²⁶Yohanes ɖo ŋu gblɔ na wo bena: Nye la mele mawutsi ɖem ta na amewo kple tsi; amesi mienya o la, le tsitre le mia titina,

²⁷amesi le megbenye gbɔna, amesi ƒe atokotawo nu ka medzem be, matu o.

²⁸Nusiawo va ve me le Betania le Yordan godo, afisi Yohanes le mawutsi dem ta na amewo le.

²⁹Esi ŋu ke la, ekpa Yesu gbɔna ɖe egbɔ, eye wògblɔ bena: Kpɔ ɖa, Mawu ƒe alẽvi, si le xexeame ƒe nuvɔ̃ la tsɔm yina la, enye si!

³⁰Nenem me sia enye amesi ŋuti megblɔ le be: Ŋutsua ele le megbenye gbɔna, si tre vava nam, elabena eli, hafi meli.

³¹Eye nyemenyae o, ke boŋ bena wòaɖee ɖe go afia Israel, le esia ta meva le mawutsi dem ta na amewo ɖe tsi me.

³²Eye Yohanes ɖi ɖase gblɔ bena: Mekpɔ Gbɔgbɔ la le ɖiɖim tso dziƒo abe akpakpa ene, eye wònɔ edzi.

³³Eye nyemenyae o; ke amesi dɔm be, made mawutsi ta na amewo kple tsi la, eya ke gblɔ nam bena: Amesi ke dzi nakpɔ Gbɔgbɔ la le ɖiɖim ɖo, eye wònɔ edzi la, eyae nye amesi le mawutsi dem ta na amewo kple Gbɔgbɔ kɔkɔe la.

³⁴Eye nye la mekpɔe, eye meɖi ɖase bena, amesia enye Mawuvi la.

³⁵Esi ŋu gake la, Yohanes gatsi tre kple eƒe nusrɔ̃lawo dome ame eve,

³⁶eye esi wòkpɔ Yesu, si le tsa ɖim, dzi dũ la, egblɔ bena: Kpɔ ɖa, Mawu ƒe alẽvie nye ekem.

³⁷Eye nusrɔ̃la eveawo se eƒe nuƒoƒo, eye wodze Yesu yome.

³⁸Eye Yesu trɔ, eye esi wòkpɔ wo le eyome dzem la, egblɔ na wo bena: Nuka ɖim miele? Eye wogblɔ nɛ bena: Rabi (si gɔmee nye nufiala), afika nenɔna?

³⁹Egblɔ na wo bena: Miva kpɔe. Eye wova, eye wokpɔ afisi wònɔna; eye wonɔ anyi kplii le ŋkeke ma dzi, anɔ gaƒoƒo ewolia dzi.

⁴⁰Eye ame eveawo dometɔ ɖeka, si se Yohanes ƒe nuƒoƒo, eye wòdze Yesu yome la, enye Andrea, Simon Petro nɔvi.

⁴¹Eya kpɔ ye ŋuta nɔvia Simon gbã, eye wògblɔ nɛ bena: Míekpɔ Mesia la, (si gome enye Kristo).

⁴²Ekplɔe va Yesu gbɔ. Eye esi Yesu kpɔe du la, egblɔ ne bena: Wòe nye Simon, Yona vi la, woayɔ wò be Kefas, (si gome enye kpe gbadza).

⁴³Esi ŋu gake la, ele didim be, yeayi ɖe Galilea, eye wòkpɔ Filipo; eye Yesu gblɔ nɛ bena: Dze yonyeme.

⁴⁴Ke Filipo tso Betsaida, Andrea kple Petro ƒe du.

⁴⁵Filipo kpɔ Natanael, eye wògblɔ nɛ bena: Míekpɔ Yesu. Yosef vi tso Nazaret, amesi ŋuti woŋlɔ ɖi le le Mose ƒe se la kple nyagblɔɖilawo me.

⁴⁶Natanael gblɔ nɛ bena: Ɖe nu nyuia ɖe ate ŋu atso Nazaret mahã? Filipo gblɔ nɛ bena: Va kpo.

⁴⁷Yesu kpɔ Natanael gbɔna ɖe egbɔ, eye wògblɔ le eŋuti bena: Kpɔ ɖa, Israeltɔ vavãe, amesi me alakpa mele o.

⁴⁸Natanael gblɔ ne bena: Afika nènyam le? Yesu ɖo ŋu gblɔ nɛ bena: Hafi Filipo yɔ wò, esime nèle gbotia te la, mekpɔ wò tso.

⁴⁹Natanael ɖo ŋu nɛ bena: Rabi, wòe nye Mawu ƒe Vi, wòe nye Israel ƒe fia.

⁵⁰Yesu ɖo ŋu gblɔ nɛ bena: Esi megblɔ na wò bena, mekpɔ wò le gbotia te la, èxɔe se mahã? Nu gãwo wu esiawo kpo ge nala.

⁵¹Eye wògblɔ nɛ bena: Vavã, vavã mele egblɔm na mi bena: Míakpɔ dziƒo nuvo, eye mawudɔlawo anɔ dzi liam, eye woanɔ ɖiɖim ɖe Amegbetɔvi la dzi.