Read ewe Yohanes 6 Bible Online

Yohanes 6 - ewe bible

Yohanes 6

¹Nusiawo megbe la Yesu dzo yi ɖe Galilea-ƒu, si nye Tiberia-ƒu la godo.

²Eye ameha gãa ɖe dze eyome, elabena wokpɔ dzesi, siwo wòwɔ na dɔlélawo.

³Eye Yesu yi ɖe to la dzi, eye wòbɔbɔ nɔ afima kple eƒe nusrɔ̃lawo.

⁴Ke Yudatɔwo ƒe ŋutitotoŋkekenyuie la ɖo.

⁵Azɔ esi Yesu wu eƒe mo dzi, eye wòkpɔ bena, ameha gãa de gbɔna ɖe ye gbɔ la, egblɔ na Filipo bena: Afika míaƒle abolo le, bena amesiawo naɖu mahã?

⁶Ke egblɔ esia, be wòadoe akpɔ; elabena eya ŋutɔ nya nusi wɔ ge wòala.

⁷Filipo ɖo ŋu nɛ bena: Abolo denario alafa eve hã mele wo nu ɖe ge, bena wo dome ɖesiaɖe naxa via ɖe o.

⁸Eƒe nusrɔ̃lawo dometɔ ɖeka, Andrea, Simon Petro nɔvi la, gblɔ nɛ bena:

⁹Ɖekakpuia ɖe le afii, eye lubolo atɔ̃ kple tɔmelã memee eve le esi; gake nuka wònye na ame geɖe siawo mahã?

¹⁰Yesu gblɔ bena: Mina ameawo nabɔbɔ nɔ anyi. Ke gbe mumu geɖe le afima. Eye ŋutsu, siwo ƒe xexlẽme nu anɔ akpe atɔ̃ la, bɔbɔ nɔ anyi.

¹¹Eye Yesu tsa aboloawo heda akpe le wo ta, eye wòtso wo na amesiwo le anyinɔƒe; nenema ke hã wòna tɔmelã memee wo geɖe alesi nu dim wole.

¹²Ke esi woɖi ƒo la, egblɔ na eƒe nusrɔ̃lawo bena: Miƒo kakɛ, siwo susɔ la, nu ƒu, bena naneke nagagblẽ o.

¹³Tete woƒo wo nu ƒu, eye lubolo atɔ̃, siwo ameawo ɖu la, ƒe kakɛ, siwo susɔ la, yɔ kevi wuieve fũ.

¹⁴Azɔ esi ameawo kpɔ dzesi, si wowu la, wogblɔ bena: Vavã amesia nye nyagblɔɖila, si gbɔna ɖe xexeame.

¹⁵Eye esi Yesu dze sii bena, wole vava ge, eye woalé ye sesẽ aɖo fiae la, eɖe eɖokui ɖe aga yi de to la dzi.

¹⁶Eye esi fiẽ ɖo la, eƒe nusrɔ̃lawo yi ɖe ƒu nu;

¹⁷eye woɖo ʋu heyina ƒu la godo ɖe Kapernaum. Ke zã do xoxo, eye Yesu meva wo gbɔ haɖe o.

¹⁸Eye le ya gã, si le ƒoƒom ŋuti la, ƒu la dze agbo.

¹⁹Eye esi woku ʋu la anɔ stadio blave vɔ atɔ̃ alo blaetɔ̃ la, wokpɔ Yesu le ƒua dzi zɔm gbɔna, eye wòle tetem ɖe nu la ŋu, eye wovɔ̃.

²⁰Ke egblɔ na wo bena: Nyee nye esi, migavɔ̃ o hee!

²¹Eye esi woɖi bena, yewoaxɔe ɖe ʋu la me la, kasia ʋu la ɖi go ɖe anyigba, si dzi yim wole la.

²²Esi ŋu ke, eye ameha la le tsitre le ƒu la ƒe go keme dzi la, wokpɔ bena, ʋu bubua ɖeke megale afima o, negbe ɖeka ko, eye bena Yesu meɖo ʋua kple eƒe nusrɔ̃lawo o, ke boŋ eƒe nusrɔ̃lawo ɖeɖekoe yi, —

²³eye ʋu bubuwo tso Tiberia va ɖo afisi medidi tso teƒe, si woɖu abolo, si ta Aƒetɔ la da akpe le la, gbã o.

²⁴Azɔ esi ameha la kpɔ bena, Yesu alo eƒe nusrɔ̃lawo mele afima o la, woa ŋutɔwo ɖo duwo me, eye wova Kapernaum hele Yesu dim.

²⁵Eye esi wokpɔe le ƒua godo la, wogblɔ nɛ bena; Rabi, ɣekaɣi nèva afisia?

²⁶Yesu ɖo ŋu na wo, eye wògblɔ bena: Vavã, vavã mele egblɔm na mi bena: Miele diyem, menye bena, miekpɔ dzesiwo o; ke boŋ bena, mieɖu aboloawo ƒe ɖe, eye míeɖi ƒo.

²⁷Midze agbagba, menye ɖe nuɖuɖu, si gblẽna ta o, ke boŋ ɖe nuɖuɖu, si anɔ anyi hena agbe mavɔ la ta, esi Amegbetɔvi la lana mi; elabena nenem me la ŋu Mawu Fofo la de dzesi!.

²⁸Tete wogblɔna bena: Nuka miawo, bena mia wɔ Ma wu ƒe dɔwɔwɔwo mahã?

²⁹Yesu ɖo ŋu gblɔ na wo bena: Esiae nye Mawu ƒe dɔwɔwɔ la bena, miaxɔ amesi wòdɔ ɖa la, dzi ase.

³⁰Tete wogblɔ nɛ bena: Ekema dzesi ka newɔ, bena míakpɔ, eye miaxɔ dziwò ase mahã? Nuka nèwɔna?

³¹Mía fofowo du mana le gbeadzi, abe alesi woŋlɔ di ene bena: „Ena abolo wo tso dziƒo, be woaɖu.“

³²Yesu gblɔ na wo bena: Vavã, vavã mele egblɔm na mi bena: Menye Mose ye na abolo, si tso dziƒo la mi o, ke boŋ Fofonyee na abolo vavã mi tso dziƒo.

³³Elabena Mawu ƒe abolo la enye esi ɖi tso dziƒo va, eye wòna agbe xexeame.

³⁴Tete wogblɔ nɛ bena: Aƒetɔ, na abolo sia mí ɖaa.

³⁵Yesu gblɔ na wo bena: Nyee nye agbebolo la, amesi vaa gbɔnye la, dɔ mele ewu ge akpɔ o; eye amesi le dzinye xɔm le sesem la, tsikɔ mele ewu ge akpɔ o.

³⁶Gake megblɔe na mi bena, miekpɔm, eye miexɔm se o.

³⁷Nusianu, si Fofo la tsɔ nam la, ava gbɔnye, eye amesi vaa gbɔnye la, nyemale eƒu ge gbe akpɔ o.

³⁸Elabena medi tso dziƒo va, menye bena mawɔ nye ŋutɔ nye lɔlɔ̃nu o, negbe amesi dɔm da la ƒe lɔlɔ̃nu ko.

³⁹Ke esia enye amesi dɔm ɖa la ƒe lɔlɔ̃nu, bena nusianu, si wotsɔ nam la, ne magabu ɖeke o, ke boŋ bena mafɔe ɖe tsitre le nuwuwuŋkeke la dzi.

⁴⁰Elabena esiae nye Fofonye la ƒe lɔlɔ̃nu, bena amesiame, si le Via kpɔm, eye wòle edzi xɔm le sesem la, akpɔ agbe mavɔ, eye nye la mafɔe ɖe tsitre le nuwuwuŋkeke la dzi.

⁴¹Tete Yudatɔwo li liʋiliʋi le eŋuti; elabena egblɔ bena: Nyee nye abolo, si di tso dziƒo va.

⁴²Eye wogblɔ bena: Alo amesia la menye Yesu, Yosef vi la, amesi toto kple dada miawo mienyã lae o ɖe? Azɔ aleke wɔ amesia le gbɔgblɔm bena: Meɖi tso dziƒo va mahã?

⁴³Yesu ɖo ŋu gblɔ na wo bena: Migali liʋiliʋi le mia nɔewo dome o.

⁴⁴Amea ɖeke mate ŋu ava gbɔnye o, ne menye Fofo, si dɔm da lae hee vɛ o, eye nye la mafɔe ɖe tsitre le nuwuwuŋkeke la dzi.

⁴⁵Woŋlɔ de nyagblɔlawo me bena: „Eye wo katã woanye amesiwo Mawu fia nu wo.“ Amesiame, si see le Fofoa gbɔ, eye wòsrɔ̃e la, ava gbɔnye.

⁴⁶Menye bena, amea ɖee kpɔ Fofo la kpɔ o, negbe amesi tso Mawu gbɔ la, eyae kpɔ Fofo la.

⁴⁷Vavã, vavã mele egblɔm na mi bena: Amesi xɔe se la, agbe mavɔ le esi.

⁴⁸Nyee nye agbebolo la.

⁴⁹Mia fofowo ɖu mana le gbeadzi, eye woku.

⁵⁰Esiae nye abolo, si ɖi tso dziƒo va, bena ame naɖu eƒe ɖe, eye maku o.

⁵¹Nyee nye agbebolo la, si ɖi tso dziƒo va; ne amea ɖe ɖu abolo sia ƒe ɖe la, anɔ agbe tegbetegbe; eye abolo, si na ge mala ɖe xexeame ƒe agbe ta la, enye nye ŋutilã.

⁵²Azɔ Yudatɔwo he nya le wo nɔewo dome gblɔ bena: Aleke amesia ate ŋu ana eƒe ŋutilã mí, be míaɖu mahã?

⁵³Tete Yesu gblɔ na wo bena: Vavã, vavã mele egblɔm na mi bena: Ne menye ɖe mieɖu Amegbetɔvi la ɖe ŋutilã, eye mieno eƒe ʋu o la, ekema agbea ɖeke manɔ mia me o.

⁵⁴Amesi ɖua nye ŋutilã, eye wonoa nye ʋu la, agbe mavɔ le esi, eye nye la mafɔe ɖe tsitre le nuwuwuŋkeke la dzi.

⁵⁵Elabena nye ŋutilã enye nuɖuɖu vavã, eye nye ʋu enye nunono vavã.

⁵⁶Amesi ɖua nye ŋutilã, eye wònoa nye ʋu la, enɔa menye, eye nye hã menɔa eme.

⁵⁷Sigbe alesi Fofo gbagbe la dɔm ɖa, eye nye la mele agbe le Fofoa ŋuti la, nenema ke amesi ɖuam la, eya hã anɔ agbe le ŋutinye.

⁵⁸Esiae nye abolo, si ɖi tso dziƒo va, menye abe esi fofoawo du, eye woku la ene o, amesi ɖu abolo sia la, anɔ agbe tegbetegbe.

⁵⁹Nusiawo wògblɔ le ƒuƒoƒe la me, le esime wòle nu fiãm le Kapernaum.

⁶⁰Azɔ eƒe nusrɔlawo dome ame geɖewo, esi wose esia la, wogblɔ bena: Esia nye nya sesẽ; ameka ate ŋu asee mahã?

⁶¹Ke esi Yesu nya le ye ŋutɔ ɖokui me bena, eƒe nusrɔlawo le liʋiliʋi lim le esia ŋuti la, egblɔ na wo bena: Alo ɖe esia le nu ɖiam na mi mahã?

⁶²Azɔ, ne míakpɔ Amegbetɔvi la le dziƒo, afisi wòtso la, yim ɖe?

⁶³Gbɔgbɔ ta gbɔa agbe, ŋutilã menyo na naneke o; nya, siwo megblɔ na mi la, Gbɔgbɔ kple agbe wonye.

⁶⁴Ke amea ɖewo le mia dome, siwo mexɔna sena o. Elabena Yesu nya tso gɔmedzedzea me wo amesiwo mexɔ edzi se o kple amesi le eyome mɔ fia ge.

⁶⁵Eye wògblɔ bena: Le esia ta megblɔ na mi bena, amea ɖeke mate ŋu ava gbɔnye o, ne menye ɖe wonae tso Fofonye gbɔ o.

⁶⁶Tso esia dzi la eƒe nusrɔlawo dome ame geɖewo de megbe, eye womegazɔna kpakplii o.

⁶⁷Tete Yesu gblɔ na ame wuieveawo bena: Alo miawo hã ɖe miele ɖiɖim be, miadzo mahã?

⁶⁸Simon Petro ɖo ŋu nɛ bena: Aƒetɔ, ameka gbɔ gɔ̃ míaʋu ayi mahã? Agbe mavɔ nyawo le asiwò.

⁶⁹Eye miexɔe se, eye míedze sii bena, wòe nye Kristo, Mawu ƒe kɔkɔetɔ la.

⁷⁰Yesu xɔ dzi na wo bena: Menye nyee da mi ame wuieve oa? Eye mia dometɔ ɖeka nye abosam!

⁷¹Ke egblɔ esia le Yuda, Simon Iskariot vi ŋuti, elabena eyae nye amesi le eyome mɔ fia ge, eye wònye ame wuieveawo dometɔ ɖeka.