Read ewe Efesotɔwo 6 Bible Online

Efesotɔwo 6 - ewe bible

Efesotɔwo 6

¹Mi ɖeviwo la, miɖo to mia dzilawo le Aƒetɔ la me, elabena esia le eteƒe.

²„Bu fofowò kple dawo,“ — esia nye sedede gbãtɔ, si me ŋugbedodo le la —

³„bene wòanyo na wò, eye nana agbe didie le anyigba dzi!“

⁴Eye mi fofowo la, migado dziku na mia viwo o, ke miayi wo le Aƒetɔ la ƒe hehe kple nuxɔxlɔ̃ la me.

⁵Mi dɔlawo la, miɖo to mia aƒetɔwo le ŋutilã nu kple vavã kpakple dzodzo nyanyanya le miaƒe dzimekɔkɔ me abe Kristo ene,

⁶menye le ŋku me nuwɔwɔ me abe ameŋudzelawo ene o, ke boŋ abe Kristo ƒe dɔla, siwo woa Mawu ƒe lɔlɔ̃nu tso dzi me la ene:

⁷mitsɔ lɔlɔ̃nu nyui hesubɔ, abe Aƒetɔ lae miesubɔna ene, eye menye amewo o,

⁸esi mienyae bena, nu nyui, si ke amesiame wɔna la, eya ke wòaxɔ tso Aƒetɔ la gbɔ, nenye dɔla alo ablɔɖevi.

⁹Eye mi aƒetɔwo, miwo nusiawo tɔgbe ke na wo; midzudzɔ ŋɔdzidodo, esi miawo hã mienyae be, mia kpli wo siaa ƒe Aƒetɔ la le dziƒo, eye ŋkumekpɔkpɔa ɖeke mele egbɔ o la ŋuti.

¹⁰Mlɔeba la, nɔvinyewo, mise ŋu le Aƒetɔ kple eƒe ŋusẽ ƒe ŋutete la me!

¹¹Mido Mawu ƒe aʋawɔnu blibo la katã, bene míate ŋu ano te ɖe Abosam ƒe aɖaŋu vɔ̃wo nu;

¹²elabena míele kame tem kple ʋu kpakple ŋutilã o, ke boŋ mía kple dziɖulanyenye kple ŋusẽ kple xexe sia me fia, siwo le fifi viviti sia me kpakple vɔɖinyenye ƒe gbɔgbɔ, siwo le dziƒonutowo me lae le kame tem.

¹³Eyata mikpla Mawu ƒe aʋawɔnu blibo la katã, bene míate ŋu anɔ te le ŋkeke vɔ̃ la dzi, eye ne miewu wo katã nu vɔ la, miakpɔ tsitrenɔnɔ.

¹⁴Azɔ la mitsi tre, eye mitsɔ nyateƒe bla miaƒe aliwo dzi, eye mido dzɔdzɔenyenye ƒe akɔtakpoxɔnu,

¹⁵eye mitso dzadzraɖoɖi na ŋutifafa nyanyuie la bla miaƒe afɔ gɔme.

¹⁶Hekpe ɖe nusiawo katã ŋuti la milé xɔse ƒe akpoxɔnu, si miate ŋu atsɔ atsi vɔ̃ɖitɔ la ƒe atsurɔ bibiawo la me ɖe asi.

¹⁷Eye miɖo xoxo ƒe gakuku la, eye mihe Gbɔgbɔ ƒe yi, si nye mawunya la, ɖe asi.

¹⁸Mitsɔ gbedodoɖa kple kukuɖeɖewo katã do gbe ɖa le ɣeawokatãɣi me le Gbɔgbɔ me, eye eyaŋuti minɔ ŋudzɔ, ne mianɔ kukuɖeɖewo dzi ɖaahe ɖe ame kɔkɔewo katã ta

¹⁹kple nye hã lanye, bena ne meke nu la, woatsɔ nya nam, bene makpe dzideƒo ana woanya nyanyuie la ƒe nya ɣaɣla,

²⁰esi ŋuti menye ame dɔdɔ le kɔsɔkɔsɔ me, bene dzi nado ƒonye le eme, abe alesi wòdzem be, maƒo nu ene.

²¹Ke bene miawo hã mianya alesi mele kple nusi wɔm mele la, mia nuvi lɔlɔ̃tɔ Tixiko, amesi nye subɔla nuteƒewɔla le Aƒetɔ me la, ana mianya nuwo katã;

²²medɔ amesia ɖo ɖe mia gbɔ le esia ŋuti, bene mianya alesi míele, eye ne wòafa akɔ na mia dziwo.

²³Ŋutifafa kple lɔlɔ̃ kple xɔse, si tso Mawu, Fofo la kple Aƒetɔ Yesu Kristo gbɔ la, woana nɔviawo.

²⁴Amenuveve nanɔ anyi kple amesiwo katã lɔ̃a mía Aƒetɔ Yesu Kristo ɖikaɖika la.