Read ewe Ʋɔnudrɔ̃lawo 17 Bible Online

Ʋɔnudrɔ̃lawo 17 - ewe bible

Ʋɔnudrɔ̃lawo 17

¹Eye ŋutsua ɖe no Efrayim-to dzi, si ŋkɔ nye Mixa.

²Eya gblɔ na dadaa bena: Wò klosalo akpe ɖeka kple alafa, si wofi, eye nedo ɖiŋu ɖe eŋu, nye hã mese la, le asinye; nyee tso klosalo la. Tete dadaa gblɔ bena: Yehowa ayra wò, vinye!

³Esi wògbugbɔ klosalo akpe ɖeka kple alafa la na dadaa la, dadaa gblɔ bena: Mekɔ klosalo, si le asinye la ŋu na Yehowa hena vinye, be wòatsɔe awɔ aklama kpakpɛ kple legbae; eyata megagbugbɔe na wò.

⁴Eye wòtsɔ klosalo la na dadaa Ke dadaa ɖe klosalo alafa eve na sikanutula, amesi tsɔe wɔ aklama kpakpɛ kple legbae, eye wotsɔe va Mixa ƒe me.

⁵Eye Mixa tu mawuxɔ, etɔ kɔmewu, eye woli aƒeli heɖo viaŋutsu ɖeka, be wòanye nunɔla nɛ.

⁶Ɣemaɣi la fíaa ɖeke mena Israel o, eye amesiaame wɔ nusi dze eŋu.

⁷Eye ɖekakpuia ɖe tso Betlexem-Yuda le Yuda ƒe ƒome la me; enye Lewitɔ, eye wònye amedzro le afima.

⁸Eye woʋu tso Betlexem-Yuda-du la me, be wòaɖanɔ afisi wòkpɔ; eye wòva Efrayim-to la dzi heyi ɖe Mixa ƒe me, be wòagayi eƒe azɔli dzi emegbe.

⁹Tete Mixa gblɔ nɛ bena: Afika nètso? Eɖo ŋu nɛ bena: Lewito menye tso Betlexem-Yuda, eye meyina, be manɔ afisi makpɔ.

¹⁰Mixa gblɔ nɛ bena: Tsi gbɔnye, eye nanye fofo kple nunɔla nam, ekema mana klosalo ewo wò ƒe sia ƒe hekpe ɖe avɔtata kple nuɖuɖu ŋu. Ale wozi Lewito la dzi.

¹¹Lewito la lɔ̃ be, yeatsi ŋutsu la gbɔ, eye ɖekakpui la le nɛ abe viawo dometɔ ɖeka ene.

¹²Eye Mixa ɖo Lewitɔ la. Ale ɖekakpui la trɔ zu nunɔla nɛ, eye wòtsi Mixa ƒe me.

¹³Tete Mixa gblɔ bena: Azɔ menyae bena, Yehowa le nyui wɔ ge nam, elabena Lewitɔe nye nunɔla nam.