Read ewe Tesalonikatɔwo I 5 Bible Online

Tesalonikatɔwo I 5 - ewe bible

Tesalonikatɔwo I 5

¹Ke le ɣeyiɣiwo kple azãgbewo ŋuti la, nɔviwo, mehiã mi be, míaŋlɔe aɖo ɖe mi o;

²elabena mia ŋutɔwo mienyae kɔte bena, Aƒetɔ ƒe ŋkeke la gbɔna, abe alesi fiafitɔ vana le zã me ene.

³Elabena ne wole gbɔgblɔm be, ŋutifafa kple anyinɔnɔ dedie li la, tete gbegblẽ ava lili wo, abe alesi fuɖuame va lilia funɔ ene, eye womate ŋu asi le enu kulẽ o.

⁴Ke miawo, nɔviwo, miele viviti me, bena ŋkeke la naɖi ɖe mi abe fiafitɔ ene o;

⁵elabena mi katã míenye kekeli viwo kple ŋkeke viwo; míenye zã alo viviti ta o.

⁶Eyata azɔ migana míanɔ alɔ̃ dɔm abe ame bubuwo ene o, ke boŋ mina míanɔ ŋudzɔ, eye míanɔ mo xexi.

⁷Elabena amesiwo dɔa alɔ̃ la, zãe wodɔa alɔ̃, eye amesiwo mua aha la, zãe womua aha;

⁸ke mí amesiwo nye ŋkeke tɔwo la, mina mianɔ mo xexi, eye míado xɔse kple lɔlɔ̃ ƒe akɔtakpoxɔnu, eye míaɖɔ xaxa ƒe mɔkpɔkpɔ ƒe gakuku la.

⁹Elabena Mawu meɖo mí na dziku o, ke boŋ, bena xɔxɔ nasu mía si to mía Aƒetɔ Yesu Kristo dzi,

¹⁰amesi ku ɖe mía ta, bena ne míele ŋu alo míele alɔ̃ me la, míanɔ agbe kpakplii,

¹¹Eyata mifa akɔ na mia nɔewo, eye mido ŋusẽ mia nɔewo, abe alesi miewɔna hã ene.

¹²Ke míele kuku ɖem na mi, nɔviwo: Midze si amesiwo wɔa dɔ vevi le mia dome, eye wonɔ mia nu le Aƒetɔ la me, eye woglɔ̃a nu mi la,

¹³eye bena míabu wo geɖe ŋutɔ le lɔlɔ̃ me le woƒe dɔwɔwɔ la ta. Minɔ anyi le ŋutifafa me le mia nɔewo dome.

¹⁴Ke míele nu xlɔ̃m mi, nɔviwo: Migbe nya na nu baɖa wɔlawo, mifa akɔ na dzikatsoƒoetɔwo, mixɔ na gbɔdzɔgbɔdzɔtɔwo, migbɔ dzi ɖi na amewo katã.

¹⁵Mikpɔ nyuie bena, amea ɖeke nagaɖo vɔ̃ vɔ̃ teƒe o, ke boŋ miti nyuididi na mia nɔewo kple amewo katã yome ɖaasi.

¹⁶Dzi nadzɔ mi ɖaa!

¹⁷Minɔ gbedodoɖa dzi madzudzɔmadzudzɔe!

¹⁸Mida akpe le nusianu ŋuti; elabena esiae nye Mawu ƒe lɔlɔ̃nu le Kristo Yesu me hena mi.

¹⁹Migatsi Gbɔgbɔ la nu o!

²⁰Migado vlo nyagbɔgblɔɖiwo o!

²¹Ke mido nuwo katã kpɔ, eye milé nu nyui la me ɖe asi.

²²Miɖe mia ɖokui ɖa tso vɔ̃ sia vɔ̃ ƒomevi me!

²³Ke ŋutifafa Mawu la ŋutɔ nakɔ mia ŋuti keŋkeŋ, eye wòadzra miaƒe gbɔgbɔ kple luʋɔ kpakple ŋutilã blibo la katã ɖo mokaka manɔŋui halase mía Aƒetɔ Yesu Kristo ƒe vavagbe la!

²⁴Nuteƒewɔla enye amesi yɔ mi ve, amesi lawɔe hã.

²⁵Nɔviwo, mido gbe ɖa ɖe mía ta!

²⁶Mitsɔ nugbugbɔ kɔkɔe ɖuɖɔ nɔviwo katã nam ƒã.

²⁷Metà Aƒetɔ la na mi bena, miaxlẽ agbalẽ sia na nɔvi kɔkɔeawo katã.

²⁸Mía Aƒetɔ Yesu Kristo ƒe amenuveve nanɔ anyi kpli mi! Amen.