Read ewe Ʋɔnudrɔ̃lawo 8 Bible Online

Ʋɔnudrɔ̃lawo 8 - ewe bible

Ʋɔnudrɔ̃lawo 8

¹Tete Efrayim-ŋutsuwo gblɔ nɛ bena: Nuka nye esi nèwɔ ɖe mía ŋu, eye esi neho aʋa ɖe Midiantɔwo ŋu la, negbe mia yɔyɔ? Eye wohe dzre kplii vevie.

²Ke eɖo ŋu na wo bena: Ɖe miawo miewɔ wum oa? Ɖe Efrayim ƒe weinxaxa mlɔetɔ menyo wu Abieser ƒe weinxaxa blibo la oa?

³Mawu tso Midian-amegãwo, Oreb kple Zeeb, de asi na mi, eye nuka mewo tso wu mi? Esi wògblɔ nya sia la, woƒe dziku la nu fa.

⁴Esi Gideon va Yordan nu, eye eya kple ame alafa etɔ̃, siwo le eŋu, tsoe, eye ɖeɖi te wo ŋu belibeli le wo yometiti me la,

⁵egblɔ na Sukottɔwo bena: Midi aboloa ɖewo na amesiwo le yonyeme la, elabena ɖeɖi te wo ŋu belibeli, eva mele Zebax kple Zalmuna, Midtan-fiawo, yome tim.

⁶Sukot-amegãwo ɖo ŋu bena: Ɖe wò asi tu Zebax kple Zalmuna, hafi miatso abolo na wò aʋakɔ la?

⁷Eye Gideon gblɔ bena: Enyo! Ne Yehowa tsɔ Zebax kple Zalmuna de asi nam la, ekema matsɔ gbedadaƒoŋɔka kple ŋuwo adze mia ŋutii.

⁸Eye woho tso afima yi Penuel, eye wògblɔ na woawo hã alea ke, ke Penueltɔwo ɖo ŋu nɛ abe Sukottɔwo ke ene.

⁹Tete wògblɔ na Penueltɔwo bena: Ne metrɔ gbɔ le ŋutifafa me la, magbã mɔ̃ sia aƒu anyi!

¹⁰Ke Zebax kple Zalmuna kpakple woƒe aʋakɔ la va Karkor, eye amesiwo katã kpɔtɔ le ɣedzeƒeviwo ƒe aʋakɔ me la, ana ame akpe wuiatɔ̃; ke amesiwo kpla yi, eye wotsi aʋa la, le ame akpe alafa ɖeka kple blave.

¹¹Eye Gideon to asimɔ gã dzi le Nobax kple Yogbeha ƒe ɣedzeƒe gome, eye wòsi aʋakɔ la, le esime woli bɔkɔɔ.

¹²Tete Zebax kple Zalmuna wòsi, eye woti wo yome helé Midian-fia eveawo, Zebax kple Zalmuna, eye wòde zi asaɖa blibo la me.

¹³Esi Gideon, Yoas vi, trɔ tso aʋa la tso Xeres-to dzi mo nu la,

¹⁴ele Sukot-ɖekakpuia ɖe, eyewòbiae wòŋlɔ Sukot-amegãwo kple ame tsitsiwo ŋkɔ nɛ, wole ame blaadre va adre.

¹⁵Eye esi wòva Sukottɔwo gbɔ la, egblɔ bena: Zebax kple Zalmuna enye si, amesiwo mietsɔ ɖu fewu le ŋunye gblɔ bena: Ɖe wò asi tu Zebax kple Zalmuna, hafi miana abolo wò ame, siwo ŋu ɖeɖi te belibeli la mahã?

¹⁶Emegbe wòlé dua me tsitsiawo, eye wòna Sukottɔwo ʋẽ gbedadaƒoŋɔka kple ŋuwo se.

¹⁷Egbã Penuel mɔ̃ la ƒu anyi, eye wowu duametɔwo.

¹⁸Eye wògblɔ na Zebax kple Zalmuna bena: Ŋutsu ka ƒomeviwoe miewu le Tabor gbɔ? Woɖo ŋu bena: Wole abe wò ene, eye wo dome ɖesiaɖe ɖi fiavi.

¹⁹Tete wògblɔ bena: Nɔvinyeŋutsuwoe, danyeviwo wonye. Meta si Yehowa ƒe agbe! Ɖe wònye ɖe miena wotsi agbe la, anye ne nyemele mia wu ge o.

²⁰Enumake wògblɔ na eƒe ŋgɔgbevi Yeter bena: Tso, nawu wo! Ke ele vɔvɔ̃m, eye meɖi eƒe yi o, elabena ɖevi wònye.

²¹Tete Zebax kple Zalmuna gblɔ bena: Wò ŋutɔ tso, nadza mí, elabena ŋutsu kple eƒe ŋusẽe sɔ! Tete Gideon tsi tre, eye wowu Zebax kple Zalmuna; eye wòɖe kogɛ, siwo le kɔ na woƒe kposɔwo.

²²Tete Israeltɔwo gblɔ na Gideon bena: Wò ŋutɔ kple viwòŋutsu kpakple viwòŋutsu ƒe vi miɖu fia ɖe mía dzi, elabena wòe ɖe mí tso Midiantɔwo si me!

²³Gideon ɖo ŋu na wo bena: Nye ŋutɔ alo vinyeŋutsu míaɖu fia ɖe mia dzi o, ke boŋ Yehowa neɖu fía ɖe mia dzi!

²⁴Gideon gblɔ na wo bena: Nu ɖeka biam mele tso mia si, mia dome amesiame netsɔ togɛ, siwo woha la nam. Ismaeltɔwo wonye, eyata woɖo sikatogɛ.

²⁵Woɖo ŋu bena: Miana wò baa! Tete wokeke avɔ ɖe anyi, eye amesiame fɔ togɛ, si woha la, va ɖa ɖe eme.

²⁶Eye sikatogɛ, siwo wòbia la, ƒe kpekpeme le sekel akpe ɖeka kple alafa adre, womebu kogɛ kple tomedzonu kpakple aɖabɛwu, siwo Midian-fiawo do, kple kɔsɔkɔsɔ, siwo le ka na woƒe kposɔwo la, ɖe me o.

²⁷Eye Gideon tsɔ wo wɔ kɔmewu hetsɔ ɖa ɖe eƒe du Ofra me, eye Israel blibo la subɔe, eye wòtrɔ zu mɔ̃ na Gideon ƒe aƒe la.

²⁸Ale wobɔbɔ Midiantɔwo ɖe anyi le Israel-viwo ŋku me, eye womegafɔ ta dzi kpɔ o. Eye anyigba la dzi fa le Gideon ŋɔli ƒe blane sɔŋ.

²⁹Eye Yerub-Baal, Yoas vi, yi ɖanɔ eƒe me.

³⁰Ŋutsuvi blaadre le Gideon si, siwo nye eya ŋutɔ ƒe ali me viwo, elabena eɖe srɔ̃ geɖe.

³¹Eye eƒe ahiã, si le Sixem la, dzi ŋutsuvi nɛ, eye wòtsɔ ŋkɔ nɛ bena Abimelex.

³²Gideon, Yoas vi la, tsi ŋutɔ hafi ku, eye woɖii ɖe fofoa Yoas ƒe yɔɖo me le Abiesritɔwo ƒe Ofra.

³³Esi Gideon nya ku ko la, Israel-viwo trɔ hesubɔ Baalwo, eye wotsɔ Baal-Berit wɔ woƒe mawui.

³⁴Eye Israel-viwo ƒe ŋku dzo le Yehowa, woƒe Mawu la dzi, amesi ɖe wo tso woƒe futɔwo katã, siwo ƒo xlã wo godoo la si me.

³⁵Eye womeve Yerub-Baal, amesi nye Gideon la ƒe ƒomeawo nu o, evɔ wònye ewo nyui geɖe na Israel hafi.