Read ewe Galatiatɔwo 4 Bible Online

Galatiatɔwo 4 - ewe bible

Galatiatɔwo 4

¹Ke mele gbɔgblɔm be: Ŋkeke alesi domenyila enye ɖevi la, vovoa ɖeke mele eya kple kluvi dome o, wònye eyae nye nuwo katã ƒe aƒetɔ hafi;

²ke boŋ ele amenyilawo kple aƒedzikpɔlawo te halase ɣeyiɣi, si fofoa ɖo ɖi la dzi.

³Nenema ke nye miawo hã: Esi míenye ɖeviwo la, mieno xexe sia me gɔmedzenuwo ƒe kluvinyenye te.

⁴Ke esi azãgbe la ɖo vo la, Mawu dɔ ye ŋuta Via ɖo ɖa, eye nyɔnua ɖe dzii, eye wodzii ɖe se la te,

⁵bene wòaxe fe ɖe amesiwo le sea te la ta, bene vinyenye la nasu mía si.

⁶Ke esi míenye viwo ŋuti la, Mawu dɔ Via ƒe Gbɔgbɔ, si le ɣli ɖom be; Aba, Fofo la, ɖo ɖe míaƒe dziwo me.

⁷Eyata meganye kluvi o, ke boŋ vi nènye; ke ne ènye vi la, ekema Mawu ƒe domenyila hã nenye le Kristo me.

⁸Ke ɣemaɣi, esime mienya Mawu o la, mienye nusiwo menye mawuwo tso dzɔdzɔ me o la ƒe kluviwo.

⁹Ke azɔ la, esi mienya Mawu alo Mawu boŋ nya mi la, aleke wɔ, eye miegatrɔ yi ɖe gɔmedzenu gbɔdzɔ daheawo gbɔ, eye miegale didim be, miagasubɔ wo tso gɔmedzedzea me mahã?

¹⁰Mieléa ŋku ɖe ŋkekewo kple dzinuwo kple azãgbewo kpakple ƒewo ŋuti.

¹¹Mele vɔvɔ̃m ɖe mia nu bena, misela medze agbagba dzodzro ɖe mia ta mahĩ?

¹²Mizu abe nye ene; elabena nye hã mezu abe miawo ene! Nɔviwo, mele kuku ɖem na mi; miewɔ vɔ̃a ɖeke ɖe ŋunye o.

¹³Ke mienyae bena, le ŋutilã ƒe gbɔdzɔgbɔdzɔ ŋuti megblɔ nyanyuie fia mi zi gbãtɔ.

¹⁴Eye tetekpɔ, si le nye ŋutilã me na mi la, miedo vloe o, eye mienyɔ ŋui o, hafi boŋ miexam abe mawudɔla alo abe Kristo Yesu ene.

¹⁵Azɔ miaƒe dzidzo ƒe kafukafu la, afika wòle mahã? Elabena mele ɖase ɖim le mia ŋuti bena, ɖe miete ŋui la, ne mieho miaƒe ŋkuwo le to me tso nam.

¹⁶Esi megblɔ nyateƒe na mi la, eyata mezu miaƒe futɔ mahã?

¹⁷Alesi wole ŋu ʋãm le mia ŋuti la, menyo o; ke boŋ wole didim be, yewoasa mi ɖe aga, bene miaʋã ŋu le yewo ŋuti.

¹⁸Ke ŋuʋaʋã le nu nyui ŋuti nyo ɖaasi, eye menye ne mele mia gbɔ ɖeɖeko o.

¹⁹Vinyewo, amesiwo ƒe fu gale ɖuyem, halase esime woamè Kristo ƒe nɔnɔme ade nua me!

²⁰Ke medi bena, manɔ mia gbɔ fifi, ne matrɔ nye gbe; elabena nye tame blu le mia ta.

²¹Migblɔe nam, mi amesiwo le didim be, yewoanɔ sea te la, miese se la oa?

²²Elabena woŋlɔ ɖi bena, vi eve nɔ Abraham si Ame ɖeka tso kosi me, eye ame ɖeka tso ablɔɖenyɔnu me!

²³Ke amesi tso kosi me la, wodzii le ŋutilã la nu, eye amesi tso ablɔɖenyɔnu me la, wodzii to ŋugbedodo la me.

²⁴Nusiawo nye lododo; elabena esiawo nye nubabla eveawo. Ɖeka tso Sinai-to la dzi, si dzia vi hena kluvinyenye, esia nye Hagar;

²⁵elabena Hagar enye Sinai-to la le Arabia, ke esɔ kple egbegbe Yerusalem; elabena eya kple viawo le kluvinyenye me.

²⁶Ke dziƒo Yerusalem enye ablɔɖe, eyae nye mí katã dada.

²⁷Elabena woŋlɔ ɖi bena: „Dzi nadzo wò konɔ, si medzi vi o; tso aseye, eye nado ɣli, wò, amesi melé ku kpɔ o la; elabena amesi tsi akogo la, vi geɖe anɔ esi awu srɔ̃tɔ.“

²⁸Ke miawo la, nɔviwo, le Isak nu míenye ŋugbedodo la ƒe viwo.

²⁹Ke alesi amesi wodzi le ŋutilã nu la, ti amesi wodzi le Gbɔgbɔ nu la yome tsã la, nenema ke wogale fifia hã.

³⁰Ke nuka ŋɔŋlɔ la gblɔ ɖia? „Nyã kosi la kple via; elabena kosi la ƒe vi la maganyi dome kple ablɔɖenyɔnu la ƒe vi la o.“

³¹Eyata, noviwò, míenye kosi la ƒe viwo o, hafi boŋ ablɔɖenyɔnu la to míenye.