Read ewe Yosua 13 Bible Online

Yosua 13 - ewe bible

Yosua 13

¹Esi Yosua tsi xɔ ƒe geɖe la, Yehowa gblɔ nɛ bena: Etsi, eye nèxɔ ƒe geɖe; anyigba geɖe kpɔtɔ womexɔ haɖe o.

²Anyigba, siwo kpɔtɔ la, wonye; Filistitɔwo ƒe anyigbawo katã kple Gesuri blibo la,

³tso Sixor, si si to Egipte ŋu gbɔ vaseɖe Ekron, si wobuna ɖe Kanaanitɔwo me la, ƒe liƒo ŋu le anyiehe. Filistitɔwo ƒe amegã atɔ̃awo nye: Gazatɔ, Asdodtɔ, Askalontɔ, Gadtɔ kple Ekrontɔ hekpe ɖe Avitɔwo ŋu le dziehe;

⁴Kanaanitɔwo ƒe anyigba blibo la kple Meara, si nye Zidonitɔwo to, vaseɖe Afek kple Amoritɔwo ƒe liƒo ŋu,

⁵dzitɔwo ƒe anyigba, Libanon blibo la le ɣedzeƒe, tso Baal-Gad le Xermon-to la nu heɖo ta Xamat;

⁶tometɔwo katã, tso Libanon vaseɖe Misrefot-Mayim kpakple Zidonitɔwo katã. Nye ŋuta manyã wo le Israel-viwo ŋgɔ, dzidze nu, namãe na Israel-viwo ko, abe alesi mede se na wò ene.

⁷Eyata ma anyigba sia na to asiekeawo kple Manase ƒe to afã la, ne wòanye woƒe domenyinu.

⁸Elabena Manase ƒe afã, Ruben-viwo kple Gad-viwo xa woƒe anyigba, si Mose tsɔ na wo le Yordan godo le ɣedzeƒe, abe alesi Yehowa ƒe dɔla Mose tsɔe na wo ene:

⁹tso Aroer, si le Arnon-tɔʋu la nu kple du, si le bali lãme gbɔ kpakple Medeba-tagba blibo la vaseɖe Dibon;

¹⁰Sixon, Amoritɔwo ƒe fia, si ɖu fia le Xesbon la, ƒe duwo katã vaseɖe Amon-viwo ƒe liƒo ŋu;

¹¹Gilead kple Gesuritɔwo kpakple Maaxatitɔwo ƒe anyigba, Xermon-to blibo la kple Basan blibo la vaseɖe Salxa;

¹²Og, Basan-fia, si ɖu fia le Astarot kple Edrei la, ƒe fiaɖuƒe blibo la: eya nye ame dzɔtsu mlɔetɔ, si kpɔtɔ ɖi, eye Mose ɖu wo dzi henyã wo.

¹³Ke Israel-viwo menyã Gesuritɔwo kple Maaxatitɔwo o, eyata Gesur kple Maaxat tsi Israel dome vaseɖe egbe.

¹⁴Negbe Lewi-to la ko metsɔ anyigba ɖeke na o, elabena Yehowa, Israel ƒe Mawu la, ƒe dzovɔsa nye eƒe domenyinu, abe alesi wògblɔ nɛ ene.

¹⁵Eye Mose na anyigba Ruben-viwo ƒe to la ɖe woƒe ƒomewo nu,

¹⁶tso Aroer, si le Arnon-tɔʋu la nu kple ɖu, si le bali la me gbɔ, kpakple Medeba-tagba blibo la,

¹⁷Xesbon kple eƒe du, siwo katã le tagba, Dibon, Bamot-Baal kple Bet-Baal-Meon,

¹⁸Yaza, Kedemot kple Mefat.

¹⁹Kiryatayim, Sibma kple Zeret-Saxar, si le bali me to la dzi,

²⁰Bet-Peor, Pisga ƒe agawo kple Bet-Yesimot,

²¹tagba duwo katã kple Sixon, Amoritɔwo ƒe fia, si ɖu fia le Xesbon ƒe fiaɖuƒe blibo la; Mose ɖu dzi hekpe ɖe Midian amegãwo ŋu, siwo nye: Ewi, Rekem, Zur, Xur kple Reba, amesiwo nye Sixon ƒe amegãwo, siwo nɔ anyigba la dzi.

²²Eye Israel-viwo wu bokɔ Bileam, Beor vi, kple yi hekpe ɖe ame bubu, siwo wowu la ŋu.

²³Ale Yordan kple eŋu nyigba ɖo liƒo na Ruben-viwo. Esia nye Ruben-viwo ƒe anyigba, duwo kple kɔƒewo le woƒe ƒomewo nu.

²⁴Eye Mose na anyigba Gad-viwo ƒe to la de woƒe ƒomeawo nu.

²⁵Yazer kple Gilead-duwo katã. Amon-viwo ƒe anyigba afã vaseɖe Aroer, si le Raba kasa la gbɔ,

²⁶tso Xesbon vaseɖe Ramat-Mizpa kple Betonim, eye tso Maxanayim vaseɖe Debir ƒe liƒo ŋu;

²⁷Bel-Haram, Bet-Nimra, Sukot kple Zafon, siwo le bali la me, woawo nye Sixon, Xesbon-fia, ƒe fiaɖuƒe kpɔtɔea, Yordan kple eŋu nyigba, vaseɖe Kineret-ta ƒe mlɔenu, le Yordan ƒe go keme dzi le ɣedzeƒe gome.

²⁸Esia nye Gad-viwo ƒe anyigba, duwo kple kɔƒewo le woƒe ƒomewo nu.

²⁹Eye Mose na anyigba Manase-viwo ƒe to afã le woƒe ƒomeawo nu:

³⁰tso Maxanayim, Basan blibo, si nye Og, Basan-fia ƒe fiaɖuƒe. Yair-kɔƒewo katã le Basan, siwo nye ɖu blaadeawo.

³¹Eye wotso Gilead afã, Astarot kple Edrei, du, siwo le Og, Basan-fia, ƒe fiaɖuƒe me, na Manase vi, Maxir-viwo ƒe afã.

³²Esia nye anyigba, si Mose ma le Moab-tagba le Yordan godo le Yerixo ƒe ɣedzeƒe.

³³Ke Mose mena anyigbaa ɖeke Lewi-to la o, elabena Yehowa, Israel ƒe Mawu la, ŋutɔ nye woƒe domenyinu, abe alesi wògblɔ na wo ene.