Read ewe Yosua 6 Bible Online

Yosua 6 - ewe bible

Yosua 6

¹Ke wodo Yerixo ƒe agbowo hexe mɔ na Israel-viwo, eye amea ɖeke mete ŋu do alo va me o.

²Eye Yehowa gblɔ na Yosua bena: Kpɔ ɖa, metsɔ Yerixo kple eme fia kpakple kalẽtɔwo ɖe asi na wò.

³Eyata aʋawɔlawo katã nazɔ aƒo xlã du la akpe ɖo zi ɖeka; alea woawɔ ŋkeke ade sɔŋ.

⁴Eye nunɔla adre natsɔ akɔfɛ adre adze aɖaka la ŋgɔ. Ke le ŋkeke adreagbe la woazɔ aƒo xlã du la akpe ɖo zi adre, eye nunɔlawo naku akɔfɛawo.

⁵Ne wonyã ku lãdzoawo tsiã ɖe nu miese ko la, dukɔ blibo la natso aseye hoo, ekema du la ƒe gliwo aŋe adze eme, eye dukɔ la nakpɔ ŋgɔ tẽ age ɖe me.

⁶Tete Yosua, Nun vi, yɔ nunɔlawo gblɔ na wo bena: Mitsɔ nubablaɖaka la, eye nunɔla adre natsɔ akɔfɛ adre adze Yehowa ƒe aɖaka la ŋgɔ.

⁷Eye wògblɔ na dukɔ la bena: Mizɔ yi ɖaƒo xlã du la, eye amesiwo bia akpa la, nadze Yehowa ƒe aɖaka la ŋgɔ.

⁸Esi Yosua gblɔ nya sia na dukɔa la, tete nunɔla adreawo tsɔ akɔfɛ adre dze Yehowa ŋgɔ heyi, eye woku akɔfɛawo, eye Yehowa ƒe nubablaɖaka la dze wo yome;

⁹amesiwo bia akpa la, dze nunɔla, siwo le akɔfɛawo kum la ŋgɔ, eye ame mlɔeawo dze aɖaka la yome, eye wole akɔfɛawo kum atraɖii.

¹⁰Ke Yosua de se na dukɔ la bena: Migatso aseye o, migaɖo zi o, eye migaƒo nua ɖeke o, vaseɖe gbesigbe magblɔ na mi be, mitso aseye, hafi miatso aseye!

¹¹Eye Yehowa ƒe aɖaka la ƒo xlã du la va kpe zi ɖeka, emegbe wogbugbɔ vɔ asaɖa la me hetsi afima ɖɔ.

¹²Ke Yosua fɔ ŋdi kanya, eye nunɔlawo tsɔ Yehowa ƒe aɖaka la;

¹³nunɔla adreawo tsɔ akɔfɛ adre dze Yehowa ƒe aɖaka la ŋgɔ, eye wole akɔfɛawo kum, ke amesiwo bla akpa la, dze wo ŋgɔ, eye ame mlɔeawo dze Yehowa ƒe aɖaka la yome, eye wole akɔfɛawo kum atraɖii.

¹⁴Eye wozɔ ƒo xlã ɖu la zi ɖeka va kpe le ŋkeke eveagbe, emegbe wogbugbɔ va asaɖa la me; alea wowɔ ŋkeke aɖe sɔŋ.

¹⁵Ke wòfɔ le ŋkeke adreagbe kaba, esime dzite tso, eye wozɔ ƒo xlã du la alea zi adre; le ŋkeke adrelia dzi ko woƒo xlã du la zi adre.

¹⁶Zi adrelia la nunɔlawo ku akɔfɛawo, eye Yosua gblɔ na dukɔ la bena: Mitso aseye, elabena Yehowa tsɔ du la de asi na mi!

¹⁷Mitsrɔ̃ du la kple nusiwo katã le eme gbidigbidi na Yehowa; negbe Raxab, gbolo la, kple amesiwo katã le eƒe me ko miaxɔ de agbe, elabena eyae tsɔ amesiwo míedɔ la ɣla.

¹⁸Ke mikpɔ nyuie le busunuawo ŋu, ne miagatsɔ wo dometɔa ɖeke aɖo busu mia ɖokui ahakplɔ busu aƒu Israel-saɖa la, eye woage ɖe dzɔgbevɔ̃e me o.

¹⁹Ke klosalo kple sika, akɔblinuwo kple gayibɔnuwo katã ŋu kɔ na Yehowa, eye woatsɔ wo ava Yehowa ƒe nudzraɖoƒe la.

²⁰Tete dukɔ la tso aseye, eye woku akɔfɛawo. Esi dukɔ la se akɔfɛawo ƒe ɖiɖi la, wotso aseye hoo, tete ɖu la ƒe gliwo mu ɖo baba, eye dukɔ la ge ɖe dua me, amesiame kpɔ ŋgɔ tẽ, eye woxɔ du la.

²¹Eye wotsɔ yi tsrɔ̃ ŋutsuwo kple nyɔnuwo, ɖeviwo kple ame tsitsiwo, nyiwo kple alẽwo kpakple tedziwo keŋkeŋ.

²²Ke Yosua gblɔ na ŋutsu eve, siwo va tsa ŋku anyigba dzi la bena: Miyi ɖe gbolo la ƒe me, ne makplɔ nyɔnu la kple eƒe ƒometɔwo katã do goe, abe alesi mieke atam nɛ ene.

²³Tete ɖekakpui, siwo nye ŋkutsalawo la, yi ɖakplɔ Raxab kple fofoa kpakple ɖada, nɔviaŋutsuwo kple eƒe ƒometɔwo katã kpakple nusianu, si le esi la, va Israel ƒe asaɖa godo.

²⁴Eye wòtɔ dzo du la kple nusiwo katã le eme, negbe klosalo kple sika, akɔblinuwo kple gayibɔnuwo ko wotsɔ va nudzraɖoƒe le Yehowa ƒe me.

²⁵Eye Yosua na Raxab, gbolo la fofoa ƒe me tɔwo kple eƒometɔwo katã tsi agbe, eye wotsi Israel dome vaseɖe egbe, elabena eyae ɣla amesiwo Yosua dɔ, be woaɖatsa ŋku le Yerixo.

²⁶Le ɣemaɣi Yosua ka atam bena: Ŋutsu, si atso, be yeagbugbɔ Yerixo-du sia atso la, aɖi eŋu le Yehowa ŋku me. Via ŋgɔgbea ƒe ku wòatsɔ aɖo egɔme anyi, eye eƒe dɔmlɔea ƒe ku wòatsɔ aɖe agbo enu!

²⁷Eye Yehowa nɔ kple Yosua, ale be eƒe ŋkɔ kaka ɖe anyigba la katã dzi.