Read ewe Efesotɔwo 3 Bible Online

Efesotɔwo 3 - ewe bible

Efesotɔwo 3

¹Esiaŋuti la nye Paulo, Yesu Kristo ƒe gatɔ le mi trɔ̃subɔlawo ŋuti la,

²nenye ɖe miese Mawu ƒe amenuveve, si wonam le mia ta la ƒe nuɖoanyi,

³bena le nyaɖeɖefia nu wòna menya nya ɣaɣla la, abe alesi meŋlɔ na mi kpuie va yi la ene,

⁴le eya me, ne miele exlẽm la, míate ŋu adze si nye Kristo ƒe nya ɣaɣla la gɔmesese,

⁵si womèna amegbetɔviwo nya le ŋɔli bubuwo me o, abe alesi woɖee fia eƒe apostolowo kple nyagblɔɖila kɔkɔewo le Gbɔgbɔ la me azɔ la ene o,

⁶bena trɔ̃subɔlawo zu ŋugbedodo ƒe domenyilawo kple hadelawo kple gomekpɔlawo le Kristo Yesu me to nyanyuie la me,

⁷esi ƒe subɔla mezu le Mawu ƒe amenuvevenunana, si wòtsɔ nam la nu, le eƒe ŋusẽ ƒe dɔwɔwɔ, si nu sẽ la nu;

⁸nye amesi nye ame kɔkɔewo katã dome suetɔ la, wotsɔ amenuveve sia na, bene magblɔ Kristo ƒe kesinɔnu, si mele nyanya tsitsotsito o da afia le trɔ̃subɔlawo dome,

⁹eye bene mana keklẽ naklẽ na wo katã, bene woanya nusi nye nya ɣaɣla, si woɣla ɖe Mawu, si wɔ nuwo katã la me tso ŋɔli mavɔwo me la, ƒe nuɖoanyi la,

¹⁰bene azɔ la woato hame dzi ana dziɖulawo kple ŋusẽtɔ, siwo le dziƒonutowo me la nanye Mawu ƒe nunya bubu ƒomevi geɖe la

¹¹le tameɖoɖo, si woɖo ɖi le ŋɔli mavɔwo me, esi nu wowu le Kristo Yesu, mía Aƒetɔ me la nu,

¹²amesi me miekpɔ dzideƒo kple mɔnu le dziɖoɖo ɖe eŋu me to eyama dzixɔxɔse me.

¹³Eyaŋuti la mele kuku ɖem na mi bena, ɖeɖi nagate mia ŋu le nye xaxa, siwo mekpɔ le mia ta, esiwo nye bubu na mi la ŋuti o.

¹⁴Eyata medzea nye klo na mía Aƒetɔ Yesu Kristo Fofo,

¹⁵amesi gbɔ ƒome sia ƒome, si le dziƒo kple anyigba dzi la, kpɔa eƒe ŋkɔ tsonɛ,

¹⁶bene wòaɖi na mi le eƒe ŋutikɔkɔe ƒe kesinɔ la nu, bena wòado ŋusẽ mi to eƒe Gbɔgbɔ me le ememe la gome,

¹⁷bene Kristo nanɔ anyi le miaƒe dziwo me to xɔse me,

¹⁸eye wòali ke mi, eye wòaɖo mia gɔme anyi le lɔlɔ̃ me, bene mi kpakple ame kɔkɔewo katã míate ŋu adze si nusi nye kekeme kple didime kple goglome kple kɔkɔme,

¹⁹eye bene miadze si Kristo ƒe lɔlɔ̃, si ƒo sidzedze la ta sa la, bene woayɔ mi taŋ, ne miade Mawu ƒe agbɔsɔsɔ blibo la katã nu.

²⁰Ke amesi tea ŋu wɔna wua nusianu geɖe wua nusiwo katã míebiana alo míedzea si le ŋusẽ, si le dɔ wɔm ŋusẽtɔe le mía me nu la,

²¹eya tɔ nanye ŋutikɔkɔe la le ha me le Kristo Yesu me yiɖase dzidzimewo katã dzi, tso mavɔ me yi ɖe mavɔ me! Amen.