Read ewe Ʋɔnudrɔ̃lawo 12 Bible Online

Ʋɔnudrɔ̃lawo 12 - ewe bible

Ʋɔnudrɔ̃lawo 12

¹Tete Efrayimtɔwo ƒo ƒu ho va anyiehe, eye wogblɔ na Yefta bena: Nukaŋuti nèho ana ɖe Amon-viwo ŋu, eye mèyɔ mí, be míayi kpli wò oa? Miatɔ dzo wò xɔ ɖe dziwò!

²Yefta ɖo ŋu na wo bena: Mía kple nye dukɔ míekpe aʋa vɔ kple Amon-viwo, eye meyɔ mi, gake mieva xɔm le wo si o.

³Esi mekpɔ be, miele xɔxɔm nam o la, metsɔ nye agbe ke ku, eye meho aʋa ɖe Amon-viwo ŋu, eye Yehowa tsɔ wo de asi nam. Nukaŋuti mieho ɖe ŋunye fifia, be miawɔ aʋa kplim?

⁴Tete Yefta ƒo Gileadtɔwo katã nu ƒu yi ɖawɔ aʋa kple Efrayim, eye Gileadtɔwo si Efrayim; elabena wogblɔ bena: Gileadtɔwo nye Efrayim ƒe ame dzegowo: Gilead le Efrayim kple Manase dome.

⁵Eye Gileadtɔwo xe Yordan-tsoƒewo na Efrayim. Eye ne Efrayimtɔ sisia ɖe va gblɔ be: mina matso tɔa la, Gileadtɔwo bianɛ bena: Efrayimtɔ nènyea? Eɖoa ŋu be: Kpao!

⁶Wogblɔna nɛ be: Gblɔ be Sibolet! Tete wogblɔna be Zibolet; elabena meɖo ŋu ɖo be, wòagblɔe nyuie o. Enumake wolénɛ, eye wowunɛ ɖe Yordan-tsoƒe la. Ale Efrayimtɔ ame akpe blane vɔ eve kũ ɣemaɣi.

⁷Eye Yefta drɔ̃ ʋɔnu na Israel ƒe ade, emegbe Yefta, Gileadtɔ la ku, eye woɖu ɖe Gilead-duwo dometɔ ɖeka me.

⁸Eyome Ibzan, amesi tso Betlexem la, drɔ̃ ʋɔnu na Israel.

⁹Edzi ŋutsuvi blaetɔ̃, eye wòɖe srɔ̃ na vianyɔnu blaetɔ̃awo ɖe duta, eɖe nyɔnuvi blaetɔ̃ tso duta na viaŋutsuwo, eye wòdrɔ̃ ʋɔnu na Israel ƒe adre.

¹⁰Emegbe Ibzan ku, eye woɖii ɖe Betlexem.

¹¹Elon, Zebulontɔ la, drɔ̃ ʋɔnu na Israel ɖe eyome ƒe ewo.

¹²Eye Elon, Zebulontɔ la ku, woɖi ɖe Ayalon le Zebulon-nyigba dzi.

¹³Eyome Piratonitɔ Abdon, Hilel vi, drɔ̃ ʋɔnu na Israel.

¹⁴Edzi ŋutsuvi blane, eye wòxɔ tɔgbuiyɔvi blaetɔ̃, amesiwo doa tedzivi blaadre, eye wòdrɔ̃ ʋɔnu na Israel ƒe enyi.

¹⁵Eye Piratonitɔ Abdon ku woɖi ɖe Piraton le Efrayim-nyigba dzi le Amalekitɔwo ƒe to dzi.