Read ewe Ʋɔnudrɔ̃lawo 10 Bible Online

Ʋɔnudrɔ̃lawo 10 - ewe bible

Ʋɔnudrɔ̃lawo 10

¹Le Abimelex megbe la Isaxartɔ Tola, si nye Pua, Dodo vi ƒe vi ɖo, be yeaxɔ na Israel, eye wònɔ Samir le Efrayim-to la dzi.

²Eye esi wòdrɔ̃ ʋɔnu na Israel ƒe blave vɔ etɔ̃ sɔŋ megbe la, eku, eye woɖii ɖe Samir.

³Eya megbe Gilead-tɔ Yair do, eye wòdrɔ̃ ʋɔnu na Israel ƒe blave vɔ eve sɔŋ.

⁴Ŋutsuvi blaetɔ̃ nɔ esi, siwo do tedzivi blaetɔ̃, eye du blaetɔ̃ nɔ wo si, esiwo woyɔna be Yair-kɔƒewo vaseɖe egbe, wole Gilead-nyigba dzi.

⁵Eye Yair ku woɖii ɖe Kamon.

⁶Eye Israel-viwo yi dzi wɔ nusi medze Yehowa ŋu o, eye wosubɔ Baalwo kple Astarot, Aramtɔwo ƒe mawuwo, Zidontɔwo ƒe mawuwo, Moabtɔwo ƒe mawuwo, Amon-viwo ƒe mawuwo kple Filistitɔwo ƒe mawuwo, ke wogblẽ Yehowa ɖi, eye womesubɔe o.

⁷Eyata Yehowa do dɔmedzoe ɖe Israel ŋu, eye wotsɔ wo dzra na Filistitɔwo kple Amon-viwo.

⁸Eye wote Israel-vi, siwo katã nɔ Yordan ƒe go keme dzi le Amoritɔ, siwo nɔ Gilead ƒe anyigba dzi la, ɖe anyi, eye wosẽ ŋuta le wo ŋu tso ƒe ma dzi ƒe wuienyi sɔŋ.

⁹Eye Amon-viwo tso Yordan, be woawɔ ana kple Yuda kple Benyamin kpakple Efrayim-viwo, eye Israel ɖo xaxa me.

¹⁰Eyata Israel-viwo ɖo ɣli yɔ Yehowa bena: Miewɔ nuvɔ̃ ɖe ŋuwò, elabena miegblẽ miaƒe Mawu ɖi hesubɔ Baalwo.

¹¹Tete Yehowa gblɔ na Israel-viwo bena. Esi Egiptetɔwo, Amoritɔwo, Amon-viwo kple Filistitɔwo,

¹²Zidontɔwo, Amalekitɔwo kple Maontɔwo ɖe fu na mi, eye miedo ɣli yɔm la, nyemexɔ na mi oa?

¹³Ke miawo mìegblẽm ɖi hesubɔ mawu bubuwo, eyata nyemegale mia ɖe ge azɔ akpɔ o.

¹⁴Miyi ɖado ɣli yɔ mawu, siwo mieha, ne woaxɔ na mi le miaƒe xaxaɣiwo me!

¹⁵Ke Israel-viwo gblɔ na Yehowa bena: Miewɔ nuvɔ̃, eyata wɔ mí, alesi dze ŋuwò; ke ɖe mí fifia ko!

¹⁶Tete woɖe mawu bubuawo ɖa le wo ɖokui dome hesubɔ Yehowa; eyata Israel ƒe fukpekpe la mena wòɖe dzi ɖi o.

¹⁷Eye Amon-viwo kpe ta heva ƒu asaɖa anyi ɖe Gilead, eye Israel-viwo hã kpe ta va ƒu asaɖa anyi ɖe Mizpa.

¹⁸Tete Gileadtɔwo ƒe amegãwo gblɔ na wo bena: Amesi ayi aɖakpe aʋa kple Amon-viwo gbã la, eya anye natɔ ɖe Gileadtɔwo nu!