Read ewe Korintotɔwo I 16 Bible Online

Korintotɔwo I 16 - ewe bible

Korintotɔwo I 16

¹Ke le nudzɔdzɔ na ame kɔkɔeawo ŋuti, alesi meɖoe na Galatia-hamewo la, nenema ke miawo hã miwɔ.

²Kwasiɖa ƒe ŋkeke gbãtɔ dzi la mia dome amesiame natsɔ nane adzra ɖo ɖi vovo ɖe ye ŋutɔ gbɔ, eye wòaƒo enu ƒu le eƒe viɖekpɔkpɔ nu, bena menye ne meva la, hafi woadze nudzɔdzɔ gome o.

³Ke ne meva va la, matsɔ agbalẽwo aɖe asi na amesiwo ke míekpɔ be, wodze la, aɖo wo ɖa, ne woatsɔ miaƒe nunana ayi Yerusalem.

⁴Ke nenye be, edze bena, nye hã mayi la, ekema woayi kplim.

⁵Ke ne metso Makedonia la, mava mia gbɔ, elabena mato Makedonia.

⁶Ɖewo matsi mia gbɔ ʋee, alo ɖewo mana anyi, halase esime vuvɔŋɔli nu nayi mahĩ, bene miaɖom ɖa ayi afisiafi, si mayi ɖo la.

⁷Elabena nyemele didim bena, makpe mi fifi le mɔzɔzɔ me o; elabena mele mɔ kpɔm bena, ne Aƒetɔ la ɖe mɔ nam la, matsi mia gbɔ ʋee.

⁸Ke matsi Efeso yiɖase Pentekoste dzi.

⁹Elabena woʋu ʋɔtru gã, si na da geɖe la nam, eye adikãtɔ geɖewo li.

¹⁰Ke ne Timoteo va la, mikpɔ nyuie, bena wòagavɔ̃ le mia gbɔ o, elabena ewɔa Aƒetɔ la ƒe dɔ la abe nye ke ene.

¹¹Eyata amea ɖeke magado vloe o! Ke miɖoe ɖa le ŋutifafa me boŋ, bene wòava gbɔnye, elabena mele eya kple nɔviawo lalam.

¹²Ke le nɔvi Apolo ŋuti la, meɖe kuku nɛ ŋutɔ bena, eya kple nɔviawo nayi mia gbɔ, eye menye eƒe lɔlɔ̃nu kura be, yeava mia gbɔ fifi o, ke ne ekpɔ asinu nyui la, ava.

¹³Minɔ ŋudzɔ, minɔ tsitre le xɔse me, miwo ŋutsu, eye mise ŋu!

¹⁴Miwɔ nuwo katã le lɔlɔ̃ me!

¹⁵Mele nu xlɔ̃m mi, nɔviwò — mienya Stefana ƒe aƒe la bena, eyae nye ŋgɔgbetɔ le Axaya, eye bena, woɖo wo ɖokui ame kɔkɔewo subɔlawo —

¹⁶bena miawo hã miatso mia ɖokui ade nenem me siawo kpakple amesiame, si woa do kpli mi, eye wòdzea agbagba la te.

¹⁷Mekpɔ dzidzɔ le Stefano, Fortunato kple Axaiko ƒe vava la ŋuti; elabena esi mieli kplim o la, amesiawoe xɔ ɖe mia teƒe.

¹⁸Elabena wona mia kple miaƒe gbɔgbɔ la gbɔ ɖe eme; eyata midze si nenem me siawo.

¹⁹Asia-hameawo ɖuɖɔ mi ƒã! Akwila kple Priskila kpakple hame, si le woƒe aƒe me la, ɖuɖɔ mi vevie ŋutɔ le Aƒetɔ la me!

²⁰Nɔviwo katã ɖuɖɔ mi ƒã! Mitsɔ nugbugbɔ kɔkɔe gbugbɔ nu na mia nɔewo!

²¹Ɖuɖɔ, si nye Paulo metsɔ nye asi ŋlɔe la, enye esi.

²²Ne amea ɖe melɔ̃ Aƒetɔ Yesu Kristo o la, nezu busu! Aƒetɔ la gbɔna!

²³Mía Aƒetɔ Yesu Kristo ƒe amenuveve nanɔ anyi kpli mi! Nye lɔlɔ̃ nanɔ anyi kpli mi katã le Kristo Yesu me! Amen.