Read ewe Yohanes 18 Bible Online

Yohanes 18 - ewe bible

Yohanes 18

¹Esi Yesu gblɔ esiawo vɔ la, eya kple eƒe nusrɔ̃lawo do go yi ɖatso Kidron-tɔʋu la, afisi abɔa ɖe le, si me eya kple eƒe nusrɔ̃lawo yi ɖo.

²Ke Yuda hã, amesi fia eyome mo la, nya teƒe la; elabena enuenu la Yesu kple eƒe nusrɔ̃lawo ƒoa ƒu ɖe afima.

³Azɔ, esi Yuda xɔ asrafoha kpe de nunɔlagãwo kple farisitɔwo ƒe dɔlawo ŋu la, egbɔna afima kple akakatiwo kple akaɖiwo kpakple aʋawɔnuwo.

⁴Ke esi Yesu nya nusiwo katã le edzi va ge la, edo go, eye wògblɔ na wo bena: Ameka dim miele?

⁵Woɖo ŋu nɛ bena: Yesu, Nazaretetɔ lae! Yesu gblɔ na wo bena: Nyee nye esi! Ke Yuda hã, amesi fia eyome mɔ la, le tsitre ɖe wo gbɔ.

⁶Azɔ, esi wògblɔ na wo bena: Nyee nye esi la, wozɔ gbugbɔɖemegbee, eye wodze anyi.

⁷Tete wògabia wo bena: Ameka dim miele? Eye wogblɔ bena: Yesu, Nazaretetɔ lae!

⁸Yesu ɖo ŋu bena: Megblɔe na mi xoxo bena, nyee nye esi: eyaŋuti nenye nye dim miele la, ekema mina mɔ amesiawo, be woadzo ayi,

⁹bena woawu nya, si wogblɔ ɖi la nu bena: „Amesiwo nètsɔ nam la, nyemebu wo dometɔa ɖeke o.“

¹⁰Tete Simon Petro ɖi yi, si le esi la, heda nunɔlagã la ƒe dɔla, eye wòkpa eƒe nuɖusimeto, eye dɔla ma ƒe ŋkɔe nye Malxo.

¹¹Tete Yesu gblɔ na Petro bena: Tsɔ yi la de aku; kplu, si Fofo la tsɔ nam la, ɖe nyemanoe o mahã?

¹²Azɔ asrafoha kple aʋafia gã la kple Yudatɔwo ƒe dɔlawo lé Yesu, eye wobiae,

¹³eye wokplɔe yi Hana gbɔ gbã, elabena enye Kayafa, si nye nunɔlagã le ƒe ma me la, ƒe to.

¹⁴Ke Kayafa ye nye amesi ɖo aɖaŋu na Yudatɔwo bena, enyo bena, ame ɖeka naku ɖe dukɔ la ta.

¹⁵Eye Simon Petro kple nusrɔ̃la bubu la dze Yesu yome. Ke nusrɔ̃la la enye nunɔlagã la ƒe ame nyanyɛ, eye wòkpe ɖe Yesu ŋuti yi ɖe mɔ̃ la me.

¹⁶Ke Petro le tsitre ɖe ʋotru la nu le gota. Tete nusrɔ̃la keme, si nye nunɔlagã la ƒe ame nyanyɛ la, do go, eye wòƒo nu kple nyɔnu ʋɔtrunudzɔla la, eye wòkplɔ Petro yi ɖe eme.

¹⁷Tete dɔlanyɔnu, si nye ʋɔtrunudzɔla la, gblɔ na Petro bena: Wò hã, ɖe menye amesia ƒe nusrɔ̃lawo dometɔ ɖeka nènye o mahã?

¹⁸Eye kluviawo kple dolawo le tsitre, eye wodo akadzo; elabena vuvɔ le wɔwɔm, eye wole dzo la ƒum, eye Petro hã tsi tre ɖe wo gbɔ le dzo la ƒum.

¹⁹Azɔ la nunɔlagã la bia Yesu le eƒe nusrɔ̃lawo kple eƒe nufiafia ŋuti.

²⁰Yesu ɖo ŋu nɛ bena: Nye la meƒo nu na xexeame le gaglãgbe, mefia nu ɖaa le ƒuƒoƒewo kple mawuƒe me, afisi Yudatɔwo katã ƒoa ƒu ɖo, eye nyemegblɔ nyaa ɖeke le ɣaɣlaƒe kpɔ o.

²¹Nukaŋuti nèle biayem? Bia amesiwo se nusi megblɔ na wo; kpɔ ɖa, woawo nya nusiwo nye la megblɔ.

²²Ke esi wògblɔ nusiawo la, dɔlawo dometɔ ɖeka, si le tsitre ɖe egbɔ la, ƒo tome na Yesu gblɔ bena: Ale nèɖo ŋu na nunɔlagã la enye si mahã?

²³Yesu ɖo ŋu nɛ bena: Ne megblɔ nya vɔ̃ la, ekema fia kpɔɖeŋu le nusi nye vɔ̃ la ŋu; ke ne enyo la, nukaŋuti nèle ƒoyem mahã?

²⁴Azɔ Hana ɖoe ɖe Kayafa, nunɔlagã la gbɔ bablae.

²⁵Ke Simon Petro le tsitre le dzo ƒum. Eye wogblɔ nɛ bena: Alo wò hã eƒe nusrɔ̃lawo dometɔ ɖeka nènye mahã? Eyama sẽ nu gblɔ bena: Menye nyee o.

²⁶Nunɔlagã la ƒe kluviwo dometɔ ɖeka, si nye amesi ƒe to Petro kpa la ƒe ƒometɔ la, gblɔ bena: Alo ɖe nyemekpɔ wò le abɔa me kplii o mahã?

²⁷Tete Petro gasẽ nu, eye enumake koklo ku atɔ.

²⁸Azɔ wokplɔ Yesu tso Kayafa gbɔ heyi ɖe ʋɔnudrɔ̃ƒe la, eye fɔŋli ti, ke woa ŋutɔwo meyi de ʋɔnudrɔ̃ƒe la, bena yewomagagblẽ kɔ ɖo o, ke boŋ bena yewoate ŋu aɖu ŋutitoto la.

²⁹Tete Pilato do go va wo gbɔ, eye wògblɔ bena: Nutsotso ka mietsɔ vɛ ɖe amesia ŋu mahã?

³⁰Woɖo ŋu gblɔ nɛ bena: Amesia la, ɖe menye vɔ̃wɔla wònye o la, ne miele ede ge asi na wò o.

³¹Tete Pilato gblɔ na wo bena: Ekema mia ŋutɔwo mikplɔe yii, ne miadrɔ̃ ʋɔnui le miaƒe se la nu Yudatɔwo gblɔ nɛ bena: Womeɖe mɔ na mi bena, míawu amee,

³²bena woawu nya, si Yesu gblɔ hefiã ku, si ƒomevi ku ge wòala la nu.

³³Azɔ Pilato gayi ɖe ʋɔnudrɔ̃ƒe la, eye wòyɔ Yesu, eye wògblɔ ne bena: Alo wòe nye Yudatɔwo ƒe fia la mahã?

³⁴Yesu ɖo ŋu nɛ bena: Wò ŋutɔ ɖokuiwò si nele esia gblɔm le loo, alo ame bubuwoe gblɔ ŋutinye nya na wò mahã?

³⁵Pilato ɖo ŋu bena: Nye la Yudatɔ menye mahã? Wò ŋutɔ wò dukɔ la kple nunɔlagãwoe tsɔ wò de asi nam, nuka newɔa?

³⁶Yesu ɖo ŋu bena: Nye fiaɖuƒe metso xexe sia me o, nye fiaɖuƒe, ɖe wòtso xexe sia me la, ne nye dɔlawo aʋli tanye, bena womãgadem asi na Yudatɔwo o, ke azɔ la nye fiaɖuƒe metso afisia o.

³⁷Tete Pilato gblɔ nɛ bena: Ekema fia nènye ni? Yesu ɖo ŋu bena: Wòe le egblɔm bena, fia menye. Nye la, esia ta wodzim ɖo, eye esia ta meva xexeame ɖo, bena maɖi ɖase na nyateƒe la. Amesiame, si tso nyateƒe me la, ɖoa to nye gbe.

³⁸Pilato gblɔ nɛ bena: Nukae nye nyateƒe? Eye esi wògblɔ esia la, egado go yi Yudatɔwo gbɔ, eye wògblɔ na wo bena: Nye la nyemekpɔ nya vɔ̃a ɖeke le eyama ŋuti o.

³⁹Ke kɔnuwɔwɔ le mia si bena, maɖe asi le ame ɖeka ŋuti na mi le ŋutitoto la dzi; mielɔ̃ azɔ bena, maɖe asi le Yudatɔwo ƒe fia la ŋuti na mi mahã?

⁴⁰Tete la wo katã gaɖo ɣli gblɔ bena: Menye amesia o, ke boŋ Baraba. Ke Baraba la adzodalae.