Read ewe Kolosetɔwo 4 Bible Online

Kolosetɔwo 4 - ewe bible

Kolosetɔwo 4

¹Mi aƒetɔwo la, miwɔ nusi dzɔ, eye wòsɔ la, na miaƒe dɔlawo, esi mienyae bena, Aƒetɔ li na miawo hã le dziƒo la ta.

²Minɔ gbedodoɖa dzi ɖaa, eye minɔ ŋudzɔ le eme kple akpedada,

³eye mido gbe ɖa ɖe miawo hã mía ta, bene Mawu naʋu nya la ƒe ʋɔtru na mí, ne míagblɔ Kristo ƒe nya ɣaɣla, si ŋuti woblam ɖo hã,

⁴bene maɖe esia ɖe go afia, abe alesi wòdzem be, maƒo nu la ene.

⁵Mizɔ le nunya me le amesiwo le egodo la ŋku me, eye miwo ɣeyiɣi la ŋuti dɔ blibo.

⁶Mina amenuveve kple dze nanɔ miaƒe nya me ɖaasi, bena mianya alesi wòdze be, miaɖo nya ŋuti na amesiame.

⁷Nusiwo katã va dzo ɖe dzinye la, Tixiko, nɔvi lɔlɔ̃tɔ kple subɔla nuteƒewɔla kpakple hadɔwɔla le Aƒetɔ me la, ana mianyae,

⁸amesi meda ɖo ɖe mia gbɔ le esia ta, bene mianya alesi míele, eye wòafa aka na miaƒe dziwo;

⁹eye metso Onesimo, nɔvi nuteƒewɔla lɔlɔ̃tɔ, si tso mia dome la, hã kpe ɖe eŋuti; eye wòana mianya nusiwo katã le afisia.

¹⁰Aristarxo, hanyegatɔ, kple Marko, Barnaba srɔ̃nyi, si ŋuti miexɔ ɖu le la — ne eva mia gbɔ la, mixɔe —

¹¹kple Yesu, si woyɔna be Yusto, amesiwo tso aʋatsotsoa me la, ɖuɖɔ mi ƒã; amesiawo ɖeɖekoe nye hanyedɔwɔlawo na Mawu ƒe fiaɖuƒe la, nenem me siawo zu akɔfafa nam.

¹²Epafra, amesi tso mia dome, si nye Kristo ƒe dɔla la, ɖuɖɔ mi ƒã; eyae nye amesi nɔa mia ta ʋlim le gbedodoɖa me ɖaasi, bene mianɔ tsitre abe amesiwo le blibo, eye wokpɔ kakaɖedzi blibo le Mawu ƒe lɔlɔ̃nu katã ŋuti ene.

¹³Elabena mele ɖase ɖim le eŋuti bena, ekpɔ agbagbadzedze geɖe le mia kple amesiwo le Laodikea kpakple amesiwo le Hierapoli la ta.

¹⁴Luka, atikewɔla lɔlɔ̃tɔ la, kple Dema woɖuɖɔ mi ƒã.

¹⁵Míeɖuɖɔ nɔvi, siwo le Laodikea la ƒã hekpe ɖe Nimfa kpakple hame, si le eƒe me la ŋu.

¹⁶Eye ne miexlẽ agbalẽ la vɔ la, miwɔe be, woaxlẽe le Laodikea hame hã, eye ne miawo hã miaxlẽ Laodikeatɔwo tɔ.

¹⁷Eye migblɔ na Arxipo bena: Kpɔ subɔsubɔdɔ, si su asiwò le Aƒetɔ me la dzi, be nawu enu!

¹⁸Ɖuɖɔ, si nye Paulo metsɔ nye asi ŋlɔe la, enye si. Miɖo ŋu nye kɔsɔkɔsɔwo! Amenuveve nanɔ anyi kpli mi!