Read ewe Korintotɔwo I 11 Bible Online

Korintotɔwo I 11 - ewe bible

Korintotɔwo I 11

¹Mizu srɔ̃nyelawo, abe alesi nye hã menye Kristo-srɔ̃la ene.

²Ke mele mia kafum, nɔviwò, bena mieɖoa ŋku dzinye le nusianu me, eye mielé nyaɖoɖoawo me ɖe asi, abe alesi meɖo na mi la ene.

³Ke mele ɖiɖim bena, mianyae bena, ŋutsu sia ŋutsu ƒe ta enye Kristo, ke nyɔnu ƒe ta enye ŋutsu, ke Kristo ƒe ta enye Mawu.

⁴Ke ŋutsu sia ŋutsu, si doa gbe ɖa alo gblɔa nya ɖi, eye wòtsyɔ nu ta la, edoa ŋukpe eƒe ta.

⁵Ke nyɔnu sia nyɔnu, si doa gbe ɖa alo gblɔa nya ɖi, eye mebia ta o la, edoa ŋukpe eƒe ta, elabena ele abe ɖe wòlũ ta ene.

⁶Elabena ne nyɔnu mebia ta o la, na ne wòako ta keŋ! Ke ne enye ŋukpe na nyɔnu be, wòako ta alo wòalũi la, ekema nebia ta.

⁷Hafi ŋutsu la negatsyɔ nu ta o; elabena Mawu ƒe nɔnɔme kple eƒe bubu wònye, ke nyɔnu enye ŋutsu ƒe bubu.

⁸Elabena ŋutsu metso nyɔnu me o, hafi nyɔnu boŋ ye tso ŋutsu me.

⁹Elabena womewɔ ŋutsu le nyɔnu ta o, hafi wowɔ nyɔnu le ŋutsu ta boŋ.

¹⁰Eyata ele na nyɔnu bena, wòakpɔ ŋusẽ ɖe eƒe ta dzi le mawudɔlawo ŋuti.

¹¹Gake srɔ̃nyɔnu mele Aƒetɔ la me ŋutsu manɔmee o, eye srɔ̃ŋutsu hã mele Aƒetɔ la me nyɔnu manɔmee o.

¹²Elabena abe alesi nyɔnu tso ŋutsu me la, nenema ke ŋutsu hã to nyɔnu me va; ke esiawo katã tso Mawu gbɔ.

¹³Midrɔ̃e le mia ŋutɔwo mia ɖokui me kpɔ, ɖe wòdze be, nyɔnu, si mebia ta o la, nado gbe ɖa na Mawu mahã?

¹⁴Alo ɖe dzɔdzɔme ŋutɔ mèfia mi bena, ne ɖa legbe li na ŋutsu la; enye ŋukpe nɛ oa?

¹⁵Ke nyɔnu la, ne ɖa legbe li nɛ la, enye bubu nɛ; elabena wotsɔ ɖa legbe nɛ ɖe nutsyɔnu teƒe.

¹⁶Ke ne enyo amea ɖe ŋu be, yeanye dzretɔ la, gake miaƒe nuwɔnawo mele nenem o, eye Mawu ƒe hameawo hã nenema ke.

¹⁷Ke esi mede se sia na mi ta, nyemate ŋu akafu mi o bena, mieva kpea ta, menye bena mianye awu o, ke boŋ bene miagblẽ ɖe dzi awu.

¹⁸Elabena gbã la, ne mieƒo ƒu ɖe hame la ƒe takpekpe me la, mesena bena, mamãwo naa mia dome, eye mexɔa ɖewo dzi sena.

¹⁹Elabena ele vevie bena, kɔmamãwo hã naɖo mia dome, bene amesiwo li ke la, nadze ƒã le mia dome.

²⁰Azɔ la ne mieva kpe ta ɖe afi ɖeka la, menye Aƒetɔ la ƒe nuɖuɖue nye ekema o.

²¹Elabena amesiame tsɔa ye ŋutɔ ƒe nuɖuɖu heɖuna gbã le nuaɖuƒe, ɖɔ nɔa amea ɖe wum, ke ame bubu mua aha.

²²Alo ɖe aƒewo mele mia si, miaɖu nu, eye miano nu le wo me oa? Alo ɖe mieɖoa vlo Mawu ƒe hame, eye mieɖoa ŋukpe amesiwo mekpɔ nuwo o la mahã? Nuka gblɔ ge mala? Ɖe makafu mia? Esia me la nyemele mia kafu ge akpɔ o.

²³Elabena nye la, nusi mexɔ tso Aƒetɔ la gbɔ la, metsɔ de asi na mi bena, Aƒetɔ Yesu le zã, si me wofiã eyome mɔ la, etso abolo ɖe asi,

²⁴eye esi wòda akpe le eta la, èŋe eme gblɔ bena: „Mixɔe ɖu, esiae nye nye ŋutilã, si woŋe le mia ta; miwo esia, ne miatsɔe aɖo ŋku dzinye.“

²⁵Nenema ke wòtsɔ kplu le nuɖuɖu la megbe hegblɔ bena: „Esiae nye nubabla yeye ƒe kplu le nye ʋu me; miwo esia, zi alesi mianoe la, ne miatsɔe aɖo ŋku dzinye.“

²⁶Elabena zi alesi míeɖua abolo sia, eye mienoa nu le kplu sia nu la, miele gbe ƒã ɖem Aƒetɔ la ƒe ku, halase esime wòava va.

²⁷Eyata amesi ke ɖua abolo sia, alo noa nu le Aƒetɔ la ƒe kplu sia nu madzemadze la, aɖi fɔ le Aƒetɔ la ƒe ŋutilã kple nu la ŋuti.

²⁸Ke ame naɖo eɖokui akpɔ, eye ale wòaɖu abolo sia ƒe ɖe, eye wòano nu le kplu sia nu.

²⁹Elabena amesi ɖunɛ alo nonɛ madzemadze la, eɖua, eye wònoa ʋɔnudɔdrɔ̃ na eɖokui, elabena mebu Aƒetɔ la ƒe ŋutilã me kpɔna o.

³⁰Esia ŋuti mia dome ame geɖe ƒe lãme gbɔdzɔ, eye amewo le dɔ lém, eye ame geɖewo ku.

³¹Elabena ɖe mieɖu mia ɖokui me kpɔ la, anye ne womele ʋɔnu drɔ̃ ge mi o.

³²Ke ne wodrɔ̃ ʋɔnu mi la, Aƒetɔ la hea to na mi, bene womagabu fɔ mi kple xexeame zi ɖeka o.

³³Eyata, nɔviwò, ne mieva kpe ta le nu ɖu ge la, ekema milala mia nɔewo.

³⁴Ke ne ɖa le amea ɖe wum la, neɖu nu le aƒe me, bene miagava kpe ta hena ʋɔnudɔdrɔ̃ o. Ke ne meva la, maɖo nusiwo susɔ la.