Read ewe Yohanes 8 Bible Online

Yohanes 8 - ewe bible

Yohanes 8

²Eye le ŋdikanya la egava mawuƒe la me, eye ameha la katã va egbɔ, eye esi wòbɔbɔ nɔ anyi la, efiã nu wo.

³Eye agbalẽfialawo kple farisitɔwo kplɔ nyɔnua ɖe, si wolé le ahasiwɔwɔ me la, va egbɔ, eye wotsɔe ɖo titina

⁴hegblɔ ne bena: Nufiala, wolé nyɔnu sia le ahasiwɔwɔ me ke.

⁵Eye Mose de se na mi le se la me bena, woaƒu kpe amesia tɔgbe: azɔ wò la, aleke gblɔm nèle le eŋuti mahã?

⁶Ke wogblɔ esia hele etem kpɔ, bena yewoakpɔ nyaa ɖe atso enu. Eye Yesu do dɔgɔ̃e, eye wòtsɔ asibide ŋlɔ nu ɖe anyigba.

⁷Eye esi wogale ebiabia dzi la, efɔ kɔ te, eye wògblɔ na wo bena: Amesi ke nuvɔ̃ mele eŋuti le mia dome o la, netre kpe la fɔfɔ ƒui.

⁸Eye wògado dɔgɔ̃e hetsɔ eƒe asibide ŋlɔ nu ɖe anyigba.

⁹Eye esi wosee la, woƒe dzi tsi nya na wo, ave wodo go ɖekaɖeka hedze egɔme tso xoxoawo dzi vaseɖe ɖevitɔwo dzi, eye wogblẽ Yesu ɖeka ɖi kple nyɔnu la le afisi wòle la, le titina.

¹⁰Eye esi Yesu fɔ kɔ te, eye mekpɔ amea ɖeke o negbe nyɔnua ko la, egblɔ nɛ bena: Nyɔnu, afika amesiwo le nuwò tsom la le? Ɖe amea ɖeke mebu fɔ wò o mahã?

¹¹Eye wògblɔ bena: Amea ɖeke o, Aƒetɔ. Ke Yesu gblɔ nɛ bena: Ekema nye hã nyemebu fɔ wò o; heyi, eye tso esia dzi la megawɔ nuvɔ̃ o.

¹²Azɔ Yesu gaƒo nu na wo gblɔ bena: Nyee nye xexeame ƒe kekeli la; amesi ke dzea yonyeme la, mele viviti la me zɔ ge akpɔ o, ke boŋ agbe la ƒe kekeli anɔ esi.

¹³Tete farisitɔwo gblɔ nɛ bena: Wò ŋutɔ ɖokuiwò ŋuti nèle ɖase ɖim le, wò ɖaseɖiɖi la menye nyateƒe o.

¹⁴Yesu ɖo ŋu gblɔ na wo bena: Nye la, ne meɖi ɖase le nye ŋutɔ ɖokuinye ŋuti hã la, nye ɖaseɖiɖi la nye nyateƒe; elabena menya afisi metso va kple afisi meyina; miawo la mienya afisi metso va alo; afisi meyina o.

¹⁵Miawo la ŋutilã nu miedrɔ̃a ʋɔnu ɖo, nye la nyemedrɔ̃a ʋɔnu amea ɖeke o.

¹⁶Gake ne nye la medrɔ̃ ʋɔnu la, ele nyateƒe nu, elabena menye nye ɖekae li o, ke boŋ mía kple amesi dɔm ɖa lae.

¹⁷Eye woŋlɔ ɖe miaƒe se la me hã bena, ame eve ƒe ɖaseɖiɖi le nyateƒe nu.

¹⁸Nyee nye amesi le ɖase ɖim le ɖokuinye ŋuti, eye Fofo, si dɔm ɖa la, ɖia ɖase le ŋutinye.

¹⁹Tete wogblɔ nɛ bena: Afika fofowò la le? Yesu ɖo ŋu bena; Mienya mía kple Fofonye o. Ɖe mienyam la, mianya Fofonye hã.

²⁰Egblɔ nya siawo le nunyuiedzraɖoƒe la, esi wòle nu fiãm le mawuƒe la me; eye amea ɖeke melée o, elabena eƒe gaƒoƒo mede haɖe o.

²¹Azɔ egagblɔ na wo bena: Nye la mele dzodzo ge, eye miadim, eye miaku ɖe miaƒe nuvɔ̃ la me afisi nye la meyina la, miawo la miate ŋu ava o.

²²Tete Yudatɔwo gblɔ bena: Ɖe wòyina eɖokui wu ge, esi wògblɔ bena: Afisi nye la meyina la, miawo la miate ŋu ava o mahã?

²³Eye wògblɔ na wo bena: Miawo lã anyigba mietso, ke nye la dziƒo metso; miawo la xexe sia me mietso, nye la nyemetso xexe sia me o:

²⁴Eyata megblɔ na mi bena, miaku ɖe miaƒe nuvɔ̃wo me; elabena ne miexɔe se bena, nyee nye esi o la, miaku ɖe miaƒe nuvɔ̃wo me.

²⁵Tete wogblɔ nɛ bena: Wò la ameka nènye? Yesu gblɔ na wo bena: Nusi megblɔ na mi tso gɔmedzedzea me ke lae.

²⁶Nu geɖewo le asinye, be magblɔ, eye madrɔ̃ ʋɔnu le mia ŋuti; ke amesi dɔm ɖa la, enye nyateƒetɔ, eye nusiwo nye hã mese le egbɔ la, nu mawo ke megblɔna na xexeame.

²⁷Womenyae bena, eƒo nu na wo le Fofo la ŋuti o.

²⁸Yesu gblɔ na wo bena: Ne miekɔ Amegbetɔvi la ɖe dzi la, ekema miadze sii bena, nyee; eye bena nyemewɔa naneke le ɖokuinye si o, ke boŋ abe alesi Fofonye fiãm ene la, nu mawo ke megblɔna.

²⁹Eye amesi dɔm ɖa la, li kplim, eye megblẽ nye ɖeka ɖi o: elabena nye la mewɔa nusi dzea eŋu ɖaa.

³⁰Esi wògblɔ esiawo la, ame geɖewo xɔ edzi se.

³¹Tete Yesu gblɔ na Yudatɔ, siwo xɔ edzi se la bena: Ne mienɔ nye nya la me la, ekema nye nusrɔ̃la vavãwo mienye,

³²eye miadze si nyateƒe la, eye nyateƒe la lawɔ mi ablɔɖeviwoe.

³³Woɖo ŋu nɛ bena: Abraham ƒomeawo míenye, eye míenye amea ɖeke ƒe kluvi kpɔ o: aleke wɔ nagblɔ bena: Miazu ablɔɖeviwo mahã?

³⁴Yesu ɖo ŋu na wo bena: Vavã, vavã mele egblɔm na mi bena: Amesiame, si le nuvɔ̃ wɔm la, nuvɔ̃ ƒe kluvi wònye.

³⁵Ke kluvi menɔa aƒe me ɖaa o, aƒevi la nɔa anyi ɖaa.

³⁶Eyata ne Vi ɖa wɔ mi ablɔɖeviwo la, ekema m anye ablɔɖeviwo vavã.

³⁷Menyae bena, Abraham ƒomea wo mienye; gake miedi be, yewoawum, elabena nye nya la mexɔ dzi na mi o.

³⁸Nye lã nusiwo ke mekpɔ le Fofonye gbɔ la, eya megblɔna, eye miawo hã nusiwo miese tso: mia fofo gbɔ la, eya miewɔna.

³⁹Woxɔ dzi gblɔ nɛ bena: Mia fofoe nye Abraham. Yesu gblɔ na wo bena: Ɖe Abraham viwo mienye la, ne miawɔ Abraham ƒe dɔwɔwɔwo.

⁴⁰Ke azɔ la miedi be, yewoawum, nye amesi gblɔ nyateƒe, si mese tso Mawu gbɔ la, na mi; Abraham mewɔ esia o.

⁴¹Miele mia fofo la ƒe nuwɔnawo wɔm. Wogblɔ ne bena: Miawo la menye ahasiviwo míenye o; fofo ɖekae li na mí, eyae nye Mawu.

⁴²Yesu gblɔ na wo bena: Ɖe Mawu nye mia Fofo la, ne mialɔ̃m, elabena nye la medo go tso Mawu me va; elabena menye ɖokuinye si meva le o, ke boŋ eyae dɔm ɖa.

⁴³Nukaŋuti miele si dzem nye nuƒoƒo oa? Elabena miate ŋu ase nye nya la o.

⁴⁴Miawo la mietso fofo, si nye Abosam la me, eye mia fofo ƒe nudzodzrowo miedina be, miawɔ Eya la amewula wònye tso gɔmedzedzea me, eye mele tsitre ɖe nyateƒe la me o, elabena nyateƒe mele eyama me o. Ne ele aʋatso kam la, eƒoa nu tso eya ŋutɔ ɖokui me, elabena aʋatsokala kple aʋatsokafofo wònye.

⁴⁵Ke nye la, le esi mele nyateƒe gblɔm ta la, miele dzinye xɔm le sesem o.

⁴⁶Ameka le mia dome ali nuvɔ̃ ɖe dzinye mahã? Ne megblɔ nyateƒe la, nukaŋuti miexɔm se o mahã?

⁴⁷Amesi tso Mawu me la, sea Mawu ƒe nyawo; miawo la miele wo sem o, le esi mietso Mawu me o la ta.

⁴⁸Yudatɔwo xɔ dzi gblɔ nɛ bena: Ɖe miegblɔe de eteƒe bena, Samariatɔ nenye, eye gbɔgbɔ vɔ̃ le mewo o mahã?

⁴⁹Yesu ɖo ŋu bena: Nye la gbɔgbɔ vɔ̃ mele menye o; ke mele Fofonye bum, eye miawo miele vlo domem.

⁵⁰Ke nye la nyemedia nye kafukafu o; amea de li, si le edim, eye wòle ʋɔnu drɔ̃m.

⁵¹Vavã, vavã mele egblɔm na mi bena: Ne amea ɖe dzra nye nya ɖo la, mele ku kpɔ ge akpɔ o vaseɖe mavɔmavɔ me.

⁵²Yudatɔwo gblɔ nɛ bena: Azɔ ko míedze sii bena, gbɔgbɔ vɔ̃ le mewo. Abraham ku, nyagblɔɖilawo hã ku, eye wòa nèle gbɔgblɔm bena: Ne amea ɖe dzra nye nya ɖo la, mele ku ɖɔ ge akpɔ o vaseɖe mavɔmavɔ me mahã?

⁵³Ɖe wòa nèwu mia fofo Abraham, si ku la, mahã. Eye nyagblɔɖilawo hã ku! Ameka nèle ɖokuiwò bumii mahã?

⁵⁴Yesu ɖo ŋu bena: Nenye ɖe mekafu ɖokuinye la, ekema nye kafukafu la menye naneke o; Fofonye li, amesi miawo miele gbɔgblɔm bena, enye miaƒe Mawu la, eyae le kafuyem.

⁵⁵Eye mienyae o, gake nye la menyae, eye ne megblɔ bena, nyemenyae o la, ekema manye aʋatsokala abe miawo ke ene; gake menyae, eye medzra eƒe nya la ɖo.

⁵⁶Mia fofo Abraham dzɔ dzi be, yeakpɔ nye ŋkeke la, eye wòkpɔe, eye wòkpɔ dzidzɔ.

⁵⁷Tete Yudatɔwo gblɔ nɛ bena: Mexɔ ƒe blaatɔ̃ haɖe o, eye nèkpɔ Abraham mahã?

⁵⁸Yesu gblɔ na wo bena: Vavã, vavã mele egblɔm na mi bena: Hafi Abraham nava dzɔ la, nyeama meli xoxo.

⁵⁹Tete wofa kpewo, be yewoaƒui; ke Yesu ɣla eɖokui, eye wòdo go le mawuƒe la me.