Read ewe Yosua 10 Bible Online

Yosua 10 - ewe bible

Yosua 10

¹Esi Yerusalem-fia Adonizedek se bena, Yosua xɔ Ai, eye wòtsrɔ̃e gbidigbidi, ewɔ Ai kple eme fia, abe alesi wòwɔ Yerixo kple eme fia ene, eye Gibeontɔwo wɔ xɔlɔ̃ kple Israel, eye wole wo dome la,

²wova ŋutɔ; elabena Gibeon-du la lolo abe fiaduwo dometɔ ɖeka ene, elolo wu Ai, eye eme ŋutsuwo katã nye kalẽtɔwo.

³Tete Yerusalem-fia Adonizedek dɔ ame ɖo ɖe Xebron-fia Hoham, Yarmut-fia Piram, Laxis-fia Yafia kpakple Eglon-fia Debir gbɔ gblɔ bena:

⁴Miho va kpe ɖe ŋunye, ne miasi Gibeon, elabena ewɔ xɔlɔ̃ kple Yosua kpakple Israel-viwo.

⁵Eye Amoritɔwo ƒe fia atɔ̃awo, siwo nye Yerusalem-fia, Xebron-fia, Yarmut-fia, Laxis-fia kple Eglon-fia kpakple woƒe aʋakɔwo katã kpe ta, eye woho va ɖe to ɖe Gibeon ŋu hewɔ ana kplii.

⁶Tete Gibeontɔwo ɖo ame ɖo ɖe Yosua le Gilgal le asaɖa me gblɔ bena: Megaɖe asi le wò dɔlawo ŋu o, va mía gbɔ kaba naxɔ na mi, eye nakpe ɖe mía ŋu, elabena Amoritɔwo ƒe fia, siwo katã le towo dzi la, ƒo ta kpli ɖe mía ŋu.

⁷Enumake Yosua kple eƒe aʋakɔ la katã kpakple kalẽtɔwo katã ho tso Gilgal.

⁸Eye Yehowa gblɔ na Yosua bena. Megavɔ̃ o, elabena matsɔ wo ade asi na wò, eye wo dometɔa ɖeke manɔ te ɖe ŋuwò o.

⁹Tete Yosua va ƒo ɖe wo dzi kpoyi, elabena ezɔ zã blibo la tso Gilgal.

¹⁰Eye Yehowa na wolulu le Israel ŋku me, eye wòsi wo le Gibeon gbɔ tɔtɔtɔ, eye woli wo yome vaseɖe Bet-Xoron-mɔ dzi, eye wòsi wo vaseɖe Aseka kple Makeda ke.

¹¹Esi wosi le Israel nu hele Bet-Xoron-to ƒe abu ɖim la, Yehowa hlẽ kpe gãwo ɖe wo dzi tso dziƒo vaseɖe Aseka, eye woku; amesiwo kpetsiawo wu la sɔ gbɔ wu esiwo Israel-viwo wu kple yi.

¹²Eye Yosua ƒo nu kple Yehowa le Israel-viwo ŋku me, le gbesigbe Yehowa tsɔ Amoritɔwo de asi la, eye wògblɔ le Israel ŋku me bena: Ye, tɔ ɖe Gibeon, eye ɣleti, tsi Ayalon-ʋe la me!

¹³Tete ɣe kple ɣleti wotɔ, vaseɖe esime dukɔ la bia hlɔ̃ woƒe futɔwo. Ɖe womeŋlɔ esia ɖe ame dzɔdzɔewo ƒe agbalẽ me oa? Eye ɣe tɔ le ɣeɖota me, eye meɖe abla ɖaɖo to o anɔ ŋkeke blibo ɖeka.

¹⁴Eye ŋkekea ɖeke meɖo ŋgɔ nɛ alo va le emegbe de esia nu, esi Yehowa ɖo to amegbetɔ ƒe gbe o; elabena Yehowa wɔ aʋa na Israel.

¹⁵Eye Yosua kple Israel blibo la gbugbɔ va asaɖa la me le Gilgal.

¹⁶Ke fia atɔ mawo si yi ɖaɣla ɖe do me le Makeda.

¹⁷Eye wova gblɔ na Yosua bena, wokpɔ fia atɔ̃awo woɣla ɖe do me le Makeda.

¹⁸Yosua ɖo ŋu be: Mimli kpe gãwo tu do la nu, eye miɖe ŋutsuwo ɖo enu, bena woadzɔ wo ŋu.

¹⁹Ke miawo migatɔ o, hafi boŋ miti miaƒe futɔwo yome, mitsrɔ woƒe megbexeawo, eye migana woage ɖe woƒe duwo me o, elabena Yehowa, mia Mawu, tsɔ wo ɖe asi na mi.

²⁰Eye esi Yosua kple Israel-viwo si wo vɔ hetsrɔ̃ wo, eye ame mlɔeawo si yi ɖe ɖu sesẽwo me la,

²¹dukɔ blibo la gbugbɔ va Yosua gbɔ le Makeda le asaɖa me dedie, eye amea ɖeke medo dzi ke fi ɖe Israel-viwo ŋu o.

²²Eye Yosua gblɔ bena: Miɖe nu le doa nu, eye mikplɔ fia atɔ̃awo tso doa me va gbɔnye!

²³Tete wowɔ nenema, eye wokplɔ fia atɔ̃awo tso ɖoa me va egbɔe; woawo nye: Yerusalem-fia, Xebron-fia, Yarmut-fia, Laxis-fia kple Eglon-fia.

²⁴Esi wokplɔ fia atɔ̃ siawo va Yosua gbɔ la, Yosua yɔ Israel-ŋutsuwo katã, eye wògblɔ na aʋakɔ la kplɔlawo, amesiwo ɖe aʋa la kplii bena: Mile va, eye miɖo afɔ ve dzi na fia siawo! Tete wote va, eye woɖo afɔ ve dzi na wo.

²⁵Eye Yosua gblɔ na wo bena: Migavɔ̃ o, eye dzika megatso mia ƒo o, milé dzi ɖe ƒo, eye mise ŋu! Elabena alea Yehowa awɔ miaƒe futɔ, siwo katã mia kple wo miele aʋa wo ge lae.

²⁶Emegbe Yosua wu wo, eye wòde ka ve na wo ɖe ati alɔ̃ ŋu; eye wotsi atiawo ŋu vaseɖe fiẽ.

²⁷Eye esi ɣe yina to ɖo ge la, Yosua ɖe se bena, woaɖe wo le atiawo ŋu atsɔ aƒu gbe ɖe do, si me woyia ɖo la me, eye wòfɔ kpe gãwo ɖo do la nu wotsi anyi vaseɖe egbe.

²⁸Eye Yosua xɔ Makeda le ŋkeke ma ke dzi; ewu wo kple yi, eye wotsrɔ̃ eme fia kple amesiwo katã le eme la gbidigbidi, eye mena amea ɖeke si o, eye wòwɔ Makeda-fia, abe alesi wòwɔ Yerixo-fia ene.

²⁹Eye Yosua, kple Israel blibo la ho tso Makeda heyi Libna, eye wòwɔ aʋa kple Libna.

³⁰Eye Yehowa tsɔ eya hã kple eme fia ɖe asi na Israel, eye wotsrɔ̃e kple eme nɔlawo katã kple yi; womèna amea ɖeke si o, eye wowɔ eme fia, abe alesi wowɔ Yerixo-fia ene.

³¹Eyome Yosua kple Israel blibo la ho tso Libna yi Laxis, eye woɖe to ɖee hewɔ aʋa kplii.

³²Eye Yehowa tso Laxis de asi na Israel, eye woxɔe le ŋkeke eveagbe, eye wotsrɔ̃e kple eme nɔlawo kple yi, abe alesi wowɔ Libna ke ene.

³³Ɣemaɣi Horam, Gezer-fia ho, be yeava xɔ na Laxis, ke Yosua si eya hã kple eƒe dukɔ la, vaseɖe esime amea ɖeke mekpɔtɔ o.

³⁴Emegbe Yosua kple Israel blibo la ho tso Laxis yi Eglon, eye woɖe to ɖee hewɔ aʋa kplii,

³⁵eye woxɔe le ŋkeke ma dzi hetsrɔ̃e kple yi, eye wotsrɔ̃ amesiwo katã le eme la gbemagbe gbidigbidi, abe alesi wowɔ Laxis ke ene.

³⁶Tete Yosua kple Israel blibo la ho tso Eglon heyi Xebron, eye wowɔ aʋa kplii,

³⁷eye woxɔe hetsrɔ̃e kple eme fia, eƒe duwo katã kple wo me nɔlawo kple yi; mena amea ɖeke si o, abe alesi wowɔ Eglon ene, eye wotsɔe kple eme nɔlawo gbidigbidi.

³⁸Eyome Yosua kple Israel blibo la trɔ yi Debir ɖawɔ aʋa kplii,

³⁹eye woɖu eya hã kple eme fia kpakple eƒe duwo katã dzi, eye wowu wo kple yi hetsrɔ̃ amesiwo katã le eme lã gbidigbidi, eye mena amea ɖeke si o, alesi wowɔ Xebron la, nenema wowɔ Debir kple eme fia hãe, abe alesi wowɔ Libna kple eme fia ene.

⁴⁰Ale Yosua du anyigba blibo la kple fia, siwo katã le towo dzi, dziehe, gbadzaƒe kple towo ŋu la dzi; mena amea ɖeke si o, eye wòtsrɔ̃ nu gbagbewo katã gbidigbidi, abe alesi Yehowa, Israel ƒe Mawu la, de se ene.

⁴¹Eye Yosua ɖu wo dzi tso Kades-Barnea vaseɖe Gaza, tso Gosen-nyigba blibo la dzi vaseɖe Gibeon.

⁴²Eye Yosua ɖu fia siawo katã kple woƒe anyigbawo dzi zi ɖeka, elabena Yehowa, Israel ƒe Mawu lae wɔ aʋa na Israel.

⁴³Emegbe Yosua kple Israel blibo la gbugbɔ va asaɖa me le Gilgal.