Read ewe Ʋɔnudrɔ̃lawo 4 Bible Online

Ʋɔnudrɔ̃lawo 4 - ewe bible

Ʋɔnudrɔ̃lawo 4

¹Ke esi Ehud ku la, Israel viwo gade asi nusi medze Yehowa ŋu o la wɔwɔ me.

²Eyata Yehowa tso wo dzra na Kanaan-fia Yabin, amesi ɖu dzi le Xazor; eƒe aʋafia nye Sisera, amesi nɔ Xaroset-Goyim.

³Eye Israel-viwo ɖo ɣli na Yehowa, elabena gatasiaɖam alafa asieke le esi, eye wòle Israel-viwo ɖe anyi sesẽtɔe ƒe blave sɔŋ.

⁴Ɣemaɣi la nyɔnu-nyagblɔɖila Debora, Lapidot srɔ̃e, drɔ̃ ʋɔnu na Israel.

⁵Ena Debora ƒe ɖeti te le Rama kple Betel dome le Efrayim-to dzi, eye Israel-viwo yia egbɔ ɖadrɔ̃a ʋɔnu.

⁶Eye wòdɔ ame woyi ɖayɔ Barak, Abinoam vi, tso Kedes-Naftali vɛ, eye wògblɔ nɛ bena: Yehowa, Israel ƒe Mawu la, ɖe se na wò be: Ho, yi Tabor-to la dzi, naɖe ame akpe ewo tso Naftali-viwo kple Zebulon-viwo dome kpe ɖe ɖokuiwò ŋu;

⁷makplɔ Sisera, Yabin ƒe aʋafia kple eƒe tasiaɖamwo kpakple eƒe aʋakɔ ava gbɔwò le Kison-toʋu la nu, eye matsɔe ade asi na wò!

⁸Tete Barak gblɔ nɛ bena: Ne ayi kplim la, ekema mayi; ke ne màyi kplim o la, ekema nye hã nyemayi o.

⁹Eɖo ŋu bena: Mele yiyi ge kpli wò tso; ke bubu, si le mɔ, si dzi dze ge nala me la, manye tɔwò o, elabena Yehowa atsɔ Sisera ade asi na nyɔnua ɖe! Eye Debora tso yi Kedes kple Barak.

¹⁰Tete Barak yɔ Zebulon kple Naftali va kpe ta ɖe Kedes, eye ŋutsu akpe ewo ho dze eyome, eye Debora hã yi kplii.

¹¹Ke Xeber. Kenitɔ la, ʋu tso Mose ƒe nyo Xobab viwo, siwo nye Kenitɔwo la gbɔ, eye wòva tu eƒe agbadɔwo ɖe logotiwo gbɔ le Zaanayim le Kedes gbɔ.

¹²Eye esi wogblɔ na Sisera bena, Barak, Abinoam vi, ho va Tabor-to ŋu la,

¹³tete Sisera dzra eƒe gatasiaɖamwo katã ɖo, eye eya kple eƒe aʋakɔ blibo la ho tso Xaroset-Goyim va kpe ta ɖe Kison-tɔʋu la nu.

¹⁴Eye Debora gblɔ na Barak bena: Tso! Elabena egbe sia Yehowa le Sisera tso ge aɖe asi na wò. Alo ɖe Yehowa medze ŋgɔwò oa? Tete Barak ɖi tso Tabor-to la dzi, eye ame akpe ewo dze eyome.

¹⁵Eye Yehowa tsɔ yi de zi Sisera kple eƒe tasiaɖamwo katã kple eƒe aʋakɔ blibo la me le Barak ŋgɔ, eye Sisera ɖi le eƒe tasiaɖam me heto afɔ si.

¹⁶Ke Barak ti tasiaɖamwo kple aʋakɔ la yome vaseɖe Xaroset-Goyim; eye Sisera ƒe aʋakɔ blibo la tsi yi nu, ame ɖeka hɔ̃ hã mekpɔtɔ o.

¹⁷Ke Sisera to afɔ si va Yael, Kenitɔ Xeber srɔ̃ ƒe agbadɔ gbɔ, elabena ŋutifafa le Xazor-fia, Yabin kple Kenitɔ Xeber ƒe aƒe la dome.

¹⁸Tete Yael yi ɖakpe Sisera gblɔ ne bena: Va, nye amegã, va dze gbɔnye, eye megavɔ̃ o! Enumake wòyi egbɔ le eƒe agbadɔ me, eye nyɔnu la tsɔ avɔ tsyɔ nɛ.

¹⁹Eye wogblɔ nɛ bena: Taflatse, na tsi via ɖem mano, elabena tsikɔ le wuyem. Enumake wòʋu notsilãgbalẽgolo la, eye wonae wòno, emegbe wògatsyɔ avɔ nɛ.

²⁰Eyome wògblɔ nɛ bena: Yi, natsi tre ɖe agbadɔ la ƒe mɔnu, eye ne amea ɖe va bia wò bena: amea ɖe le afisia hã la, ekema gblɔ bena: O!

²¹Tete Xeber srɔ̃ Yael tsɔ agbadɔtsyɔti, eye wotsɔ zu ɖe asi yi egbɔ dzaa, eye wòƒu tsyoti la ɖe tonu nɛ mimi ɖe anyigba. Ke edɔ alɔ yi me ʋĩ, elabena ɖeɖi le eŋu, eye woku.

²²Esi Barak ti Sisera yome la, Yael do go va kpee, eye wògblɔ nɛ bena: Va, ne mafia amesi ɖim nèle la wò! Esi wòyi la, ekpa Sisera ku ɖi, eye tsyoti ƒo ɖe tonu nɛ.

²³Ale Mawu baba Kanaan-fia Yabin ɖe anyi le ŋkeke ma dzi le Israel-viwo ŋku me enye si.

²⁴Eye Israel-viwo ƒe asi kpe Kanaan-fia Yabin dzi, vaseɖe esime wotsɔe vo keŋkeŋ.