Read ewe Ʋɔnudrɔ̃lawo 21 Bible Online

Ʋɔnudrɔ̃lawo 21 - ewe bible

Ʋɔnudrɔ̃lawo 21

¹Eye Israel-ŋutsuwo ka atam le Mizpa gblɔ bena: Mía dometɔa ɖeke matsɔ vianyɔnu na Benyamin-viwo woaɖe akpɔ o!

²Eye esi dukɔ la va Betel la, wotsi Mawu ŋku me le afima vaseɖe fiẽ, eye wofa avi sesĩe

³gblɔ bena: Oo, Yehowa, Israel ƒe Mawu, nukaŋuti nusia dzɔ le Israel, eye to ɖeka bu le Israel egbe sia?

⁴Eye dukɔ la fɔ ŋdi kanya le ŋkeke eveagbe heɖi vɔsamlekpui, eye wosa numevɔ kple akpedavɔ.

⁵Eye Israel-viwo gblɔ bena: Ameka le Israel-toawo katã dome, si meva takpeƒe le Yehowa gbɔ le Mizpa o? Elabena ɖe woka atam ɖe amesi mava Yehowa gbɔ le Mizpa o la ŋu bena, ele be, woawui kokoko!

⁶Eye wòve Israel-viwo na wo nɔvi Benyamin, eye wogblɔ bena: To ɖeka tsrɔ̃ ɖa le Israel egbe sia!

⁷Aleke míawɔ hafi ana nyɔnu ame kpɔtɔeawo? Elabena míeta Yehowa be, miana mía vinyɔnua ɖeke wo woaɖe o.

⁸Eye wòbia bena: Ameka le Israel-toawo dome, si meva Yehowa gbɔ le Mizpa o? Eye kpɔ ɖa, Yabes-Gileadtɔa ɖeke meva takpeƒe la le asaɖa me o.

⁹Eye esi woxlẽ dukɔa la, kpɔ ɖa,! Yabes-Gileadtɔa ɖeke meva o.

¹⁰Tete ameha la ɖe ame akpe wuieve le kalẽtɔwo dome ɖo ɖa gblɔ na wo bena: Miyi ɖawu Yabes-Gileadtɔwo kple yi, nyɔnuwo kple ɖeviwo siaa!

¹¹Ale miawɔ enye si: Mitsrɔ ŋutsu sia ŋutsu kple nyɔnu, siwo katã dɔ ŋutsu gbɔ kpɔ la gbidigbidi!

¹²Eye wokpɔ ɖetugbi alafa ene, siwo medɔ ŋutsu gbɔ kpɔ o, le Yabes-Gileadtɔwo dome, eye wokplɔ wo va asaɖa la me le Silo le Kanaan-nyigba dzi.

¹³Eye ameha blibo la dɔ ame ɖo ɖe Benyamin-viwo gbɔ le Rimon-kpe la gbɔ, eye wodo ŋutifafa ŋugbe na wo.

¹⁴Tete Benyamin-viwo trɔ gbɔ ɣemaɣi, eye wotsɔ nyɔnu, siwo woxɔ ɖe agbe tso Yabes-Gilead-nyɔnuwo dome la na wo; ke womede wo nu o.

¹⁵Eye Benyamin ƒe nu ve dukɔ la, elabena Yehowa na Israel-toawo tsi ŋuzã.

¹⁶Tete ameha la ƒe amegãwo gblɔ bena: Aleke míawɔ hafi ana nyɔnu ame kpɔtɔeawo? Elabena nyɔnuwo tsrɔ̃ le Benyamin.

¹⁷Eye wogblɔ bena: Benyamin ƒe anyigba enye woƒe amesiwo kpɔtɔ la tɔ, eye toa ɖeke nu matsi le Israel o!

¹⁸Ke miawo la míate ŋu atsɔ mia vinyɔnuwo na wo woade o; elabena Israel-viwo ka atam bena: Aɖi amesi ana nyɔnu Benyamin la ŋu!

¹⁹Eye wogblɔ bena: Kpɔ ɖa, woɖua Yehowa ƒe ŋkekenyuie la ƒe sia ƒe le Silo, si le Betel ƒe anyiehe kple mɔ, si tso Betel ɖo ta Sixem la, ƒe ɣedzeƒe kpakple Lebona ƒe dziehe.

²⁰Eye wode se na Benyamin-viwo bena: Miyi ɖade xa de weingblewo me,

²¹eye ne miekpɔ be, Silo-nyɔnuviwo do va ɣe du ge la, ekema mido tso weingbledelawo me, eye mia dome amesiame nelé nyɔnu le Silo-nyɔnuviwo dome na eɖokui, eye mido yi Benyamin-nyigba dzi!

²²Ke ne wo fofowo kple wo nɔviŋutsuwo va dzre wɔ ge kpli mí la, ekema miagblɔ na wo bena: Miele asi le wo ŋu na mi, elabena miekpɔ nyɔnu le aʋa me na amesiame o; ɖe wònye mia ŋutɔwoe tsɔ wo na wo la, eya ko wòanye ɖe míeɖi fɔ.

²³Tete Benyamin-viwo wɔ nenema, eye wokpɔ nyɔnu wòde wo nu tso ɣeɖula, siwo woha la dome. Emegbe wotrɔ yi woƒe anyigba dzi, eye wogbugbɔ duawo tso hena wo me.

²⁴Eye Israel-viwo dome amesiame dzo ɣemaɣi tso afima yi eƒe to me kple eƒe ƒomeawo gbɔ, eye amesiame dzo tso afima yi eƒe anyigba dzi.

²⁵Ɣemaɣi la fiaa ɖeke menɔ Israel o, eye amesiame wɔ nusi dze eŋu.