Read ewe Hebritɔwo 3 Bible Online

Hebritɔwo 3 - ewe bible

Hebritɔwo 3

¹Eyaŋuti, nɔvi kɔkɔewo, dziƒoyɔyɔ gomekpɔlawo: Mibu miaƒe xɔsemeʋuʋu ƒe ame dɔdɔ kple nunɔlagã Yesu la ŋuti,

²amesi nye nuteƒewɔla na amesi ɖoe, abe alesi Mose hã nye nuteƒewɔla le eƒe aƒe blibo la katã me ene.

³Elabena zi geɖe alesi amesi dzra aƒe ɖo la kpɔa bubu gã wu aƒea la, zi geɖe ma ke wobu eyama be, edze ŋutikɔkɔe gã xɔxɔ wu Mose.

⁴Elabena aƒe sia aƒe la amee dzranɛ ɖo; ke amesi dzraa nuwo katã ɖo la, eyae nye Mawu.

⁵Eye Mose la nye nuteƒewɔla le eƒe aƒe blibo la katã me abe subɔla ene, bene wòaɖi ɖase le nusiwo woava gblɔ la ŋuti;

⁶ke Kristo la nye nuteƒewɔla abe Vi ene le eƒe aƒe dzi; amesi ƒe aƒe míawo míenye, nenye be, mielé dzideƒo kple mɔkpɔkpɔ ƒe adegbeƒoƒo ɖe asi sesĩe vaseɖe nuwuwu.

⁷Eyaŋuti abe alesi Gbɔgbɔ kɔkɔe la gblɔ ene be: „Egbegbe, ne miese eƒe gbe la,

⁸migasẽ miaƒe dzime, abe alesi wowɔ le dɔmedzoe me le tetekpɔ ƒe ŋkeke la dzi le gbeadzi ene o,

⁹esime mia fofowo tem kpɔ, eye woɖom kpɔ, eye wokpɔ nye dɔwɔwɔwo ƒe blane sɔŋ.

¹⁰Eyata nenem dzidzime sia ƒe nu ku dzi nam, eye megblɔ be: Ɖaasi woƒe dzi tra mɔ; ke womenya nye mɔwo o.

¹¹Eyata meka atam le nye dziku me bena: Ne woahade nye dzudzɔ la me fĩ!“

¹²Nɔviwo, mikpɔ nyuie be, dzi vɔ̃ɖi maxɔse naganɔ mia dometɔa ɖeke me o, bene wòagatrɔ atso Mawu gbagbe la gbɔ o,

¹³ke mixlɔ̃ nu mia nɔewo gbesiagbe boŋ, ŋkeke alesi woyɔ egbegbe, bene nuvɔ̃ ƒe beble nagasẽ mia dometɔa ɖeke ƒe dzime o.

¹⁴Elabena míezu Kristo ƒe gomekpɔlawo, nenye be, míalé miaƒe dzideƒo ƒe gɔmedzedze me ɖe asi sesĩe halase nuwuwu la.

¹⁵Esime wògblɔ be: „Egbegbe, ne miese eƒe gbe la, migasẽ miaƒe dzime, abe alesi wowɔ le dɔmedzoe me ene o!“

¹⁶Elabena amekawoe see, eye wòve dome na wo mahã? Alo menye wo katãe, amesiwo Mose kplɔ do go tso Egipte la o mahã?

¹⁷Ke amekawo ƒe nue ku dzi ne ƒe blane sɔŋ mahã? Alo menye amesiwo wɔ nuvɔ̃, amesiwo ƒe ƒu kotsoewo tsi gbedzi lae o ɖe?

¹⁸Ke amekawo wòka atam na bena, ne woahade yeƒe dzudzɔ la me fĩ? Ɖe menye na tosẽlawo o mahã?

¹⁹Eye míekpɔ bena, womete ŋu yi ɖe eme o le dzimaxɔse ŋuti!