Read ewe Korintotɔwo I 15 Bible Online

Korintotɔwo I 15 - ewe bible

Korintotɔwo I 15

¹Ke, nɔviwo, mena mienya nyanyuie, si megblɔ fia mi, si miexɔ hã, esi me míetsi tre ɖo hã,

²si me woxɔ mi ɖe agbe le hã, ne mielée ɖe asi, abe alesi metsɔ nyanyuie la gblɔ fia mi ene la; anye ne miexɔ edzi se dzodzo.

³Elabena nusi nye hã mexɔ la, metsɔ de asi na mi gbãgbiagbã bena, Kristo ku le mia nuvɔ̃ ŋuti le ŋɔŋlɔ la nu,

⁴eye bena woɖii, eye bena wogafɔe ɖe tsitre tso ame kukuwo dome le ŋkeke etɔ̃agbe le ŋɔŋlɔ la nu,

⁵eye bena ede eɖokui fia Kefa, emegbe la ame wuieve la.

⁶Eya megbe la eɖe eɖokui fia nɔvi, siwo wu ame alafa atɔ̃ la zi ɖeka, amesiwo dome geɖeawo le agbe vaseɖe fifi, ke amea ɖewo hã ɖɔ alɔ̃.

⁷Emegbe la eɖe eɖokui fia Yakobo, emegbe da apostolowo katã.

⁸Wo katã megbe la eɖe eɖokui fia nye hã abe fu gegee ene.

⁹Elabena nye enye suetɔ le apostoloawo dome, amesi medze be, woayɔ be apostolo o, elabena meli Mawu ƒe hame la yome.

¹⁰Ke Mawu ƒe amenuveve la ŋuti mezu nusi menye, eye eƒe amenuveve, si wotsɔ ve nunye la, menye dzodzro o, elabena medze agbagba geɖe wu wo katã; ke menye nyee o, hafi Mawu ƒe amenuveve, si le kpakplim la boŋ.

¹¹Azɔ la eɖanye nyee o, eɖanye ame kemewo o, nenema ke míeɖe gbe ƒã, eye nenema ke míexɔe se.

¹²Ke ne woɖe gbe ƒã Kristo bena, etsi tre tso ame kukuwo dome la, aleke wo mia dome amea ɖewo gblɔ bena, ame kukuwo ƒe tsitretsitsia ɖeke meli o mahã?

¹³Ke ne ame kukuwo ƒe tsitretsitsia ɖeke meli o la, ekema Kristo hã metsi tre o.

¹⁴Ke ne Kristo metsi tre o la, ekema miaƒe gbeƒãɖeɖe enye dzodzro, eye miaƒe xɔse hã enye dzodzro.

¹⁵Ke woakpɔ mi abe Mawu ƒe aʋatsoɖaseɖilawo hã ene, elabena míeɖi ɖase ɖe Mawu ŋuti bena, efɔ Kristo ɖe tsitre, amesi mefɔ ɖe tsitre hafi o, nenye be, ele me vavã bena, womefɔ ame kukuwo ɖe tsitre o la.

¹⁶Elabena ɖe womefɔa ame kukuwo ɖe tsitre o la, anye ne Kristo hã metsi tre o.

¹⁷Ke ne Kristo metsi tre o la, miaƒe xɔse enye yaka, eye miegale miaƒe nuvɔ̃wo me.

¹⁸Ekema amesiwo dɔ alɔ̃ le Kristo me la, hã tsrɔ̃.

¹⁹Ne míekpɔ mɔ na Kristo le agbe sia me ɖeɖeko la, ekema míenye nublanuitɔwo wu amewo katã.

²⁰Ke azɔ la Kristo tsi tre tso ame kukuwo dome, eye wòzu amesiwo dɔ alɔ̃ la dome ŋgɔgbetɔ.

²¹Elabena esi wònye ame mee ku la to va ŋuti la, ame kukuwo ƒe tsitretsitsi la hã to ame ke me va.

²²Elabena alesi amewo katã ku le Adam me la, nenema ke woagbɔ agbe wo katã hã le Kristo me.

²³Gake amesiame le ye ŋutɔ ƒe ɖoɖo nu: Gbãtɔ enye Kristo; emegbe la amesiwo le Kristo me le eƒe vavagbe la;

²⁴emegbe la nuwuwu la ava, esime woatsɔ fiaɖuƒe la ade asi na Mawu Fofoa, esime wòava aɖe amegãnyenye katã kple ŋusẽ katã kple dziɖuɖu katã ɖa la.

²⁵Elabena ele ne be, wòaɖu fia, halase esime woatsɔ eƒe futɔwo katã ade eƒe afɔ te.

²⁶Futɔ mamletɔ, si woaɖe ɖa la, enye ku.

²⁷Elabena etso nuwo katã de eƒe afɔ te. Ke ne egblɔ bena, wotsɔ nuwo katã de ete la, edze ƒã bena, amesi tso wo katã de ete la, mele eme o.

²⁸Ke ne wotsɔ nuwo katã de ete la, ekema Vi la ŋutɔ hã atsɔ eɖokui ade amesi tso nuwo katã de ete la te, bene Mawu nanye wo katã le wo katã me.

²⁹Elabena nuka wotu amesiwo na wode mawutsi ta na wo le ame kukuwo ta lale? Ne womafɔ ame kukuwo ɖe tsitre kura o la, nuka wona wode mawutsi ta na wo le woamawo ta mahã?

³⁰Nukaŋuti miawo hã míeɖoa ŋɔdzi me le gaƒoƒo sia gaƒoƒo mea?

³¹Meta miaƒe kafukafu, si le asinye le Kristo Yesu, mía Aƒetɔ me la bena, gbesiagbee mekuna.

³²Nenye ame ƒe susu nue mewo aʋa kple lã wɔadãwo le Efeso la, ekema viɖe ka wònye nam? Ne womefɔ ame kukuwo ɖe tsitre o la, ekema „minɛ míaɖu nu, eye miano nu, elabena etso miele kuku ge!“

³³Migana woable mi o! Habɔbɔ vɔ̃wo gblẽa nuwɔna nyuiwo.

³⁴Mizu mo xexee tɔwo vavã, eye migawɔ nuvɔ̃ o! Elabena simadzemadze Mawu le amea ɖewo me; ŋukpedodo mi ta megblɔe ɖo.

³⁵Ke ɖewo amea ɖe agblɔ be: Aleke ame kukuwo le fɔfɔ ge ɖe tsitre mahã? Eye ŋutilã ka wole tsɔtsɔ ge adoe mahã?

³⁶Wò bometsila, nusi nèƒã la, magbɔ agbe o, negbe ɖeko woaku hafi.

³⁷Eye nusi nèƒãna la, menye nɔnɔme blibo, si le dzɔdzɔ ge lae nèƒã o, hafi nuku gbɔloa ɖe, eɖanye bli alo nu mamleawo dometɔa ɖe o.

³⁸Ke Mawu na nɔnɔmee, alesi wòlɔ̃, eye nukuwo dome ɖesiaɖe la etsɔ nuku la ŋutɔ ƒe nɔnɔme nɛ.

³⁹Menye lãwo katãe nye lã ɖeka ƒomevi o: ke amegbetɔwo ƒe lã le vovo, lãfɔnewo ƒe lã le vovo, tɔmelãwo ƒe lã le vovo, xeviwo ƒe lã le vovo.

⁴⁰Eye dziƒoŋutilãwo li, eye anyigba dzi ŋutilãwo hã li; gake dziƒotɔwo ƒe ŋutikɔkɔe le vovo, eye anyigbadzitɔwo tɔ le vovo.

⁴¹Ye ƒe ŋutikɔkɔe le vovo, eye ɣleti ƒe ŋutikɔkɔe hã le vovo, eye ɣletiviwo ƒe ŋutikɔkɔe hã le vovo; elabena vovo le ɣletivi kple ɣletivi dome le ŋutikɔkɔe gome.

⁴²Nenema ke ame kukuwo ƒe tsitretsitsi hã le: Woƒãa nu le gbegblẽ me, eye woafɔe ɖe tsitre le magblẽmagblẽ me;

⁴³woƒãɛ nu le bubu makpɔmakpɔe me, eye woafɔe ɖe tsitre le ŋutikɔkɔe me: woƒãa nu le gbɔdzɔgbɔdzɔ me, eye woafɔe ɖe tsitre le ŋusẽ me.

⁴⁴Woƒãa luʋɔŋutilã, eye woafa gbɔgbɔŋutilã ɖe tsitre. Luʋɔŋutilã li, eye gbɔgbɔŋutilã hã li.

⁴⁵Nenema ke woŋlɔ ɖi bena: „Ame gbãtɔ, Adam la, zu luʋɔ gbagbe;“ Adam mamletɔ la zu gbɔgbɔ, si na agbe.

⁴⁶Ke menye gbɔgbɔmetɔ enye gbãtɔ o, hafi luʋɔtɔ la boŋ, emegbe la gbɔgbɔmetɔ la.

⁴⁷Ame gbãtɔ, si tso anyigba me la, enye anyigbadzitɔ, ame evelia enye Aƒetɔ si tso dziƒo la.

⁴⁸Alesi ke anyigbadzitɔa le la, nenema ke anyigbadzitɔwo hã le; alesi ke dziƒotɔa le la, nenema ke dziƒotɔwo hã le;

⁴⁹eye alesi anyigbadzitɔa ƒe nɔnɔme le mia ŋu la, nenema ke dziƒotɔa ƒe nɔnɔme hã nanɔ mia ŋu.

⁵⁰Ke mele esia gblɔm, nɔviwo, bena ŋutilã kple ʋu mate ŋu anyi mawufiaɖuƒe la ƒe dome o, eye gbegblẽ mate ŋu anyi magblẽmagblẽ ƒe dome o.

⁵¹Mikpɔ ɖa, mele nya ɣaɣla gblɔm na mi: Mí katã miele alɔ̃ dɔ ge o; gake woatrɔ mí katã míaƒe nɔnɔme,

⁵²kasia le aɖabaƒoƒo ɖeka me, le kpẽkuku mamlea me; elabena woaku kpẽ, eye woafɔ ame kukuwo ɖe tsitre magblẽmagblẽ, eye míawo la woatrɔ miaƒe nɔnɔme.

⁵³Elabena ele be, nu gbegblẽ sia nado magblẽmagblẽ, eye nu kuku sia nado makumaku.

⁵⁴Ke esime nu gbegblẽ sia lava ɖo magblẽmagblẽ, eye nu kuku sia lava ɖo makumaku la, ekema nya, si woŋlɔ ɖi la, ava ve me bena: „Womi ku le dziɖuɖu me.“

⁵⁵Wò ku, afika wò ti la le? Wò tsieƒe, afika wò dziɖuɖu la le?

⁵⁶Elabena ku ƒe ti enye nuvɔ̃, ke nuvɔ̃ ƒe ŋusẽ enye se la.

⁵⁷Ke woada akpe na Mawu, si na dziɖuɖu mi to mia Aƒetɔ Yesu Kristo dzi la!

⁵⁸Eyata, nɔvinye lɔlɔ̃tɔwo, minɔ te sesĩe, maʋãmaʋã, eye migba go ɖaasi le Aƒetɔ la ƒe dɔwɔwɔ me, esi mienyae bena, miaƒe agbagbadzedze menye dzodzro le Aƒetɔ la me o ŋuti la.