Read ewe Timoteo II 4 Bible Online

Timoteo II 4 - ewe bible

Timoteo II 4

¹Mele atam kam na wò, le Mawu kple Yesu Kristo, amesi le ʋɔnu drɔ̃ ge ame gbagbewo kple ame kukuwo le eƒe ɖeɖefia kple fiaɖuƒe me la, ƒe ŋku me:

²Ɖe gbe ƒã nya la, nɔ edzi, vovoɣi li alo vovoɣi meli o, ka mo, gbe nya, xlɔ̃ nu le dzigbɔɖeanyi kple nufiafia katã me.

³Elabena ɣeyiɣi le vava ge, esime womaxɔ nufiafia, si le blibo la o; ke boŋ, le alesi tome fiẽ wo nu la, woaƒo nufialawo nu ƒu na wo ɖokui le woa ŋutɔwo ƒe nudzodzrowo la nu.

⁴Eye woaɖe to ɖa le nyateƒe la ŋuti, eye woatrɔ ayi gliwo gbɔ.

⁵Ke wò la nɔ mo xexi le nuwo katã me, do dzi le fukpekpewo me, wɔ nyanyuiegblɔla ƒe do, eye nawu wò subɔsubɔdɔ la nu blibo.

⁶Elabena nye la wotsɔm le memem xoxo, eye nye dzodzoɣi la gogo.

⁷Ʋiʋli nyui lae meʋli; mewu nye mɔzɔzɔ la nu, melé xɔse la me ɖe asi.

⁸Tso ekema dzi la wodzra dzɔdzɔenyenye ƒe dziɖuɖukuku la ɖo ɖi nam, si Aƒetɔ, ʋɔnudrɔ̃la dzɔdzɔe la, lanam le ŋkeke ma dzi; ke menye nye ɖeɖekoe o, ke boŋ amesiwo katã lɔ̃ eƒe ɖeɖefia la hãe.

⁹Do vevie be, nava gbɔnye kaba.

¹⁰Elabena Dema gblẽm tii, le esi wògalɔ̃ fifi xexe sia me la ŋuti, eye wòyi ele Tesalonika; Kreske yi de Galatia, Tito yi de Dalmatia.

¹¹Luka ɖeɖekoe li kplim. Xo Marko, eye nakplɔe de asi ve; elabena enye kpedeŋutɔ nyui nam le subɔsubɔ gome

¹²Ke Tixiko ta meɖoe ɖe Efeso.

¹³Ne egbɔna la, tsɔ awu ʋlaya, si megblẽ ɖe Troa ɖe Karpo gbɔ la, kple agbalẽawo ɖe asi vɛ, vevietɔ lãgbalẽ la.

¹⁴Aleksandro, akɔblitula, wɔ vɔ̃ geɖe ɖe ŋunye; Aƒetɔ la aɖo eteƒe ne le eƒe nuwɔnawo nu;

¹⁵wò hã kpɔ ɖokuiwò dzi nyuie le eyama ŋuti; elabena etsi tre ɖe míaƒe nyawo ŋuti ŋutɔ.

¹⁶Le ɖokuinye nuɖeɖe gbãtɔ me la amea ɖeke mede dzinye o, ke boŋ wo katã wogblẽm ɖi. Womagabu esia na wo o.

¹⁷Ke Aƒetɔ la tsi tre ɖe gbɔnye, eye wòdo ŋusẽm, bena mawu gbeƒãɖeɖe la nu, eye trɔ̃subɔlawo katã nasee, eye wòɖem le dzata ƒe nu me.

¹⁸Eye Aƒetɔ la aɖem le nuwɔwɔ vɔ̃wo katã me, eye wòaxɔm heyi ɖe eƒe dziƒofiaɖuƒe la me; eya tɔ lanye ŋutikɔkɔe tso mavɔ me yi ɖe mavɔ me! Amen.

¹⁹Ɖuɖɔ Priska kple Akwila kpakple Onesiforo ƒe aƒe la nam ƒã.

²⁰Erasto nɔ Korinto, Trofimo la, megblẽe ɖe Mileto wòle dɔ lém.

²¹Do vevie be, nava, hafi ne vuvɔŋɔli naɖo. Eubulo kple Pude kple Lino kple Klaudia kpakple nɔviwo katã ɖuɖɔ wò ƒã.

²²Aƒetɔ Yesu Kristo nanɔ anyi kple wò gbɔgbɔ la! Amenuveve nanɔ anyi kpli mi!