Read ewe Korintotɔwo I 14 Bible Online

Korintotɔwo I 14 - ewe bible

Korintotɔwo I 14

¹Miti lɔlɔ̃ yome; ke midi gbɔgbɔ me nuwo vevie: vevietɔ bena miagblɔ nya ɖi.

²Elabena amesi tsɔa gbegbɔgblɔ ƒoa nu la, meƒoa nu na amewo o, ke na Mawu boŋ; elabena amea ɖeke mesene o, ke gbɔgbɔ me wòle nya ɣaɣlawo gblɔm le;

³ke amesi le nya gblɔm ɖi la, eƒoa nu na amewo hegblɔa amedoɖeŋgɔgbenya, nuxlɔ̃menya kple akɔfafanyawo.

⁴Amesi tsɔa gbegbɔgblɔ ƒoa nu la, edoa eɖokui ɖe ŋgɔgbe; ke amesi le nya gblɔm ɖi la, edoa hame la ɖe ŋgɔgbe.

⁵Ke mele didim bena, mi katã miatso gbegbɔgblɔwo aƒo nu; ke mele didim wu be, miagblɔ nya ɖi; elabena amesi gblɔa nya ɖi la, ewu amesi tsoa gbegbɔgblɔwo ƒoa nu la sa, negbe ɖeko wòaɖe egɔme, bene hame la nakpe ŋgɔgbedede.

⁶Ke azɔ la, nɔviwò, nenye ɖe meva mia gbɔ tsɔ gbegbɔgblɔwo le nu ƒom la, viɖe ka wòanye na mi, ne menye ɖe maƒo nu na mi le nyaɖeɖefia me alo sidzedze me alo nyagbɔgblɔɖi me alo nufiafia me o mahã?

⁷Nenema ke nu agbe manɔme, siwo ɖina, nenye dze alo saŋku, ne woƒe ɖiɖi meto vovo o la, aleke woadze si nusi wokuna alo nusi woƒona mahã?

⁸Elabena ne kpẽ ƒe ɖiɖime mekɔ o la, ameka ladzra eɖokui ɖo na aʋa la mahã?

⁹Nenema ke miawo hã, ne mietso aɖe gblɔ nya, si me mekɔ o la, aleke woadze si nusi miegblɔ la? Elabena mianye amesiwo le nu ƒom ɖe ya me.

¹⁰Gbegbɔgblɔ bubu ƒomevi geɖewo nya le xexe sia me, eye wo dome ɖeke meli, si menya sena o.

¹¹Azɔ ne nyemese gbea ɖe o la, manye fiafiala na amesi le nu ƒom la, eye amesi le nu ƒom la hã anye fiafiala nam.

¹²Nenema ke miawo hã, esi míenye veviedolawo le gbɔgbɔwo ŋuti la, midi vevie bena, miagba go hena hame la ƒe ŋgɔgbedede.

¹³Eyata amesi tsoa gbegbɔgblɔ ƒoa nu la, nado gbe da, bene woade gɔme hã.

¹⁴Elabena ne metsɔa gbegbɔgblɔ doa gbe ɖa la, nye gbɔgbɔ la doa gbe ɖa, gake nye tamesusu metsea ku o.

¹⁵Azɔ la alekee? Mado gbe ɖa kple gbɔgbɔ, ke mado gbe ɖa kple tamesusu hã; madzi ha kple gbɔgbɔ, ke madzi ha kple tamesusu hã.

¹⁶Elabena ne èle akpe dam kple gbɔgbɔ la, aleke lawɔ, amesi le numanyamanyatɔ nɔƒe la, agble amen aƒu wò akpedada dzi, esi menya nusi nègblɔ la o mahã?

¹⁷Elabena wò la eda akpe nyuie, gake mèdo ame bubu la de ŋgɔgbe o.

¹⁸Meda akpe na Mawu bena, metsɔa gbegbɔgblɔ gblɔa nya wu mi katã.

¹⁹Ke ne mele ha me la, mele didim bena, matso nye tamesusu agblɔ nya atɔ̃, bene mafia nu ame bubuwo hã awu esi matsɔ gbegbɔgblɔ agblɔ nya akpe ewo.

²⁰Nɔvinyewo, migazu viwo le nyasã me o, ke mizu vidzĩewo le nu tovo wɔwɔ me boŋ, ke nyasã me la mizu ame tsitsiwo.

²¹Woŋlɔ ɖe segbalẽa me bena: „Matsɔ ame bubuwo ƒe aɖewo kple ame bubuwo ƒe nuyiwo aƒo nu kple dukɔ sia, eye nenema hã womaɖe tom o; Aƒetɔ la gblɔe.“

²²Eyata gbegbɔgblɔwo nye dzesi, menye na xɔsetɔwo o, ke na dzimaxɔsetɔwo boŋ; gake nyagbɔgblɔɖi mele na dzimaxɔsetɔwo o, ke na xɔsetɔwo boŋ.

²³Azɔ la nenye hame blibo la katã va kpe ta ɖe afi ɖeka, eye amewo katã tsɔ gbegbɔgblɔ ƒo nu, eye numanyamanyatɔwo alo dzimaxɔsetɔwo ava ge ɖe eme la, womagblɔ bena, tsu kum miele o mahã?

²⁴Ke nenye wo katã gblɔa nya ɖi, eye dzimaxɔsetɔ alo numanyamanyatɔa ɖe va ge ɖe eme la, wo katã woaƒo nya ɖe enu wòagloe, eye wo katã woadrɔ̃ ʋɔnui,

²⁵eye eƒe dzimenya ɣaɣlawo adze ƒã, eye ale wòatsɔ mɔ atsyɔ anyi, eye wòado gbe ɖa na Mawu, eye wòaɖe gbe ƒã bena, Mawu le mia dome vavã.

²⁶Azɔ la alekee, nɔviwò? Ne mieva kpe ta la, hadzidzi kple nufiafia kple gbegbɔgblɔ kple nyaɖeɖefia kple gɔmeɖeɖe le mia dome amesiame si; woawo nuwo katã hena ŋgɔgbedede!

²⁷Nenye be, amea ɖe tsɔ gbegbɔgblɔ ƒo nu la, woanye ame eve alo ƒã la ame etɔ̃, eye woaƒo nu ɖekaɖeka, eye ame ɖeka naɖe egɔme.

²⁸Ke nenye be, gɔmeɖela meli o la, nezi ɖoɖoe le ha la me: ke neƒo nu na ye ŋutɔ ɖokui kple Mawu.

²⁹Ke nyagblɔɖilawo la ame eve alo ame etɔ̃ nagblɔ nya ɖi, eye ame mamleawo nabu eme kpɔ.

³⁰Ke nenye be, woɖe nya fia ame bubu, si bɔbɔ nɔ anyi la, gbãtɔ la nazi ɖoɖoe.

³¹Elabena mi katã miate ŋu agble nya ɖi ɖekaɖeka, bene wo katã nasrɔ̃ nu, eye woaxlɔ̃ nu wo katã.

³²Eye nyagblɔɖilawo ƒe gbɔgbɔwo bɔbɔa wo ɖokui na nyagblɔɖilawo.

³³Elabena Mawu menye nyamanyamawɔwɔ ƒe Mawu o, ke ŋutifafa ƒe Mawu boŋ.

³⁴Abe alesi wòle le ame kɔkɔewo ƒe hawo katã me ene la, miaƒe nyɔnuwo nazi ɖoɖoe le takpekpewo me, elabena womeɖe mɔ na wo bena, woaƒo nu o; ke woaɖo to boŋ, abe alesi se ta gblɔ ene.

³⁵Ke ne wole didim be, yewoasrɔ̃ nane ta, mina woabia woawo ŋutɔ srɔ̃wo le aƒe me, elabena medze nyɔnuwo bena, woaƒo nu le takpekpe me o.

³⁶Alo ɖe mia mee mawunya dzɔ tsoa? Alo miawo ɖeɖe gbɔ wòva loo?

³⁷Ke ne amea ɖe bua eɖokui nyagblɔɖila alo gbɔgbɔmeme la, nedze si nusiwo meŋlɔ ɖo ɖe mi la bena, Aƒetɔ la ƒe sededewoe.

³⁸Ke ne amea ɖe medze sii o la, negadze sii o!

³⁹Eyata, nɔviwo, midi nyagbɔgblɔɖi vevie, eye migagbe gbebɔgblɔ o.

⁴⁰Mina woawɔ nuwo katã, alesi dze ɖe eteƒeteƒe.