Read ewe Ʋɔnudrɔ̃lawo 16 Bible Online

Ʋɔnudrɔ̃lawo 16 - ewe bible

Ʋɔnudrɔ̃lawo 16

¹Tete Simeon yi Gaza, eye wòkpɔ gboloa ɖe le afima heyi egbɔ.

²Esi wofi tofi na Gazatɔwo bena, Simson va afisia la, woɖe to ɖee, eye wode xa ɖe du la ƒe agbo nu nɛ le zã blibo la katã me; wozi ɖoɖoe le zã blibo la katã me be, ne ŋu ke la, yewoawui.

³Ke Simson mlɔ anyi vaseɖe zã titina; le zãtiƒe la efɔ, eye woho ɖu la ƒe agbo kple agboti eveawo hekpe ɖe gameti la ŋu, eye wòlee ɖe abɔ tsɔ va da ɖe to, si le Xebron kasa la tame.

⁴Esia megbe la elɔ̃ nyɔnua ɖe le Sorek-tɔʋu la nu, si ŋkɔ nye Delila.

⁵Eye Filistitɔwo ƒe amegãwo va egbɔ gblɔ nɛ bena: Ble enu, ne nadze si nusi me eƒe ŋusẽ gã la le, kple nusi míatsɔ aɖu edzi, kpakple nusi míatsɔ ablae, be míabɔbɔe ɖe anyi; ekema mía dome amesiame ana klosalo akpe kple alafa ɖeka wò!

⁶Tete Delila gblɔ na Simson bena: Taflatse, ɖe nusi me wò ŋusẽ gã la le la fiãm kple nusi woatsɔ abla wò abɔbɔ wò ɖe anyi!

⁷Simson ɖo ŋu nɛ bena: Ne wotsɔ atagbi mumu adre, siwo meƒu haɖe o la, biam la, ekema magbɔdzɔ, eye mazu abe ame bubuwo ke ene.

⁸Tete Filistitowo ƒe amegãwo tsɔ atagbi yeye adre, siwo meƒu haɖe o la vɛ, eye nyɔnu la tsɔ wo biae.

⁹Ke wode xa ɖe nyɔnua gbɔ le xɔgã me, eye wògblɔ nɛ bena: Simson, Filistitɔwo ƒo ɖe dziwò loo! Tete wòtso kawo, abe alesi dzo gbɔna ɖe anazika wòlãna ene, eye womekpɔ eƒe ŋusẽ la nu o.

¹⁰Eye Delila gblɔ na Simson bena: Kpɔ ɖa, èblem, eye nèka aʋatso nam! Gblɔ nusi woatsɔ abla wòe la nam dzro!

¹¹Eɖo ŋu ne bena: Ne wotsɔ ka yeye, si mede naneke ŋu haɖe o la, biam la, ekema magbɔdzɔ, eye mazu abe ame bubuwo ke ene.

¹²Tete Delila tsɔ ka yeyewo biae, eye wògblɔ nɛ bena: Simson, Filistitowo ƒo ɖe dziwò loo! Ke amewo de xa ɖe xogã me. Tete wòtso kawo le aba abe ɖeti ŋuɖekɛ ene.

¹³Delila gblɔ na Simson bena: Ɖeko neblem vaseɖe fifi, ye nèka aʋatso nam; gblɔ nusi woatsɔ abla wòe la nam! Eɖo ŋu nɛ bena: Ne elɔ̃ ɖakɔ adre, siwo le nye ta la, ɖe avɔ tsitsi me.

¹⁴Tete wòtsɔ agbatrɔti trɔe, eye wògblɔ bena: Simson, Filistitowo ƒo ɖe dziwò loo! Enumake wonyɔ tso alɔ̃ me, eye wòho agbatrɔti la kpe ɖe avɔ tsitsi la ŋu.

¹⁵Eye wògblɔ ne bena: Aleke nègblɔ be, yele lɔ̃yem, gake wò dzi meku ɖe ŋunye o? Zi etɔ̃ enye si nèblem, eye mègblɔ nusi me wò ŋusẽ gã la le la nam o.

¹⁶Esi wòle dzi gbãm ne gbawotsyogbe kple eƒe nyawo, eye wòle fu ɖem nɛ la, eva gloe, eye ku ɖo mo nɛ.

¹⁷Tete wògblɔ eƒe dzime-nyawo katã nɛ bena: Talũhɛa ɖeke ɖeke medea nye ta ŋu o, elabena Mawu ƒe klue menye tso danye ƒe da me ke. Ne wolũ ta nam la, ekema nye ŋusẽ ado le ŋunye, eye magbɔdzɔ azu abe ame bubuwo katã ene.

¹⁸Esi Delila kpɔ bena, egblɔ eƒe dzimenyawo katã nɛ la, edo ame ɖo ɖa, be woayɔ Filistitɔwo ƒe amegãwo vɛ gblɔ bena: Miva azɔ, elabena egblɔ eƒe dzimenyawo katã nam! Tete Filistitɔwo ƒe amegãwo va, eye wohe klosalo la ɖe asi.

¹⁹Eye wòna wòdɔ alɔ̃ ɖe eƒe ata dzi; tete wòyɔ ŋutsua ɖe vɛ wòlũ ɖakɔ adreawo le eta. Ale wòna wòde asi gbɔdzɔgbɔdzɔ me, eye eƒe ŋusẽ do le eŋu.

²⁰Eye nyɔnu la gblɔ bena: Simson, Filistitɔwo ƒo ɖe dziwò loo! Tete wonyɔ tso alɔ̃ me hebu bena: Mado abe tsã ene, eye maʋuʋu ɖokuinye! Ke menyae be, Yehowa dzo le egbɔ o.

²¹Eye Filistitowo lee heŋɔ eƒe ŋkuwo, eye wokplɔe yi Gaza: wode akɔbli kɔsɔkɔsɔe, eye ele ne be, wòanɔ wɔ tum le gaxɔ me.

²²Esi wolũ ta nɛ megbe la, eƒe ɖa gade asi toto me.

²³Eye Filistitowo ƒe amegãwo va kpe ta, be woasa vɔ na woƒe mawu Dagon, eye wotu aglo gãa ɖe hegblɔ bena: Mia mawu tsɔ míaƒe futɔ Simson de asi na mí!

²⁴Eye esi dukɔ la kpɔe la, wokafu woƒe mawu, elabena wogblɔ be: Mía mawu tso miaƒe futɔ, si gblẽ miaƒe anyigba, eye wowu míaƒe ame geɖewo la, de asi na mi.

²⁵Esi wole dzidzɔ kpɔm la, wogblɔ be: Miɖayɔ Simson vɛ, ne wòado nukokoe na mi! Tete woyi ɖakplɔ Simson tso gaxɔ me vɛ wòle nukokoe dom na wo, eye wokplɔe ɖo sɔti eve domee.

²⁶Eye Simson gblɔ na ŋutsuvi, si le ekplɔm la bena: Ɖe asi le ŋunye, ne malé sɔti, siwo dzi xɔa nɔ, eye maziɔ ɖe wo ŋu!

²⁷Ŋutsuwo kple nyɔnuwo yɔ xɔ la taŋtaŋ, eye Filistitowo ƒe amegãwo katã le afima, eye ŋutsuwo kple nyɔnuwo anɔ ame akpe etɔ̃ le dziƒo, amesiwo le Simson ƒe nukokoedoname la kpam.

²⁸Tete Simson yɔ Yehowa gblɔ bena: Aƒetɔ Yehowa, ɖo ŋku dzinye, eye do ŋusẽm fifia ko, oo Mawu, ne mabia hlɔ̃ Filistitɔwo ɖe nye ŋku eveawo nu!

²⁹Eye Simson va titinasɔti eveawo, siwo dzi xɔa nɔ, ɖeka ɖe ɖusi, eye evelia ɖe mia, eye wòtutu wo.

³⁰Eye Simson gblɔ be: Maku kple Filistitɔwo! Eye wòbi eɖokui kple ŋusẽ, tete xɔ la mũ dze amegãwo kple dukɔ blibo la dzi. Ale amesiwo wowu le eƒe kuɣi la, sɔ gbɔ wu amesiwo wòwu le eƒe agbe me.

³¹Tete nɔviawo kple fofoa ƒemetɔwo katã va tsɔe yi ɖaɖi ɖe fofoa Manoax ƒe yɔdo me le Zora kple Estaol dome? Edrɔ̃ ʋɔnu na Israel ƒe blave sɔŋ.